ازيا دامۋ بانكىنىڭ (ادب) پرەزيدەنتى ماساسۋگۋ اساكاۆامەن كەزدەسۋدە الماتى اكىمى ەربولات دوسايەۆ جاسىل ەكونوميكا جوبالارىن ىسكە اسىرۋداعى ىنتىماقتاستىق ماسەلەلەرىن تالقىلادى، بانكتىڭ قالالىق ورتانى جاقسارتۋعا قوسقان باعا جەتپەس ۇلەسىن اتاپ ءوتتى، دەپ حابارلايدى almaty-akshamy.kz
بەلگىلىسى، قازىرگى كەزدە الماتى اكىمدىگى ەكولوگيانى جاقسارتۋ بويىنشا جان-جاقتى شارالار قابىلداۋدا. بەكىتىلگەن «2025 جىلعا دەيىنگى دامۋ جانە 2030 جىلعا دەيىنگى ورتا مەرزىمدى پەرسپەكتيۆالار باعدارلاماسى» اياسىندا قوعامدىق كولىكتى ەكولوگيالاندىرۋ جانە ونەركاسىپتىك كاسىپورىنداردان شىعارىندىلاردى ازايتۋ جونىندەگى جوبالار ىسكە اسىرىلۋدا. ادب قاتىسۋىمەن اعىمداعى جىلدىڭ 31 مامىرىندا جەو-2 جاڭعىرتۋ تۋرالى كەلىسىم جاسالدى. جەو-2ء-نى تابيعي گازعا اۋىستىرۋ ناتيجەسىندە زياندى شىعارىندىلار جىلىنا 37،3 مىڭ توننادان 2،7 مىڭ تونناعا دەيىن نەمەسە 90%-عا قىسقارادى دەپ كۇتىلۋدە. جوبانىڭ الماتىدا اۋا ساپاسىن جاقسارتۋعا جانە تازارتۋعا قوساتىن ۇلەسى زور بولادى. جىلىنا تاعى 2 مىڭ تونناعا قوعامدىق كولىكتى جاڭعىرتۋ ەسەبىنەن زياندى شىعارىندىلاردىڭ ازايۋى بولجانۋدا. الماتى اكىمدىگى 200 جاڭا تروللەيبۋس ساتىپ الۋدى جانە قولدانىستاعى 1،2 مىڭ ديزەلدى اۆتوبۋستى گاز جانە ەلەكتر تارتىمىنا اۋىستىرۋدى جوسپارلاپ وتىر. ارنايى گازبەن جۇرەتىن اۆتوبۋستارعا قىزمەت كورسەتۋ ءۇشىن 2 اۆتوبۋس پاركى مەن 5 گاز قۇيۋ ستانسياسى سالىنادى.
وتكەن جىلى ادب-مەن بىرلەسىپ الماتىدا قورشاعان ورتانى لاستايتىن اۋانىڭ ساپاسىن ولشەۋگە ارنالعان 50 اسپاپ (PM 2.5، PM10، NO2 قاتتى بولشەكتەر) ورناتىلدى، ولار قازگيدرومەتتىڭ اقپاراتتىق جۇيەسىمەن ينتەگراسيالانعان جانە اتموسفەرالىق اۋانىڭ تولىق جاعدايىن ونلاين رەجيمىندە باقىلاۋعا مۇمكىندىك بەرەدى. اعىمداعى جىلدىڭ ءساۋىر ايىندا بانك تۇرمىستىق جىلىتۋ جۇيەلەرىن كومىردەن تازا وتىنعا اۋىستىرۋ، قوعامدىق كولىك ينفراقۇرىلىمىن جاڭعىرتۋ، «الماتى تازا قالا» جانە تاعى باسقا ءىس-قيمىل جوسپارىن ۇسىندى. قازىرگى ۋاقىتتا جوسپاردى «Green Almaty» جوبالىق ءوفيسى ءارى قاراي ۇسىنىستاردى ىسكە اسىرۋ جونىندەگى شارالاردى ازىرلەۋدە جانە زەرتتەۋدە.
كەزدەسۋ قورىتىندىسى بويىنشا تاراپتار جاسىل ەكونوميكانى ىلگەرىلەتۋ جونىندەگى باستامالاردى قولداۋدىڭ ماڭىزدىلىعىن اتاپ ءوتتى جانە ەكىجاقتى ىنتىماقتاستىقتى كەڭەيتۋ تۋرالى ۋاعدالاستى. الماتى اكىمدىگى مەن ازيا دامۋ بانكى اراسىنداعى ىنتىماقتاستىقتىڭ پەرسپەكتيۆالارى LRT جەلىسىن سالۋ، ەلەكتر اۆتوبۋستارىن ساتىپ الۋ جانە زاريادتاۋ ستانسيالارىن قۇرۋ، تۇرعىن ءۇي قورى مەن قوعامدىق عيماراتتاردىڭ ەنەرگواۋديتىن جۇرگىزۋ اياسىندا ءوربيتىن بولادى.