بۇل جەر 2014 جىلى تالعار اۋدانىنان قالاعا جاڭا اۋماقتار قوسىلعان كەزدە بەرىلگەن.
مەگاپوليس باسشىسى بۇل جۇمىستى ەرەكشە باقىلاۋدا ۇستاۋعا ۋادە بەردى، دەپ حابارلايدى Almaty-akshamy.kz
كەزدەسۋگە كەلگەن تۇرعىن سۇراعى:
2014 جىلى ج1-گە زاڭسىز بەرىلگەن كامەنسكيي ۇستىرتىندەگى ر1 ايماعىن قايتارۋ قاجەت. وسى كەزگە دەيىن قۇرىلىس سالۋشى گەكتارلاعان الما باقتارىن قيراتتى، كوشكىن ءجۇردى. ءقازىر زاڭسىز قۇرىلىس ءجۇرىپ جاتىر، جەكە تۇرعىن ءۇيدىڭ ورنىنا باسقا قۇرىلىس سالىنىپ جاتىر. بۇل اۋماقتا سۋ دا، كارىز جۇيەسى دە جوق. ءسىزدىڭ تاراپىڭىزدان قولداۋ كۇتەمىز.
«مەن كامەنسكيي ۇستىرتىندەگى الما باقتارىن كەسۋ جاعدايى تۋرالى جەكە تاپسىرما بەردىم. قالالىق پروكۋراتۋرا ەكولوگيا جانە قورشاعان ورتانى قورعاۋ دەپارتامەنتىمەن بىرلەسىپ، جۇمىستار جۇرگىزدى. كوپتەگەن جوبالار نەگىزىندە ءبىز قۇرىلىستى توقتاتتىق، پروسەستەردى اياقتاۋ ءۇشىن سوتقا ءتيىستى تالاپتار ۇسىنىپ، شاعىم تۇسىردىك. بۇل 2014 جىلى الماتى وبلىسى تالعار اۋدانىنان قالاعا جاڭا اۋماقتار قوسىلعان كەزدە بولعانىن دۇرىس اتاپ ءوتتىڭىز. ءدال وسىنداي ر1-دەن ج1-گە اۋىسقان جاعداي باسقا اۋدانداردا دا بار. ءبىز زاڭسىز قۇرىلىستى توقتاتتىق. جەردىڭ پايدالانۋ ماقساتىن بۇرىنعىشا اۋىستىرا سالۋ وڭاي شارۋا ەمەس. بۇل دەگەنىڭىز - بىرنەشە سوت پروسەستەرىنەن كەيىن شەشىلۋى مۇمكىن جاعداي. سول جىلدارى ونداعان مىڭ جەر تەلىمدەرى بەرىلگەن. كوشكىن ءقاۋپى جوعارى ايماقتارعا قوسىمشا زەرتتەۋلەر جۇرگىزىپ، ءتيىستى شاعىمداردى سوتقا جىبەرەمىز. ءبىز بۇل جۇمىستى ەرەكشە باقىلاۋدا ۇستايمىز»، - دەپ جاۋاپ بەردى الماتى قالاسىنىڭ اكىمى ەربولات دوسايەۆ.