الماتى اكىمى دارحان ساتىبالدى جاۋاپتى باسقارمالار باسشىلارىمەن كەڭەس وتكىزىپ، وندا قۇرىلىس جۇمىستارىنىڭ ساپاسى، اباتتاندىرۋ، قىس ماۋسىمىنا دايىندىق جانە قالا كوشەلەرىندەگى جول قازۋدىڭ جاي-كۇيى تالقىلادى.
الماتىدا جىل باسىنان بەرى قۇرىلىس نىساندارى 886 رەت تەكسەرىلىپ، 486 زاڭبۇزۋشىلىق انىقتالدى. ولاردى جويۋ ءۇشىن 390 نۇسقاما بەرىلدى. باقىلاۋ قورىتىندىسى بويىنشا 301 قۇرىلىس ليسەنزياسى جويىلىپ، تاعى 23ء-ى توقتاتىلدى. ساپاسىز جۇمىس پەن ەرەجەنى بۇزعانى ءۇشىن 58 مەردىگەر ۇيىم، 7 تەحنيكالىق قاداعالاۋ كومپانياسى جانە 43 جوبالاۋ فيرماسى جاۋاپقا تارتىلدى.
اكىم زاڭسىز سالىنعان نىساندارعا دا نازار اۋداردى: سوتقا 68 تالاپ ارىز، سونىڭ ىشىندە 35ء-ى — سۇرۋگە جىبەرىلدى. 2025 جىلى 33 نىسان بۇزىلدى.
قازىرگى تاڭدا الماتىدا 227 نىساندا ينجەنەرلىك جەلىلەر توسەۋ جانە جاڭارتۋ جۇمىستارى ءجۇرىپ جاتىر. ونىڭ ىشىندە 200 نىسان جىل سوڭىنا دەيىن اياقتالۋعا ءتيىس. الايدا 21 نىسان بويىنشا بەلگىلەنگەن مەرزىم بۇزىلۋى ىقتيمال. ولاردىڭ قاتارىندا «الماتى سۋ»، «الماتى جىلۋ جەلىلەرى»، «الاتاۋ جارىق كومپانياسى» جانە ءبىرقاتار اۋدان اكىمدىكتەرىنىڭ جوبالارى بار.
اكىم ۇزاق ۋاقىت قازىلىپ جاتقان جەرلەردىڭ تۇرعىندارعا قولايسىزدىق تۋعىزاتىنىن ايتىپ، ترانشەيالاردى قورشاۋسىز قالدىرۋعا، كوشەلەردى قوقىس پەن توپىراققا تولتىرۋعا جانە اسفالتتى ساپاسىز توسەۋگە بولمايتىنىن قاداپ ايتتى.
سونىمەن قاتار جولدى ورتاشا جوندەۋ كەزىندە اسفالتتىڭ جۇقا توسەلۋى، جيەكتاستاردىڭ دۇرىس ورناتىلماۋى جانە نەگىزدى تازالاماي جابىن توسەۋ سياقتى كەمشىلىكتەر انىقتالعان.
قالا قۇرىلىسى جانە ساۋلەت باسقارماسى قالانىڭ جوعارعى بولىگىندە بەرىلگەن ساۋلەت-جوسپارلاۋ تاپسىرماسى مەن قۇرىلىسقا رۇقساتتار سانى 35%-عا ازايعانىن مالىمدەدى. مەملەكەت باسشىسىنىڭ تاپسىرماسىمەن تاۋ بوكتەرىندە قۇرىلىس جۇرگىزۋگە رۇقسات بەرۋگە موراتوريي ەنگىزىلدى. 10 قاراشاعا دەيىن قۇرىلىس ەرەجەلەرىنە وزگەرىستەر ەنگىزۋ اياقتالادى، ال 2026 جىلى مامىرعا دەيىن باس جوسپار تۇزەتىلەدى.
قىسقى ماۋسىمعا 993 ارنايى تەحنيكا دايىندالعان، قوسىمشا 66 جاڭا ماشينا ساتىپ الۋ جوسپارلانعان. بۇگىندە 56 مىڭ توننا قوسپا دايىندالدى. 15 قازانعا دەيىن بۇل كورسەتكىش 100%-عا جەتكىزىلەدى. العاشقى قار ەرىتەتىن پۋنكت ىسكە قوسىلدى، تاعى ەكەۋى بيىل سالىنادى.
دارحان ساتىبالدى قازىلعان جولداردى قالپىنا كەلتىرۋگە باقىلاۋدى كۇشەيتۋدى، مەردىگەرلەردى جاۋاپقا تارتۋدى، اسىرەسە، «الماتى سۋ» جانە باسقا كوممۋنالدىق قىزمەتتەردىڭ جۇمىسىنا ەرەكشە نازار اۋدارۋدى تاپسىردى. سونداي-اق، جىل سوڭىنا دەيىن بەكىتىلگەن مەرزىمىنەن كەشىگىپ جاتقان نىسانداردى اياقتاۋ، تاۋ بوكتەرىندەگى قۇرىلىسقا باقىلاۋدى كۇشەيتۋ، باس جوسپاردى ۋاقىتىلى تۇزەتۋ، قالا قىسقا تولىق دايىن بولۋى ءۇشىن ارنايى تەحنيكا مەن رەاگەنتتەردى بەلگىلەنگەن مەرزىمدە ساتىپ الۋدى مىندەتتەدى.
اكىم قۇرىلىس پەن اباتتاندىرۋ ساپاسى تۇرعىنداردىڭ جايلى ءومىر سۇرۋىنە تىكەلەي اسەر ەتەتىنىن اتاپ ءوتتى.
«جولدى ۇزاق ۋاقىت قازىپ تاستاۋعا بولمايدى. ءاربىر مەردىگەر مەن تاپسىرىس بەرۋشى جۇمىسىنا جاۋاپتى. قالا قىسقى دايىن بولىپ، تۇرعىنداردىڭ قاۋىپسىزدىگىن قامتاماسىز ەتۋى كەرەك»، — دەدى اكىم.