بۇگىن الماتى اكىمى دارحان ساتىبالدى جۇمىس ساپارى اياسىندا «جانۇيا» كەشەنىنە جانە باعاناشىل ىقشاماۋدانىنداعى ارنايى الەۋمەتتىك قىزمەتتەرگە مۇقتاج بالالاردى قولداۋ ورتالىعىنا باردى.
قالا باسشىسى «جانۇيا» كەشەنىنىڭ جاڭا عيماراتىمەن تانىستى. ول بالالارعا جانە ەرەكشە ءبىلىم بەرۋدى قاجەت ەتەتىن بالالارعا ارنالعان. بۇرىنعى عيمارات زاماناۋي تالاپتارعا ساي بولماعاندىقتان، مەملەكەت باسشىسىنىڭ تاپسىرماسىنا سايكەس 2024 جىلى مەكەمەنى تولىق قايتا جاڭعىرتۋ تۋرالى شەشىم قابىلداندى.
جوبا بيزنەستىڭ الەۋمەتتىك جاۋاپكەرشىلىگى اياسىندا BI Group كومپانياسى مەن Agniet komek fund قورىنىڭ قولداۋىمەن جۇزەگە اسىرىلىپ جاتىر. نىسان 15 قىركۇيەكتە پايدالانۋعا بەرىلمەك. جاڭا كەشەن قازىرگى زامان تالابىنا ساي سالىنىپ، بالالاردىڭ تۇرۋىنا، وقۋىنا جانە دامۋىنا بارلىق جاعداي جاسالعان. عيمارات 400 وقۋشى ورنى مەن 216 جاتىن ورىنعا ەسەپتەلگەن.
كەزدەسۋ بارىسىندا اكىم ورتالىقتىڭ بالالارىمەن، ۇستازدارىمەن، سونداي-اق ءماسليحات دەپۋتاتتارى مەن ءبىلىم سالاسىنىڭ وكىلدەرىمەن سويلەستى. ولاردىڭ اراسىندا بەلگىلى پەداگوگ، قازاقستاننىڭ ەڭبەك سىڭىرگەن قايراتكەرى اياگۇل ميراشوۆا دا بولدى. دارحان ساتىبالدى جاس ۇرپاقتى قولداۋ – مەملەكەت پەن الماتى قالاسى ءۇشىن باستى مىندەتتىڭ ءبىرى ەكەنىن اتاپ ءوتتى.
«وزدەرىڭىز كورىپ تۇرسىزدار، بۇل عيمارات 1960-جىلدارى سالىنعان. سودان بەرى كۇردەلى جوندەۋ جاسالماعان، تەك 2022 جىلى ازداعان جوندەۋ جۇرگىزىلدى. پرەزيدەنتىمىز قاسىم-جومارت كەمەل ۇلى ءاردايىم باستى باعىت – بالالارعا جاعداي جاساۋ ەكەنىن ايتىپ وتىرادى. وسىعان بايلانىستى ءبىز بۇل نىساندى بيۋدجەت ەسەبىنەن جاڭعىرتامىز دەپ جوسپارلاعانبىز. الايدا BI Group كومپانياسى باستاما كوتەرىپ، بالالارعا ارناپ وسى كەشەندى ءوز قاراجاتىمەن سالىپ بەرۋدى ۇسىندى. ارينە، نەگىزگى جاۋاپكەرشىلىك – سىزدەردە، ۇستازدار مەن تاربيەشىلەردە. مەملەكەت تاراپىنان دا، بيزنەس وكىلدەرى تاراپىنان دا بارلىق جاعداي جاسالىپ جاتىر. ءبىراق بالالاردى باعىتتاپ، تاربيەلەيتىن – سىزدەر. ەرتەڭ وسى جەردەن ەل باسقاراتىن ازاماتتار ءوسىپ شىعۋى كەرەك»، – دەدى دارحان ساتىبالدى.
سونداي-اق بۇگىن قالا اكىمى دارحان ساتىبالدى «باعاناشىل» بالالار ۇيىنە دە باردى. اكىم مۇنداعى قولدانىستاعى عيماراتتى قايتا جاڭعىرتۋ جانە جاڭا كورپۋس سالۋ جوباسىمەن تانىستى. جوبا Integra Construction كومپانياسىنىڭ دەمەۋشىلىگىمەن جۇزەگە اسۋدا.
قۇرىلىس كومپانياسى باستاما كوتەرىپ، بارلىق شىعىندى ءوز موينىنا الاتىنىن ايتتى. ولار عيماراتتى جوندەۋمەن قاتار، ينفراقۇرىلىمدى جاڭارتىپ، بالالاردىڭ جايلى ءومىر سۇرۋىنە قوسىمشا جاعداي جاساۋدى جوسپارلاپ وتىر. قازىرگى عيمارات 1963 جىلى سالىنعان، ابدەن ەسكىرگەن. بالالار ءۇيى 165 ورىنعا ەسەپتەلگەن، ءقازىر وندا 122 بالا تۇرادى.
قالا اكىمى بارلىق قولعا الىنىپ جاتقان ءىس-شارالار بالالاردىڭ تاربيەسى مەن دامۋىنا قاجەتتى جاعداي جاساۋعا، سونداي-اق مەملەكەت باسشىسىنىڭ تاپسىرمالارىن ورىنداۋعا باعىتتالعانىن ايتتى.
«بۇل جوبانى جۇزەگە اسىرۋدىڭ ەكى جولى بار. ءبىرىنشىسى – بيۋدجەت ەسەبىنەن قارجىلاندىرۋ. ول ءۇشىن جوبالىق-سمەتالىق قۇجات ازىرلەپ، مەملەكەتتىك ساراپتامادان وتكىزىپ، كونكۋرس جاريالاۋ قاجەت. مۇنداي راسىمدەر شامامەن ءۇش جىل ۋاقىت الادى. ءبىراق مەملەكەت باسشىسىنىڭ تاپسىرماسىنا سايكەس، جۇمىس كەلەسى جىلى تولىق اياقتالۋى ءتيىس. بۇگىن مەن «جانۇيا» كەشەنىندە بولدىم. بۇل نىساندى كاسىپكەر ءوز قاراجاتىنا سالىپ، شامامەن 6 ملرد تەڭگە جۇمسادى. وسى ۇلگىدەن شابىت العان تاعى ءبىر كاسىپكەر اتالعان جوبانى جۇزەگە اسىرۋعا دايىن ەكەنىن ءبىلدىردى»، – دەدى الماتى اكىمى دارحان ساتىبالدى.
ءقازىر عيماراتقا ينجەنەرلىك-تەحنيكالىق تەكسەرۋ جۇرگىزىلىپ، جوبالىق-سمەتالىق قۇجاتتار دايىندالىپ جاتىر.
تاربيەلەنۋشىلەر مەن قىزمەتكەرلەر الماتى قالاسىنداعى ارنايى الەۋمەتتىك قىزمەتتەرگە مۇقتاج بالالارعا ارنالعان №2 ورتالىققا ۋاقىتشا كوشىرىلدى. ال «باعاناشىل» عيماراتى مەن جەر تەلىمى قالا بالانسىنا ءوتتى. بۇل شەشىم الماتى قالاسى مەن الماتى وبلىسىنىڭ اكىمدەرى بەكىتكەن «باعاناشىل» مۇلىكتىك كەشەنىن بەرۋ جونىندەگى جول كارتاسى اياسىندا جۇزەگە اسىرىلدى.