جايلى قالالىق ورتا: شۇعىلا شاعىن اۋدانىندا بالالار جانە سپورت الاڭدارى بار جاياۋ جۇرگىنشىلەر ايماعى پايدا بولادى
الماتى اكىمى ەربولات دوسايەۆ جۇمىس ساپارى بارىسىندا جانە ناۋرىزباي اۋدانىنىڭ تۇرعىندارىمەن كەزدەسۋ كەزىندە «حالىق قاتىساتىن بيۋدجەت» باعدارلاماسى اياسىندا سالىنعان بالالار جانە سپورت الاڭدارى بار جاياۋ جۇرگىنشىلەر ايماعىنىڭ قۇرىلىسىمەن تانىستى، دەپ حابارلايدى aqshamnews.kz
ناۋرىزباي اۋدانىنىڭ نەگىزگى جوبالارىنىڭ ءبىرى — شۇعىلا شاعىن اۋدانىنىڭ 10 مىڭ تۇرعىنى ءۇشىن دەمالاتىن ورىنعا اينالاتىن جاياۋ جۇرگىنشىلەر ايماعىن سالۋ.
«ءبىز بۇل جوبانى ءوزىمىز ۇسىندىق. مىنە، بۇگىن ءبىز ونى جۇزەگە اسىرۋدىڭ قالاي ءجۇرىپ جاتقانىن كورەمىز. ءبىزدىڭ ۇيلەردىڭ تۇرعىندارى ءۇشىن بۇل ۇلكەن وقيعا بولادى. ءار كەش سايىن كوڭىلدى سەرۋەن قۇراتىن بولامىز»، - دەپ اتاپ ءوتتى وسى اۋداندا تۇراتىن ايەل.
قوعامدىق كەڭىستىككە ۇزىندىعى 350 مەترلىك جاياۋ سەرۋەندەۋ الاڭى، بالالار وينايتىن، سونىمەن قاتار، باسكەتبول، ۆوركاۋت الاڭدارى جانە امفيتەاتر كىرەدى. بۇكىل اۋماقتا كوشە جيھازدارى مەن شاعىن ساۋلەت پىشىندەرىن ورنالاستىرۋ، سونداي-اق اۆتوماتتاندىرىلعان سۋارۋ جۇيەسىن جانە كوشە جارىقتاندىرۋ باعانالارىن ورناتۋ جوسپارلانۋدا. قازىرگى ۋاقىتتا اعاشتار، بۇتالار وتىرعىزىلدى، گازون جاسالدى.
اباتتاندىرۋ جوباسىنىڭ ىسكە اسىرىلۋ بارىسىمەن تانىسقان ەربولات دوسايەۆ ونى اعىمداعى جىلدىڭ قاراشا ايىنىڭ سوڭىنا دەيىن اياقتاۋدى، بار كەمشىلىكتەردى جويۋدى، جارىقتاندىرۋ جۇيەسىن قوسۋدى تاپسىردى.
ءوز كەزەگىندە شاعىن اۋدان تۇرعىندارى اكىمگە ەرەسەكتەر مەن بالالاردىڭ دەمالۋىنا قولايلى جاعدايلار، جايلى جاياۋ سەرۋەندەۋ ايماعى ءۇشىن العىستارىن ءبىلدىردى. ولاردىڭ ءوتىنىشى بويىنشا جاياۋ جۇرگىنشىلەر ايماعىنىڭ بويىندا ۆيدەوباقىلاۋ كامەرالارى ورناتىلادى.
قالا باسشىسى الماتىدا جايلى قالالىق ورتانى قۇرۋ بويىنشا بەلسەندى جۇمىس جالعاساتىنىن اتاپ ءوتتى.
«وكىنىشكە وراي، جەكە ساياباق ايماعىن جاساۋعا مۇمكىندىگىمىز جوق قالادا ءبىز جاياۋ جۇرگىنشىلەر اللەياسىنىڭ جوبالارىن قولدانامىز. قالانىڭ بارلىق اۋداندارىندا وسىنداي تارتىلىس ايماقتارى پايدا بولادى. ەلوردا تۇرعىندارى مەن قوناقتارىنا مەرەكەلىك كوڭىل - كۇي سىيلاۋ ءۇشىن ولاردى جاڭا جىلعا بەزەندىرەمىز»، - دەدى ەربولات دوسايەۆ.
اعىمداعى جىلى الماتىدا «حالىق قاتىساتىن بيۋدجەت» جوباسىنا 18،8 ملرد تەڭگە ءبولىندى، بۇل وتكەن جىلمەن سالىستىرعاندا 5،8 ملرد تەڭگەگە ارتىق. قالا تۇرعىندارى اۋلالاردى، قوعامدىق كەڭىستىكتەردى اباتتاندىرۋ، سپورت جانە ويىن الاڭدارىن قۇرۋ بويىنشا 364 جوبانى ۇسىنۋعا جانە ىسكە اسىرۋعا مۇمكىندىك الدى.
