الماتى قالاسىنىڭ اكىمى ە. دوسايەۆ تۇركسىب اۋدانىنداعى جۇمىس ساپارىن "المەرەك" شاعىناۋدانىنان باستادى. مۇندا قازىرگى كەزدە الەۋمەتتىك ينفراقۇرىلىمدى دامىتۋعا قاتىستى ماسەلەلەر وتكىر تۇر، دەپ حابارلايدى اlmaty-akshamy.kz
جەكە تۇرعىن ۇيدەگى جۇمىس ىستەپ تۇرعان دارىگەرلىك امبۋلاتوريا (1980 جىلى سالىنعان) سانيتارلىق نورمالارعا ساي ەمەس جانە جوندەۋگە مۇلدەم كەلمەيدى، ال 300 وقۋشى ورىنعا ەسەپتەلگەن №195 جالپى ءبىلىم بەرەتىن مەكتەپ كۇن سايىن 741 وقۋشىنى قابىلدايدى. كوشپەلى كەڭەس بارىسىندا قالا اكىمى كۇن تارتىبىندە تۇرعان ماسەلەلەردى شەشۋ جونىندەگى ۇسىنىستارمەن تانىستى. جايلى قالالىق ورتا باسقارماسىنا مۇددەلى مەملەكەتتىك ورگاندارمەن بىرلەسىپ اعىمداعى جىلى مەديسينالىق نىساننىڭ قۇرىلىسىن جوبالاۋدى باستاۋ جانە باسقا دا الەۋمەتتىك نىسانداردىڭ: بالاباقشانىڭ، سپورت جانە بالالار الاڭدارىنىڭ قۇرىلىسىن ودان ءارى جۇرگىزۋ ماسەلەسىن پىسىقتاۋ، سونداي-اق №195 مەكتەپكە قوسىمشا 450 ورىندىق جاپسارجايدىڭ قۇرىلىسىن جوبالاۋ مەرزىمىن جەدەلدەتۋ جانە اعىمداعى جىلى قۇرىلىستى باستاۋ تۋرالى تاپسىرمالار بەرىلدى.
تۇرعىنداردى ورتالىقتان ساپالى سۋمەن جانە سۋ بۇرۋمەن قامتاماسىز ەتۋ ماقساتىندا بيىل شاعىناۋداندا ينجەنەرلىك جەلىلەردىڭ II كەزەڭىنىڭ قۇرىلىسى باستالادى. سۋمەن 287، سۋ بۇرۋمەن 519 ءۇيدى قامتۋ جوسپارلانۋدا.
جۇمىس ساپارى بارىسىندا قالا اكىمى «اۆياتور» ستاديونىنىڭ اۋماعىن ارالاپ كوردى. سپورت نىسانى 3 گەكتار اۋماقتا ورنالاسقان، ال ونىڭ باسىم بولىگى بوس. وسىعان بايلانىستى دەنە شىنىقتىرۋ-ساۋىقتىرۋ كەشەنىن جوبالاۋدى باستاۋ تۋرالى شەشىم قابىلداندى. ونىڭ سەكسيالارىنا "نۇرشاشقان"، "المەرەك" شاعىناۋداندارىنىڭ، سونداي-اق اۋەجاي ماڭىنداعى تۇرعىن ءۇي الابىنىڭ بالالارى تەگىن بارا الادى. سونداي-اق، جۇمىس ىستەپ تۇرعان ستاديوندى جاڭعىرتۋعا ەرەكشە نازار اۋدارىلادى، ياعني كورەرمەندەر تريبۋنالارى مەن شەشىنەتىن بولمەلەر بويىنشا جۇمىستار جۇرگىزىلەدى، جۇگىرۋ جولى سالىنادى.
سونداي-اق، قالا باسشىسى وگاريەۆ كوشەسىندەگى جۇمىس ىستەمەيتىن بۇرىنعى ۆەدومستۆولىق بالاباقشانىڭ اۋماعىن پايدالانۋ جوسپارلارىمەن تانىستى. ونىڭ جەر كولەمى 2 گەكتاردان اسادى. قازىرگى كەزدە ءارقايسىسى 160 ورىندىق مەملەكەتتىك زاماناۋي بالاباقشا مەن بالالاردىڭ دامۋ جانە شىعارماشىلىق ورتالىعىنىڭ قۇرىلىسى جوبالانۋدا. وسى شاعىناۋداندا 400-گە جۋىق بالا كەزەكتە تۇر، ال مۇندا 280 ورىندىق ءبىر عانا №185 مەملەكەتتىك بالاباقشا بار. وسىنى ەسكەرە وتىرىپ، قالا اكىمى جوبالاۋ جۇمىستارىن اعىمداعى جىلدىڭ III توقسانىنىڭ سوڭىنا دەيىن اياقتاۋ ءارى ىسكە اسىرۋ بويىنشا تاپسىرما بەردى.
"قايرات" شاعىناۋدانىندا ە. دوسايەۆ 41 كوپ پاتەرلى تۇرعىن ءۇيدىڭ، 1500 وقۋشىعا ارنالعان جالپى ءبىلىم بەرەتىن مەكتەپتىڭ قۇرىلىسىمەن، ەمحانا مەن بالاباقشانى جوبالاۋ بارىسىمەن تانىستى. اعىمداعى جىلدىڭ سوڭىنا دەيىن مەكتەپتى پايدالانۋعا بەرۋ، ۇيلەردىڭ قۇرىلىسىن اياقتاۋ جانە اعىمداعى جىلى ەمحانا مەن بالاباقشا بويىنشا قۇرىلىس-مونتاج جۇمىستارىن باستاۋ جوسپارلانۋدا.
سۋمەن جابدىقتاۋ جانە كارىز ماسەلەلەرىنە ەرەكشە نازار اۋدارىلدى. وتكەن جىلى مۇندا سۋمەن جابدىقتاۋ جانە كارىز جەلىلەرىنىڭ قۇرىلىسى بويىنشا نەگىزگى جۇمىستار اياقتالدى. الايدا، بۇگىندە 200-گە جۋىق ءۇي جوباعا ءالى كىرمەگەن. قالانىڭ ەنەرگوتيىمدىلىك جانە ينفراقۇرىلىمدىق دامۋ باسقارماسىنا ابونەنتتەردى جەلىلەرگە قوسۋ جۇمىستارىن ۇستىمىزدەگى جىلدىڭ شىلدەسىنە دەيىن اياقتاۋ جانە ينجەنەرلىك جەلىلەردىڭ قۇرىلىسىنا كىرىسۋ تاپسىرىلدى.
مەگاپوليس باسشىسى 30-شى جىلدارى سالىنعان مەملەكەتتىك تىلدە وقىتاتىن №59 مەكتەپ-گيمنازيادا بولدى. قازىرگى كەزدە جوبالىق قۋاتى 860 ورىندى مەكتەپتە 1251 وقۋشى ءبىلىم الۋدا. اعىمداعى جىلدىڭ اقپان ايىندا مەكتەپ-گيمنازيانىڭ جانىنان قوسالقى نىسان سالۋ جونىندەگى جوبالىق قۇجاتتاما مەملەكەتتىك ساراپتامانىڭ قورىتىندىسىن الدى. قالالىق جايلى ورتا باسقارماسىنا رەكونسترۋكسيادان سوڭ سپورت الاڭىن اباتتاندىرۋ ءۇشىن ءتيىستى اۋماقتى كەڭەيتۋ تاپسىرىلدى.
سونداي-اق، قالا اكىمى ەسكى ۇيلەردى رەنوۆاسيالاۋ اياسىندا سالىنىپ جاتقان ۇيلەردىڭ قۇرىلىس بارىسىمەن تانىستى. ساۋرانبايەۆ، مولداعالييەۆ، چەرنىشيەۆسكيي، تولستوي كوشەلەرىنىڭ كۆادراتىندا 4 ءۇي بۇزىلىپ، 3 ءۇي سالىندى، 7 ءۇيدىڭ قۇرىلىسى جالعاسۋدا. جالپى، تۇركسىب اۋدانىنداعى 606 ءۇي رەنوۆاسيا باعدارلاماسىنا جاتادى، بۇل الماتى قالاسىنداعى ەسكى تۇرعىن ۇيلەردىڭ جالپى سانىنىڭ 50%-ىن قۇرايدى.
اۋداندى ارالاۋ بارىسىندا اباتتاندىرۋ، سونىڭ ىشىندە وقۋشىلار ءۇيىنىڭ جانىندا ورنالاسقان سكۆەردى رەكونسترۋكسيالاۋ جانە جاڭا رەكرەاسيالىق ايماقتاردى قۇرۋ بويىنشا جوبالار تانىستىرىلدى.
قالا اكىمى تۇركسىب اۋدانىنىڭ اكىمى ب. اقجاروۆتىڭ جۇمىسىن ماقۇلدادى جانە «شەتسىز قالا» باعدارلاماسى اياسىندا اۋداندى ودان ءارى دامىتۋ بويىنشا ءبىرقاتار ناقتى تاپسىرمالار بەردى.