پوليسەيلەردىڭ جۇمىستارىنا تابىس تىلەدى.
الماتى اكىمى ەربولات دوسايەۆ پوليسيا دەپارتامەنتىنە بارىپ، قۇقىق قورعاۋ ورگاندارىنىڭ قىزمەتكەرلەرىمەن كەزدەستى. قالا باسشىسى پوليسيا قىزمەتكەرلەرىنە تەرروريستىك اكسيالار كەزىندەگى قىزمەتتەرى ءۇشىن العىس ءبىلدىردى، دەپ حابارلايدى Almaty-akshamy.kz.
«قۇرمەتتى الماتى قالاسى پوليسيا دەپارتامەنتىنىڭ قىزمەتكەرلەرى!
ەڭ الدىمەن قالانى تەرروريستەردەن قورعاۋ جولىندا قازا تاپقان پوليسەيلەردىڭ جاقىندارى مەن تۋعان تۋىسقاندارىنا كوڭىل ايتقىم كەلەدى.
ءوز اتىمنان قاڭتار تراگەدياسى كەزىندە كاسىبي مىندەتتى اتقارعانىڭىز ءۇشىن العىس ايتام. ولىممەن بەتپە-بەت كەلگەن ساتتە ەشقانداي قاۋىپ-قاتەرگە قاراماستان باتىرلىق تانىتىپ، قىلمىسكەرلەرگە قارسى ەرلىكپەن كۇرەسە بىلدىڭىزدەر.
وسىنداي سىن ساعاتتاردا قالا تۇرعىندارىنىڭ قاۋىپسىزدىگىنە كەپىل بولا الاتىن ول – ءدال وسى پوليسيا قىزمەتى ەكەنى بەلگىلى. سىزدەر قوعامدا تۇراقتىلىقتى قامتاماسىز ەتۋشى قورعاۋشى سانالاسىزدار. ال، ءبىز ءوز تاراپىمىزدان قالانىڭ قۇقىق قورعاۋ ورگانىن ودان ءارى جەتىلدىرە تۇسۋگە كۇش جۇمساپ، پوليسيا قىزمەتىن مۇقيات سارالاي وتىرىپ، تۇرعىنداردىڭ سەنىمىن ەسەلەي تۇسەمىز.
مۇنداي قايعىلى جاعدايدى كەلەسىدە بولدىرماس ءۇشىن پوليسيا قىزمەتىن جانداندىرىپ، زاماناۋي تەحنيكامەن جابدىقتاۋ كەرەك ەكەنىن قالاعا جاسالعان شابۋىل ايقىنداپ بەردى.
قازا تاپقان پوليسەيلەردىڭ وتباسىنا كومەك كورسەتىلدى، ءقازىر بۇلىنگەن عيماراتتار جوندەلىپ، قايتا قالپىنا كەلتىرۋ جۇمىستارى ءجۇرىپ جاتىر. ءبىز ءبارىمىز قالانىڭ تىنىشتىعى ءۇشىن تىك تۇرىپ، ايانباي ەڭبەك ەتە الاتىنىمىزعا سەنىم بىلدىرگىم كەلەدى. ءبىز سىزدەرگە قالانىڭ ەڭ باستى بايلىعى – الماتى تۇرعىندارىنىڭ اماندىعى مەن دەنساۋلىعىن سەنىپ تاپسىرامىز.
وسىنداي قيىن دا جاۋاپتى قىزمەتتە جۇرگەن سىزدەرگە زور دەنساۋلىق، كاسىبي تۇرعىدا تابىس، وتباسىلارىڭىزعا تىنىشتىق پەن بەرەكە-بىرلىك تىلەيمىن.
قىزمەتىڭىز ءۇشىن راحمەت!»،-دەدى ەربولات دوسايەۆ.
اكىمگە جەدەل باسقارۋ ورتالىعى، ونىڭ ىشىندە بۇكىل قالا بويىنشا ورناتىلعان 10 مىڭنان استام بەينەكامەراعا قوسىلعان بەينەباقىلاۋ جۇيەسى كورسەتىلدى.
كەزدەسۋ سوڭىندا ەربولات دوسايەۆ پوليسەيلەرگە جۇمىستارىنا تابىس تىلەدى، ولاردىڭ قاۋىپسىزدىكتى قامتاماسىز ەتۋدەگى ماڭىزدى ءرولىن جانە قىزمەتتەرىنە حالىقتىڭ سەنىمىن ۇنەمى ارتتىرۋ قاجەتتىگىن اتاپ ءوتتى.