شانحايدا الماتى اكىمى ەربولات دوسايەۆ پەن China Eastern Airlines Co.، Ltd. ءتوراعاسى ۆان چجيسين كەزدەسءتى. كەلىسسوز ناتيجەسىندە الماتى مەن شانحاي اراسىندا تىكەلەي اۋە رەيسىن اشۋعا جاردەمدەسۋ تۋرالى مەموراندۋمعا قول قويىلدى، دەپ حابارلايدى aqshamnews.kz
China Eastern Airlines – شتاب-پاتەرى شانحايدا ورنالاسقان قىتايدىڭ مەملەكەتتىك اۋە كومپانياسى. ول قىتايدىڭ ءۇش ءىرى اۋە تاسىمالداۋشىسىنىڭ ءبىرى جانە SkyTeam عالامدىق اۆياسيالىق اليانسىنىڭ مۇشەسى. كومپانيانىڭ اۋە پاركى شامامەن 780 ۇشاقتان تۇرادى، ال باعىتتار جەلىسى 175 ەلدەگى 1 150-دەن استام باعىتتى قامتيدى.
كەزدەسۋ بارىسىندا الماتى مەن شانحاي اراسىنداعى تىكەلەي رەيستى ىسكە قوسۋ مۇمكىندىگى تالقىلاندى. بۇل رەيس الماتىنى ازيانىڭ جەتەكشى ىسكەرلىك جانە تۋريستىك ورتالىعىنىڭ ءبىرى – شانحايمەن بايلانىستىرادى. ءقازىر قىتايدىڭ ۇلتتىق ازاماتتىق اۆياسيا قىزمەتىمەن قاجەتتى كەلىسىمدەر بويىنشا بەلسەندى جۇمىس جۇرگىزىلۋدە. كەزدەسۋ اياسىندا ەربولات دوسايەۆ الماتى مەن شانحاي اراسىنداعى باۋىرلاس قالالار رەتىندە ارىپتەستىك قاتىناستىڭ نىعايىپ كەلە جاتقانىن اتادى. 2024 جىلدان باستاپ قالالار ءتۇرلى سالادا بەلسەندى ىنتىماقتاستىق ورناتۋدا. 2025 جىلدىڭ قازاقستانداعى جۇڭگو ءتۋريزمى جىلى دەپ جاريالانۋى قوس تاراپ ءۇشىن جاڭا بىرلەسكەن باستامالار مەن ءتۋريزمدى دامىتۋعا قوسىمشا مۇمكىندىكتەر اشادى.
جۇڭگو الماتى ءۇشىن باسىم نارىقتىڭ ءبىرى بولىپ قالا بەرەدى. 2024 جىلى الماتىعا قىتايدان شامامەن 100 مىڭ تۋريست كەلدى، ال الداعى جىلدارى بۇل كورسەتكىش ارتادى دەپ كۇتىلۋدە. قازىرگى ۋاقىتتا الماتى بەيجىڭ، ءۇرىمجى، سيان، حانچجوۋ جانە سانيا قالالارىمەن تىكەلەي اۋە رەيستەرىمەن بايلانىسقان، ايىنا 151 رەيس ورىندالۋدا. قىتايلىق Tongcheng Travel اگەنتتىگىنىڭ الماتىنى «2025 جىلدىڭ بولاشاعى زور جاڭا باعىتى» دەپ تانۋى دا ءوسىپ كەلە جاتقان تۋريستىك قىزىعۋشىلىقتىڭ دالەلى بولىپ تابىلادى.