الماتى اكىمى دارحان ساتىبالدى جۇمىس ساپارى اياسىندا قازاقستان رەسپۋبليكاسى اتوم ەنەرگياسى جونىندەگى اگەنتتىگىنىڭ يادرولىق فيزيكا ينستيتۋتىنا باردى، دەپ حابارلايدى aqshamnews.kz
بۇل اتوم ەنەرگياسىن بەيبىت ماقساتتا پايدالانۋ سالاسىندا عىلىمي-زەرتتەۋ جانە تاجىريبەلىك-كونسترۋكتورلىق قىزمەتتىڭ تولىق سيكلى بار ەلدەگى جالعىز عىلىمي ۇيىم. مۇندا ىرگەلى جانە قولدانبالى زەرتتەۋلەر جۇرگىزىلەدى، جاڭا تەحنولوگيا ازىرلەنەدى، ءوندىرىس جۇمىس ىستەيدى جانە اتوم سالاسىنا ماماندار دايارلانادى.
قالا باسشىسى زاماناۋي زەرتحانالاردىڭ جانە تاجىريبەلىك قوندىرعىلاردىڭ جۇمىسىمەن تانىستى. ولاردىڭ اراسىندا ۆۆر-ك زەرتتەۋ رەاكتورى، راديوحيميا جانە يزوتوپتار ءوندىرىسى جونىندەگى عىلىمي-تەحنيكالىق ورتالىق بار. ينستيتۋتتا ونكولوگيالىق اۋرۋلاردى دياگنوستيكالاۋ مەن ەمدەۋگە ارنالعان راديوفارمپرەپاراتتار شىعارىلادى. بۇگىندە قازاقستانداعى راديوفارماسيەۆتيكالىق ءونىمنىڭ شامامەن 85%-ىن وسى ينستيتۋت وندىرەدى. پرەپاراتتار الماتى، استانا، شىمكەنت، سەمەي مەديسينالىق ۇيىمدارىنا جەتكىزىلەدى، سونداي-اق ونەركاسىپتىك راديويزوتوپتار رەسەي، گەرمانيا، اقش جانە فرانسياعا ەكسپورتتالادى.
ينستيتۋت بازاسىندا ماگاتە مەن اقش ەنەرگەتيكا مينيسترلىگىنىڭ قولداۋىمەن اشىلعان ءۇش وقۋ ورتالىعى جۇمىس ىستەيدى. وسى ۋاقىت ىشىندە مۇندا شامامەن 5000 مامان دايارلاندى. ينستيتۋت 30-دان استام حالىقارالىق عىلىمي قۇرىلىمدار جانە ۋنيۆەرسيتەتتەرمەن سەرىكتەستىك ورناتقان، ال 2023 جىلى CERN عىلىمي كوللابوراسياسىنا قوسىلدى.
اكىم يادرولىق فيزيكا ينستيتۋتىنىڭ مامان دايارلاۋ، عىلىمي الەۋەتتى دامىتۋ جانە حالىقارالىق سەرىكتەستىكتى كەڭەيتۋ باعىتىنداعى ءرولىن اتاپ ءوتتى. ول عىلىمنىڭ قالانىڭ وزەكتى مىندەتتەرىن شەشۋگە ينتەگراسيالانۋى اسا ماڭىزدى ەكەنىن ايتتى. عىلىمي ۇيىمدار، جوعارى وقۋ ورىندارى جانە قالالىق قىزمەتتەردىڭ ءوزارا ءىس-قيمىلى جۇيەلى بولۋعا ءتيىس.
دارحان ساتىبالدى مەملەكەت باسشىسى قاسىم-جومارت توقايەۆتىڭ جەرگىلىكتى اتقارۋشى ورگانداردىڭ ءبىلىم بەرۋ جانە زەرتتەۋ ورتالىقتارىمەن تىعىز ىنتىماقتاستىعىن قامتاماسىز ەتۋ تۋرالى تاپسىرماسىن ەسكە سالدى. وسىعان بايلانىستى اكىم ينستيتۋتقا قالالىق ينفراقۇرىلىمعا ارنالعان شەشىمدەر مەن يننوۆاسيالىق تەحنولوگيانى ەنگىزۋدى قامتيتىن بىرلەسكەن جوبالار بويىنشا ناقتى ۇسىنىستار ۇسىنۋدى تاپسىردى.