الماتى قالاسىنىڭ اكىمى دارحان ساتىبالدى جۇڭگو حالىق رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى حان چۋنلين مىرزامەن كەزدەستى. باسقوسۋ بارىسىندا وزەكتى ماسەلەلەر مەن ەكىجاقتى ىنتىماقتاستىقتى ودان ءارى دامىتۋ مۇمكىندىىتەپى تالقىلاندى. سونىمەن قاتار كەزدەسۋگە قحر-دىڭ الماتىداعى باس كونسۋلى سزيان ۆەي دە قاتىستى.
دارحان ساتىبالدى الماتى مەن جۇڭگو اراسىنداعى ءوزارا ءتيىمدى ارىپتەستىكتى نىعايتۋدىڭ ماڭىزىن اتاپ، اسىرەسە ساۋدا، ونەركاسىپ جانە ينۆەستيسيا سىندى باسىم سالالارداعى سەرىكتەستىككە توقتالدى.
«دوستىق قارىم-قاتىناسىمىزدىڭ ارقاسىندا الماتى مەن جۇڭگو اراسىنداعى تاۋار اينالىمى ءداستۇرلى تۇردە جوعارى دەڭگەيدە ساقتالىپ كەلەدى. قىتايدىڭ ۇلەسىنە الماتىنىڭ جالپى سىرتقى ساۋدا اينالىمىنىڭ 32،9%-ى تيەسىلى. بيىل قاڭتار–مامىر ايلارى ارالىعىندا قالا مەن قحر اراسىنداعى تاۋار اينالىمى 3،4 ملرد اقش دوللارىنان استى»، — دەدى اكىم.
كەزدەسۋدە ونەركاسىپتىك كووپەراسيا جايىنا دە ەرەكشە نازار اۋدارىلدى. قالا باسشىسى الماتىدا اۆتوموبيل كلاستەرىن قۇرۋ باعىتىندا بەلسەندى جۇمىس جۇرگىزىلىپ جاتقانىن، ونىڭ مەگاپوليستىڭ يندۋستريالىق ءوسىمىنىڭ نەگىزگى قوزعاۋشى كۇشتەرىنىڭ بىرىنە اينالىپ كەلە جاتقانىن ايتتى.
«بۇگىندە الماتىنىڭ يندۋستريالىق ايماعىندا قىتايلىق سەرىكتەستەردىڭ قاتىسۋىمەن اۋقىمدى جوبا جۇزەگە اسىرىلىپ وتىر. Changan، Chery جانە Haval ماركالارىنداعى كوپبرەندتى اۆتوزاۋىت ىسكە قوسىلماق. كاسىپورىن جىلىنا 90 مىڭ جەڭىل اۆتوكولىك شىعارا الادى. 2028 جىلعا قاراي ءوندىرىس كولەمىن جىلىنا 220 مىڭ اۆتوكولىككە دەيىن ۇلعايتۋ جوسپارلانىپ وتىر»، — دەدى شاھار باسشىسى.
سونىمەن قاتار اكىم تۋريستىك جانە كولىك بايلانىستارىن كەڭەيتۋدىڭ ماڭىزدى ەكەنىن اتاپ ءوتتى. قازىرگى تاڭدا الماتى بەيجىڭ، ءۇرىمجى، سيان، حانچجوۋ، سانيا، گۋانچجوۋ جانە ينين سەكىلدى قىتايدىڭ ءىرى قالالارىمەن تىكەلەي اۋە رەيستەرى ارقىلى بايلانىسقان. جۋىردا China Eastern Airlines اۋە كومپانياسىنىڭ شانحاي – الماتى باعىتىنداعى جاڭا رەيسى اشىلدى.
ءوز كەزەگىندە جۇڭگو حالىق رەسپۋبليكاسىنىڭ توتەنشە جانە وكىلەتتى ەلشىسى حان چۋنلين مىرزا ەكىجاقتى ىنتىماقتاستىقتى ودان ءارى كەڭەيتۋگە مۇددەلى ەكەنىن ءبىلدىرىپ، الماتى مەن جۇڭگو قالالارى اراسىنداعى سەرىكتەستىكتىڭ جوعارى الەۋەتىن اتاپ ءوتتى.
«مەملەكەتتەرىمىزدىڭ كوشباسشىلارىنىڭ ستراتەگيالىق باسشىلىعى اياسىندا ىسكەرلىك ىنتىماقتاستىق تۇراقتى وڭ قارقىن كورسەتىپ وتىر. بىلتىر ەلدەرىمىز اراسىنداعى تاۋار اينالىمى 43،8 ميلليارد اقش دوللارىنا جەتىپ، الدىڭعى جىلمەن سالىستىرعاندا 6،8% ارتتى. جالپى العاندا، ءبىز قازاقستانمەن ساۋدا، ينۆەستيسيا، تۋريزم، مادەنيەت جانە دەنساۋلىق ساقتاۋ سالالارىنداعى ارىپتەستىكتى ودان ءارى نىعايتۋعا دايىنبىز»، — دەدى ەلشى.
كەزدەسۋ قورىتىندىسى بويىنشا تاراپتار ەكونوميكالىق جانە گۋمانيتارلىق بايلانىستى ودان ءارى دامىتۋعا باعىتتالعان ورتاق باستامالاردى ىسكە اسىرۋعا ءوزارا دايىن ەكەنىن راستادى.