اكىم ەڭ اۋەلى توزىعى جەتكەن تۇرعىن ۇيلەردى جاڭارتۋ باعدارلاماسىنىڭ جۇزەگە اسۋ بارىسىن كوردى. 2025 جىلى مامىرداعى جاعداي بويىنشا اۋداندا 75 ەسكى ءۇي (821 پاتەر، 127 پاتەر يەسى جاڭا باسپاناعا كوشىرىلگەن) بار. بۇل ۇيلەر جاندوسوۆ، تۇنتىبايەۆ، تالدىقورعان، پياتنيسكيي، توقتابايەۆ، چەرەپانوۆ، رىسقۇلبەكوۆ جانە سۇلەيمەنوۆ كوشەلەرىندە ورنالاسقان. جاڭعىرتۋ جۇمىستارى سەگىز كەزەڭمەن جۇرگىزىلىپ جاتىر، ونىڭ العاشقىسى 2023 جىلى اياقتالعان.
بۇدان كەيىن اكىم مامىر-4 شاعىناۋدانىنداعى كارىز جانە سۋ قۇبىرى جەلىلەرىنىڭ قۇرىلىسىنا ات باسىن بۇردى. مۇندا اۋداندىق ماڭىزى بار ءبىر كوشە – م.كارىم كوشەسى جانە 14 وتپە جول بار. جوبا اياسىندا مومىش ۇلى، ساين كوشەلەرى مەن اباي داڭعىلىنا ينجەنەرلىك جەلىلەر تارتۋ قاراستىرىلعان. قۇرىلىسقا دەيىن بۇل اۋماقتاعى ينجەنەرلىك ينفراقۇرىلىمنىڭ توزۋى 90%-عا جەتكەن بولاتىن.
2024 جىلى تامىزدا باستالعان جوبا اياسىندا بارلىعى 12،3 شاقىرىم ينجەنەرلىك جەلى تارتۋ كوزدەلگەن. قازىرگى ۋاقىتتا 3،5 شاقىرىم كارىز جانە 3 شاقىرىم سۋ جەلىسى سالىندى.
ساپار بارىسىندا دارحان ساتىبالدى اقساي-1 شاعىناۋدانىنا دا باردى. اقساي-1، 1ا، 3، 3ا جانە 3ب شاعىناۋدانداردا شامامەن 36 مىڭ ادام ءومىر سۇرەدى. الايدا مۇندا زاماناۋي سپورتتىق نىساندار، اسىرەسە باسسەين تاپشى. سونداي-اق، 1–1،5 شاقىرىم جەردەگى ساياباق پەن دەمالىس ورىندارىنىڭ بولماۋى تۇرعىنداردىڭ بەلسەندى ءومىر سالتىن ۇستانۋىنا ىڭعايسىزدىق تۋدىرىپ وتىر.
وسىعان بايلانىستى، ءتورت جەر تەلىمىن مەملەكەت مۇقتاجىنا الىپ، ىڭعايلى ساياباق ايماعى بار دەنە شىنىقتىرۋ-ساۋىقتىرۋ كەشەنىن سالۋ مۇمكىندىگى قاراستىرىلىپ وتىر. اتالعان جەر جالعا بەرىلگەن، ونىڭ ۇشەۋىنىڭ جالداۋ مەرزىمى اياقتالعان.
شاھار باسشىسى تولە بي كوشەسىن قالا شەكاراسىنا دەيىن ۇزارتۋ جوباسىنىڭ جۇزەگە اسۋىن دا تەكسەردى. جوبا ەكى ۋچاسكەدەن تۇرادى. ءبىرىنشىسى ياسساۋي كوشەسىنەن ءاشىموۆ كوشەسىنە دەيىنگى ارالىق. مۇندا ينجەنەرلىك جەلىلەردى قايتا سالۋ جانە جول توسەمىن دايىنداۋ جۇمىستارى ءجۇرىپ جاتىر. ەكىنشىسى ءاشىموۆ كوشەسىنەن قالا شەكاراسىنا دەيىنگى بولىك. بۇل اۋماقتا دا جەر جۇمىستارى مەن كوممۋنيكاسيانى كوشىرۋ قولعا الىنعان.
كەلىسىمشارتقا سايكەس، قوس ۋچاسكەدەگى قۇرىلىستى 2025 جىلدىڭ جەلتوقسان ايىنا دەيىن اياقتاۋ جوسپارلانعان.
بۇعان قوسا، قالا اكىمى اقساي-4 شاعىناۋدانىنداعى جاڭارتىلىپ جاتقان سكۆەردىڭ جاي-كۇيىن كورىپ، تۇرعىندارمەن كەزدەستى. جوبا اياسىندا 45 جارىق باعانى، 26 بەينەباقىلاۋ كامەراسى، 4،6 مىڭ شارشى مەتر كەسپە تاس، 46 ورىندىق پەن قوقىس جاشىگىن ورناتۋ، 245 اعاش پەن 200-دەن استام بۇتا ەگۋ، اۆتوماتتاندىرىلعان سۋارۋ جۇيەسىن قۇرۋ، زاماناۋي بالالار جانە سپورت الاڭدارى مەن قۇرعاق سۋبۇرقاق سالۋ قاراستىرىلعان. سونداي-اق، مۇمكىندىگى شەكتەۋلى جاندارعا ارناپ كەدەرگىسىز ورتا جاسالماق.
ساپار سوڭىندا دارحان ساتىبالدى تۇرعىن ءۇي قورىن جاڭارتۋ باعدارلاماسى اياسىندا ينجەنەرلىك جەلىلەر مەن جولعا تۇسەتىن جۇكتەمەنى ەسەپتەۋدى، مامىر-4 شاعىناۋدانىندا باستالعان جۇمىستى قىركۇيەككە دەيىن ءبىتىرۋدى جۇكتەدى. سونىمەن قاتار، دسك سالۋعا نيەتتى جەكە ينۆەستور تابىلسا، بۇل مۇمكىندىكتى دە قاراستىرۋعا دايىن ەكەنىن جەتكىزدى.
تولە بي كوشەسىن ۇزارتۋعا ارنالعان جەر تەلىمدەرىن تەز ارادا ساتىپ الىپ، اقساي-4 سكۆەرىن كوركەيتىپ، بارشاعا قولجەتىمدى ورتا قالىپتاستىرۋدى مىندەتتەدى.