الماتى اكىمى ەربولات دوسايەۆتىڭ حالىقپەن العاشقى كەزدەسۋى بوستاندىق اۋدانىندا ءوتتى. ءىس-شاراعا اۋداننىڭ 700-دەن استام تۇرعىنى كەلدى دەپ حابارلايدى اlmaty-akshamy.kz.
«مەن ءبىرىنشى كەزدەسۋدى بوستاندىق اۋدانىندا وتكىزۋدى ۇيعاردىم، ويتكەنى بۇل ءبىزدىڭ قالامىزدىڭ ەڭ ءىرى اۋدانى، وندا 365 مىڭ ادام نەمەسە الماتى حالقىنىڭ 18%-ى تۇرادى»، – دەدى قالا باسشىسى ءوزىنىڭ سوزىندە.
الماتى اكىمىنىڭ اقپاراتى بويىنشا، بوستاندىق اۋدانى الەۋمەتتىك-ەكونوميكالىق كورسەتكىشتەر بويىنشا قالانىڭ 19،7% جۇمىسپەن قامتىلۋىن قامتاماسىز ەتەدى. اۋدان بيۋدجەتكە سالىق تۇسىمدەرىنىڭ 24% قامتاماسىز ەتەدى، ينۆەستيسيالار تارتۋ بويىنشا I ورىن الادى (اعىمداعى جىلدىڭ قاڭتار-اقپان ايلارىندا ينۆەستيسيالار كولەمى 13،2%-عا ءوستى جانە 42،2 ملرد تەڭگەنى قۇرادى). تۇرعىنداردىڭ نەگىزگى بولىگى شوب سالاسىندا جۇمىس ىستەيدى – بۇل جۇمىسپەن قامتىلعان حالىقتىڭ 66،5%-ى. اعىمداعى جىلى اۋداندا 7 مىڭنان استام جاڭا جۇمىس ورنىن قۇرۋ جوسپارلانۋدا.
حالىقپەن كەزدەسۋ بارىسىندا ەربولات دوسايەۆ ەكونوميكالىق كورسەتكىشتەردىڭ ايتارلىقتاي جوعارى بولۋىنا قاراماستان، اۋداندا تۇرعىن ءۇي قۇرىلىسى، الەۋمەتتىك ينفراقۇرىلىم، قوعامدىق كەڭىستىكتەر، اباتتاندىرۋ، الەۋمەتتىك قولداۋ جانە ت.ب. بويىنشا جيناقتالعان ماسەلەلەردىڭ شەشىلمەگەن كۇيىندە قالىپ وتىرعانىن، ولاردى شەشۋ كەشەندى جانە جۇيەلى ءتاسىلدى تالاپ ەتەتىنىن اتاپ ءوتتى.
الەۋمەتتىك نىسانداردىڭ جەتىسپەۋشىلىگى ماسەلەسىن شەشۋ، ونىڭ ىشىندە مەكتەپتەردەگى ورىن تاپشىلىعىن تومەندەتۋ ءۇشىن قوسىمشا قۇرىلىس سالۋ تاجىريبەسى جالعاساتىن بولادى، جاڭا مەكتەپتەر سالۋ ءۇشىن اكىمدىك عيماراتتار مەن جەر ۋچاسكەلەرىن جەكە مەنشىك يەلەرىنەن ساتىپ الۋدى جوسپارلاپ وتىر.
حالىققا ساپالى مەديسينالىق قىزمەت كورسەتۋدى قامتاماسىز ەتۋ ماقساتىندا ال-فارابيدەن جوعارى جەر ۋچاسكەسىن ەمحانا قۇرىلىسىنا جەكە مەنشىك يەلەرىنەن ساتىپ الۋ جونىندە كەلىسسوزدەر جۇرگىزىلۋدە. سونداي-اق، جىل سوڭىنا دەيىن «بالالارعا شۇعىل مەديسينالىق كومەك كورسەتۋ ورتالىعىنىڭ» جاڭا كورپۋسىنىڭ قۇرىلىسى اياقتالادى، وندا زاماناۋي قابىلداۋ بولمەسى، رەانيماسيا، وپەراسيالىق جانە نەيروحيرۋرگيالىق بولىمشەلەر مەن تولىق مەديسينالىق جاراقتاندىرىلعان كلينيكالىق زەرتحانا ورنالاستىرىلادى.
جۇمىس ىستەيتىن مۇگەدەكتەردى قولداۋ ءۇشىن اعىمداعى جىلدىڭ باسىنان بەرى الەۋمەتتىك جۇمىس ورىندارىن سۋبسيديالاۋ مولشەرى 63 مىڭنان 92 مىڭ تەڭگەگە ارتتى، بۇل ماقساتقا 405 ملن تەڭگە (980 ورىن) ءبولىندى. مۇمكىندىگى شەكتەۋلى جاندار ءۇشىن الەۋمەتتىك ينفراقۇرىلىم نىساندارىنىڭ قولجەتىمدىلىگى ماسەلەلەرىن شەشۋ بويىنشا 72 نىساندى بەيىمدەۋ جوسپارلانعان.
بۇگىندە بوستاندىق اۋدانىندا «مەگا سەنتر»، «ادك» ساۋدا ورتالىقتارىنىڭ جانىندا، بۇرىنعى جەمىس-كونسەرۆى كومبيناتىنىڭ اۋدانىندا، سونداي-اق ساتپايەۆ-بايتۇرسىنوۆ-بۇقار جىراۋ-ەسەنتاي وزەنىنىڭ اۋماعىندا تۇرعىن ءۇي قۇرىلىسى ەرەكشە قارقىندى جۇرگىزىلۋدە. وسىعان بايلانىستى الەۋمەتتىك ينفراقۇرىلىم وبەكتىلەرىن مىندەتتى سالۋ جونىندەگى تالاپتاردى ەسكەرە وتىرىپ، اۋماقتاردا قۇرىلىس سالۋ تاسىلدەرى قايتا قارالدى.
اعىمداعى جىلى جايلىلىقتى دامىتۋ جانە «حالىقتىڭ بيۋدجەتكە قاتىسۋى» جوباسى اياسىندا قالانىڭ اباتتاندىرىلۋىن جاقسارتۋ ءۇشىن بوستاندىق اۋدانىن قارجىلاندىرۋ كولەمى 58%-عا 766 ملن تەڭگەگە دەيىن ۇلعايتىلدى (2021 جىلى 483،8 ملن.تەڭگە). بالالار جانە سپورت الاڭدارىن، بۋلۆارلاردى، №10 مەكتەپتى، تيميريازيەۆ كوشەسىندەگى جاياۋ جۇرگىنشىلەر ايماعىن، جاسىل ايماقتارعا ارنالعان سۋارۋ سۋ قۇبىرلارىن اعىمداعى جوندەۋ جوسپارلانۋدا. 80 اۋلا اۋماعىنا كۇردەلى جوندەۋ جۇرگىزىلەدى.
تۇرعىندار «يۋجنىي» ساياباعىن قالا مەنشىگىنە قايتارۋ، قالا ىشىندەگى باۋ-باقشا سەرىكتەستىكتەرىنىڭ اۋماقتارىن قالالىق اۋماقتار ساناتىنا اۋىستىرۋ، شىعارماشىلىق ۇيىرمەلەر مەن سپورت سەكسيالارىن جان باسىنا قارجىلاندىرۋ جانە ت. ب. ماسەلەلەردى كوتەردى.
تۇرعىندارمەن كەزدەسۋ 3 ساعاتقا سوزىلدى. قالا باسشىسى تۇرعىنداردىڭ 200-دەن استام وزەكتى سۇراقتارىنا جاۋاپ بەردى. كەزدەسۋ قورىتىندىسى بويىنشا ناقتى تاپسىرمالار بەرىلدى، مەرزىمدەر مەن جاۋاپتى بولىمشەلەر بەلگىلەندى.
مەملەكەت باسشىسى قاسىم-جومارت توقايەۆتىڭ جارلىعىمەن بەكىتىلگەن حالىقپەن كەزدەسۋلەردىڭ جاڭا فورماتىنا سايكەس، جىل سوڭىنا دەيىن ەربولات دوسايەۆ حالىقپەن 24 كەزدەسۋ – ياعني، توقسان سايىن 8 اۋداننىڭ تۇرعىندارىمەن ءبىر كەزدەسۋدەن وتكىزەدى.