الماتى اكىمى دارحان ساتىبالدى سۋ تازارتۋ سالاسىندا يننوۆاسيالىق شەشىمدەرىمەن تانىمال بولعان امەريكالىق World Water Works كومپانياسىنىڭ باسشىلارىمەن جۇزدەستى.
كەزدەسۋگە ق ر ءسىم ينۆەستيسيالار كوميتەتى ءتوراعاسىنىڭ ورىنباسارى سۇلتانعالي كينجاقۇلوۆ، «KAZAKH INVEST» ۇك» اق باسقارما ءتوراعاسىنىڭ مىندەتىن اتقارۋشى ايبول ارعىنعازينوۆ جانە World Water Works كومپانياسىنىڭ پرەزيدەنتى امارەش كونامانەني قاتىستى.
تاراپتار الماتىدا كارىز-تازارتۋ نىسانىن جاڭعىرتۋ بويىنشا بىرلەسكەن جوبانى تالقىلادى. قازاقستان تاراپىنان مەگاپوليستىڭ سۋ بۇرۋ جۇيەسىن جەتىلدىرۋگە باعىتتالعان جوسپارىن ءبولىستى. ال World Water Works وكىلدەرى اقش، ەۋروپا جانە ازياداعى اعىن سۋلاردى تازارتۋدىڭ وزىق تەحنولوگياسىن تانىستىردى.
«الماتى ءۇشىن تازارتۋ قۇرىلىستارىن جاڭعىرتۋ جانە سۋ بۇرۋ جۇيەسىنىڭ تيىمدىلىگىن ارتتىرۋ – باستى باسىمدىقتاردىڭ ءبىرى. بۇل جوبالار ەكولوگياعا، الماتىلىقتاردىڭ ءومىر ءسۇرۋ ساپاسىنا جانە قالانىڭ دامۋىنا تىكەلەي قاتىستى. ءبىز World Water Works كومپانياسىمەن سەرىكتەس بولا وتىرىپ، ۇلكەن مۇمكىندىككە قول جەتكىزەمىز. زاماناۋي تەحنولوگيا ەنگىزۋ ارقىلى اعىن سۋلاردى تازارتۋ دەڭگەيىن ەداۋىر ارتتىرا الامىز»، – دەدى دارحان ساتىبالدى.
سۇلتانعالي كينجاقۇلوۆ مەملەكەت جوبانى جۇزەگە اسىرۋعا جان-جاقتى قولداۋ كورسەتەتىنىن اتاپ ءوتتى. ونىڭ ايتۋىنشا، ەكولوگيا، ينفراقۇرىلىم جانە سۋمەن قامتۋ سالاسىنا شەتەلدىك ينۆەستورلاردى تارتۋ – ەل ءۇشىن باستى مىندەتتىڭ ءبىرى. قازاقستان بيزنەستىڭ ۇزاق مەرزىمدى جۇمىس ىستەۋى ءۇشىن جاعداي جاساپ، بارلىق كەزەڭدە قولداۋ كورسەتىپ كەلەدى.
ءوز كەزەگىندە World Water Works كومپانياسىنىڭ پرەزيدەنتى امارەش كونامانەني ۇيىمنىڭ اقش، كانادا، مەكسيكا، وڭتۇستىك-شىعىس ازيا مەن تاياۋ شىعىستا جوبالاردى ءساتتى جۇرگىزىپ جاتقانىن ايتتى. ەندى ولار ورتالىق ازيا نارىعىنا قادام باسپاق. سونداي-اق، ول World Water Works استانادا جۇمىس باستاپ كەتكەنىن جانە الماتىنى جاڭا جوبالارعا سەرپىندى باعىت رەتىندە قاراستىرىپ وتىرعانىن جەتكىزدى.
كەزدەسۋ سوڭىندا تاراپتار بىرلەسكەن جوبانى ەگجەي-تەگجەيىن تالقىلاۋدى جالعاستىرىپ، مەملەكەتتىك-جەكەمەنشىك ارىپتەستىك اياسىندا سەرىكتەستىكتى تەرەڭدەتۋگە نيەت ءبىلدىردى.