الماتى – الەم المالارىنىڭ وتانى
قازاقستان حالقىنىڭ بىرلىگى كۇنى قارساڭىندا الماتى اكىمى Alma Qala ەكولوگيالىق اكسياسىنا قاتىستى، ونىڭ اياسىندا تۇركسىب اۋدانىنىڭ تۇرعىندارى، كاسىپكەرلەر مەن قوعام قايراتكەرلەرى «بالالار» ساياباعىندا 450 اعاش وتىرعىزدى، دەپ حابارلايدى Almaty-akshamy.kz.
وتىرعىزىلعان اعاشتاردىڭ ىشىندە-تۇرلى سۇرىپتاعى 370 الما اعاشى، سونىڭ ىشىندە «سيۆەرس»، «اپورت»، «زولوتوە پرەكراسنوە» بولدى. «سيۆەرس» سورتى قازىرگى زامانعى الما سورتتارىنىڭ نەگىزىن قالاۋشى بولىپ سانالادى. ولار قۇرعاقشىلىققا جانە سۋىققا ءتوزىمدى. سونىمەن قاتار، ساياباق قايىڭدارمەن، جاپىراقتى جانە قىلقان جاپىراقتى كوشەتتەرمەن تولىقتىرىلدى.
ەكولوگيالىق بەلسەندىلەردىڭ ايتۋىنشا، قالانىڭ ساياباقتارى مەن گۇلزارلارىن كوگالداندىرۋ الماتى قالاسىنا جاسىل قالا مارتەبەسىن قايتارۋعا باعىتتالعان.
«مەن ەكولوگيالىق ۆولونتەرلىك قوزعالىستاردىڭ قىزمەتىنە ۇنەمى ۇلكەن قۇرمەتپەن قارايمىن، ولاردىڭ ماقساتى - قورشاعان ورتانى جايلى جانە ساۋ ەتۋ. بۇگىن وسى قوعامداستىقتىڭ ءبىر مۇشەسىنە اينالعانىما قۋانىشتىمىن»، - دەدى ەربولات دوسايەۆ.
سونداي-اق، ول ەكولوگيالىق اكسياعا قاتىسۋشىلاردى كەلە جاتقان مەرەكەلەرىمەن قۇتتىقتاپ، ولاردىڭ يگى ميسسيالارىنا تابىس تىلەدى.
Alma Qala قوعامدىق باستاماسى «الماتى – الەم المالارىنىڭ وتانى» ۇرانىمەن 2014 جىلدان بەرى جۇمىس ىستەيدى. ۆولونتەرلەر الماتىدان وزگە ەلىمىزدىڭ ءىرى قالالارى - نۇر-سۇلتان مەن شىمكەنتتە «سيۆەرس» سورتىنىڭ الما اعاشتارىن وتىرعىزۋمەن اينالىسادى. باستاما قولعا الىنعالى بەرى تەك الماتىنىڭ وزىندە عانا بەلسەندىلەر 100 مىڭعا جۋىق اعاش وتىرعىزدى. جىل باسىنان بەرى الماتىنىڭ تۇركسىب اۋدانىندا 2 مىڭ كوشەت، ونىڭ 850ء-ى الما اعاشتارى وتىرعىزىلدى.