الماتى اكىمى دارحان ساتىبالدى جۇمىس ساپارى اياسىندا الاتاۋ اۋدانىنىڭ راحات-مادەنيەت جانە العاباس شاعىناۋداندارىنا بارىپ، تۇرعىندارمەن كەزدەسىپ، ينجەنەرلىك جانە جول ينفراقۇرىلىمى ماسەلەلەرىن تالقىلادى.
راحات-مادەنيەت شاعىناۋدانىندا الاتاۋ اۋدانى اكىمى اپپاراتىنىڭ تاپسىرىسىمەن «ساپا قۇرىلىس 2007» ج ش س مەردىگەر ۇيىمى قۇرىلىس-مونتاج جۇمىستارىن جۇرگىزۋدە. جوبا اياسىندا جالپى ۇزىندىعى 131 شاقىرىم ينجەنەرلىك جەلى سالۋ قاراستىرىلعان، ونىڭ ىشىندە 69 شاقىرىم سۋ قۇبىرى جانە 61 شاقىرىم كارىز جەلىسى. بۇگىنگى كۇنى 101 شاقىرىم (53،7 شاقىرىم سۋ قۇبىرى جانە 47 شاقىرىم كارىز جەلىسى) تارتىلدى. جۇمىستاردى 2025 جىلدىڭ قاراشاسىندا اياقتاۋ جوسپارلانعان.
سونىمەن قاتار، ەنەرگەتيكا جانە سۋمەن جابدىقتاۋ باسقارماسى شاعىناۋداندى تۇراقتى ەلەكتر قۋاتىمەن قامتاماسىز ەتۋ جوباسىن جۇزەگە اسىرۋدا. قازىرگى ۋاقىتتا 13 ترانسفورماتورلىق قوسالقى ستانسا مەن 1 قوسالقى تاراتۋ ستانساسى ورناتىلۋدا. بيىلعى جىلى 5 قوسالقى ستانسا ىسكە قوسىلادى. ناتيجەسىندە ورتالىق جەلىلەرگە 2 882 ابونەنت قوسىلىپ، شامامەن 14 مىڭ تۇرعىن ساپالى ەلەكتر قۋاتىمەن قامتىلادى.
اكىم بارلىق جۇمىستاردى جەدەلدەتۋدى، سونداي-اق باستى كوشەلەر مەن مەكتەپ ماڭىنا ۋاقىتشا اسفالت توسەۋدى تاپسىردى. تولىق اسفالتتاۋ كەلەسى جىلعا جوسپارلانعان. سونداي-اق تار كوشەلەردە ءبىرجاقتى قوزعالىس ەنگىزۋ، 5 اۆتوبۋس ايالداماسىن ورناتۋ جانە جول قۇرىلىسى اياقتالعاننان كەيىن جاڭا قوعامدىق كولىك باعىتتارىن ىسكە قوسۋ جونىندە تاپسىرمالار بەرىلدى.
العاباس شاعىناۋدانىندا ينجەنەرلىك جەلىلەر قۇرىلىسى 2024 جىلى اياقتالدى. بيىل قالا موبيلدىلىگى باسقارماسى جول سالۋ جوباسىن جۇزەگە اسىرۋدا. بۇگىنگى تاڭدا 31،9 شاقىرىم اسفالتبەتون جابىنى توسەلدى. قىركۇيەك ايىنىڭ سوڭىنا دەيىن 1 368 جول بەلگىسىن ورناتۋ جوسپارلانعان.
سونىمەن قاتار، شاعىناۋداندى ەلەكتر قۋاتىمەن قامتۋ جۇمىستارى جۇرگىزىلۋدە. جاڭا ەلەكتر جەلىلەرى مەن جارىق باعانالارى ورناتىلىپ جاتىر. ونىڭ ىشىندە كوشە جارىعىن تولىق ىسكە قوسۋ جۇمىستارى دا بار. بارلىق جۇمىستاردى وسى جىلدىڭ قىركۇيەك ايىنىڭ سوڭىنا دەيىن اياقتاۋ كوزدەلگەن.