الماتى قالاسىنىڭ اكىمى دارحان ساتىبالدى ءال-فارابي اتىنداعى قازاق ۇلتتىق ۋنيۆەرسيتەتىنە بارىپ، نەگىزگى عىلىمي ورتالىقتارمەن، يننوۆاسيالىق جوبالارمەن جانە كامپۋستى دامىتۋ جوسپارىمەن تانىستى.
ەڭ اۋەلى قالا باسشىسىنا Farabi Hub يننوۆاسيالىق ونىمدەر مەن جوعارى تەحنولوگيالىق جوبالار ورتالىعى كورسەتىلدى. اۋدانى 5 000 شارشى مەتر بولاتىن بۇل عىلىمي-زەرتتەۋ الاڭى ستۋدەنتتەردى، زەرتتەۋشىلەردى جانە كاسىپكەرلەردى بىرىكتىرىپ، كرەاتيۆتى يندۋستريا، جاساندى ينتەللەكت جانە ستارتاپ سالاسىنداعى جوبالاردى جۇزەگە اسىرۋعا مۇمكىندىك بەرەدى. دارحان ساتىبالدىنىڭ ايتۋىنشا، جاستارعا مۇمكىندىك بەرۋ مەن عىلىمي ازىرلەمەلەردى ناقتى ەكونوميكاعا ەنگىزۋ قالاداعى باستى باسىمدىقتىڭ ءبىرى.
ءارى قاراي اكىم زاماناۋي ءوندىرىس پەن جاساندى ينتەللەكت تەحنولوگياسىنا نەگىزدەلگەن بەس يننوۆاسيالىق پلاتفورمانى قامتيتىن روبوتوتەحنيكا ورتالىعىنىڭ جۇمىسىمەن تانىستى. بۇل ورتالىق ستۋدەنتتەرگە وزىق تەحنولوگيالاردى مەڭگەرۋگە جانە جاڭا شەشىمدەر ازىرلەۋگە جول اشادى.
«ءال-فارابي اتىنداعى قازاق ۇلتتىق ۋنيۆەرسيتەتىندە عىلىم مەن ءبىلىمدى دامىتۋ ءۇشىن بارلىق جاعداي جاسالعان. مۇندا ىرگەلى عىلىم مەن يننوۆاسيا توعىسىپ، جاڭا يدەيالار دۇنيەگە كەلەدى. پرەزيدەنت قاسىم-جومارت توقايەۆ ءوزىنىڭ سوڭعى جولداۋىندا جاستاردى قولداۋدىڭ، عىلىمدى دامىتۋدىڭ جانە جوعارى وقۋ ورىندارىنىڭ حالىقارالىق باسەكەگە قابىلەتتىلىگىن ارتتىرۋدىڭ ماڭىزدىلىعىن ەرەكشە اتادى. قازۇۋ وسى مىندەتتەردى جۇزەگە اسىرۋدا كوش باستاپ كەلەدى»، – دەدى دارحان ساتىبالدى.
اكىم جاڭا وقۋ عيماراتتارىنىڭ قۇرىلىسىنا دا ەرەكشە نازار اۋداردى. جالپى اۋماعى 32 000 شارشى مەتر بولاتىن ءۇش جەتى قاباتتى عيماراتتا عىلىمي زەرتحانالار، ءدارىسحانالار مەن كونفەرەنس-زالدار، اۋديتوريالار، سونداي-اق دەمالىس پەن پىكىرتالاس الاڭدارى قاراستىرىلعان.
دارحان ساتىبالدى جۇڭگو عىلىم اكادەمياسىمەن بىرلەسىپ قۇرىلعان «قاشىقتان زوندتاۋ تەحنولوگيالارى جانە ولاردىڭ قولدانىلۋى» اتتى قازاق-قىتاي زەرتحاناسىنا دا باردى. مۇندا ورتالىق ازياداعى جاھاندىق ەكولوگيالىق جانە كليماتتىق وزگەرىس، سونىڭ ىشىندە قۋاڭشىلىق، جەردىڭ توزۋى، سۋ تاپشىلىعى مەن كاسپيي تەڭىزىنىڭ تارتىلۋى سىندى تاقىرىپتار زەرتتەلىپ جاتىر. زەرتحانانىڭ نەگىزگى ماقساتى – قورشاعان ورتانىڭ جاي-كۇيىن باعالاپ، كەلەشەككە بولجام جاساۋعا مۇمكىندىك بەرەتىن عىلىمي نەگىز قۇرۋ.
ساپار سوڭى سۋپەركومپيۋتەرلەر ورتالىعىنا ارنالدى. ونىڭ ونىمدىلىگى 2 000 تەرافلوپسقا تەڭ، بۇل قازاقستان مەن ورتالىق ازيادا تەڭدەسى جوق كورسەتكىش. سونداي-اق، ول الەمدەگى ەڭ مىقتى 600 سۋپەركومپيۋتەردىڭ قاتارىنا ەنگەن.