№127 مەكتەپتىڭ كۇردەلى جوندەۋى قاناعاتتانارلىقسىز جۇرگىزىلدى، دەپ مالىمدەدى ەربولات دوسايەۆ الماتىنىڭ اۋەزوۆ اۋدانىنداعى نىساندى ارالاۋ بارىسىندا، دەپ حابارلايدى Almaty-akshamy.kz
«BEREKET-TK» ج ش س مەردىگەرلىك ۇيىمىنا ءبىرقاتار سۇراقتار مەن شاعىمدار بار، قالا باسشىسى بارلىق ەسكەرتۋلەردى جەدەل جويۋدى تاپسىردى – مەكتەپ بالالاردى قابىلداۋعا تولىق دايىن بولعان جاعدايدا عانا اشىلۋى مۇمكىن.
№127 مەكتەپ 1988 جىلى سالىنعان، سودان بەرى عيماراتتا جوندەۋ جۇمىستارى جۇرگىزىلمەگەن. قاۋىپسىزدىك پەن ءبىلىم بەرۋدىڭ زاماناۋي نورمالارىنا سايكەس كەلۋ ءۇشىن الماتى اكىمىنىڭ تاپسىرماسى بويىنشا 2،4 ملرد تەڭگە ءبولىندى. كۇردەلى جوندەۋ جۇمىستارى 2022 جىلدىڭ قازان ايىندا باستالدى، قازىرگى ۋاقىتتا جۇمىستار 95% - عا اياقتالدى.
قالا باسشىسىنا جۇمىس بارىسىندا سەيسميكالىق كۇشەيتۋ، شاتىردى، عيماراتتى، جىلىتۋ جۇيەسى مەن سۋ قۇبىرىن جوندەۋ، بۇكىل اۋماق بويىنشا قورشاۋدى اۋىستىرۋ، سپورت كەشەنىن ورناتۋ جۇمىستارى جۇرگىزىلگەنى باياندالدى. قازىرگى ۋاقىتتا مەردىگەر ۇيىم اۋماقتى اباتتاندىرۋمەن اينالىسۋدا.
ەربولات دوسايەۆ قۇرىلىس باسقارماسى باسشىلىعىنىڭ نازارىن مەردىگەرلىك ۇيىم جۇرگىزگەن جوبالىق جۇمىستاردىڭ ساپاسىنا اۋداردى: قالا باسشىسى كۇزگى-قىسقى كەزەڭدە بالالارعا ىڭعايلى بولۋ ءۇشىن مەكتەپكە كىرە بەرىستە رەزەڭكەلەنگەن ۋچاسكەلەردىڭ بولماۋىنا، قابىرعالاردى بوياۋعا قاتىستى تالاپتاردى ايتتى. قالا اكىمى سونداي-اق بالالاردىڭ قۇلاۋى مەن جاراقاتتانۋىن بولدىرماۋ ءۇشىن مەكتەپتەگى تابالدىرىقتاردى قايتا جابدىقتاۋدى، دارەتحاناداعى راكوۆينالار ايماعىنداعى ەلەكتر سىمدارىن وقشاۋلاۋدى، جەلدەتۋدىڭ تەحنيكالىق بۇزىلۋىن جويۋدى جانە وقۋشىلارعا ىڭعايلى جانە جايلى بولۋ ءۇشىن اۋلانى اباتتاندىرۋدى تاپسىردى.
بۇدان باسقا، قۇرىلىس-مونتاج جۇمىستارىنىڭ ساپاسىن تەحنيكالىق قاداعالاۋدى جۇزەگە اسىراتىن كومپانياعا ەسكەرتۋ جاسالدى.
بەلگىلەنگەن مەرزىمگە سايكەس، مەكتەپ اعىمداعى جىلدىڭ قاراشا ايىندا اشىلۋى كەرەك ەدى. قالا باسشىسى مەردىگەرگە جەلتوقسان ايىنىڭ سوڭىنا دەيىن بارلىق ولقىلىقتاردى جويۋعا ۋاقىت بەردى.