الماتى اكىمى ءدارحان ساتىبالدى رەسپۋبليكالىق «تازا قازاقستان» ەكولوگيالىق باعدارلاماسىن جۇزەگە اسىرۋ ماسەلەلەرى بويىنشا جيىن وتكىزدى.
ەكولوگيا جانە قورشاعان ورتا باسقارماسىنىڭ باسشىسى ميراس گايسين قۋراعان اعاشتاردى جويۋ، قالانى سانيتارلىق تازالاۋ جانە جاسىل جەلەكتەردى قىرقۋ جۇمىستارى جونىندە باياندادى. اكىمنىڭ تاپسىرماسىمەن مونيتورينگتىك توپتار قۇرىلىپ، ولار اسىرەسە مەكتەپتەر مەن بالاباقشالاردىڭ ماڭىنداعى اعاشتاردىڭ جاي-كۇيىن تەكسەرۋدە.
ءبىلىم باسقارماسىنىڭ باسشىسى سايران سايفەدەنوۆ ءبىلىم بەرۋ ۇيىمدارىنىڭ اۋماقتارىنداعى سانيتارلىق قىرقۋ جۇمىستارى جانە «تازا قازاقستان» باعدارلاماسى اياسىندا وقۋشىلار مەن ۇستازداردىڭ قاتىسۋىمەن وتكىزىلەتىن ەكولوگيالىق اكسيالار تۋرالى ايتتى.
ءدارحان ساتىبالدى 1 قىركۇيەككە دەيىن بارلىق قازىلعان جەرلەردى قالپىنا كەلتىرىپ، اعاشتاردى سانيتارلىق قىرقۋدان وتكىزىپ، اۋلالاردى اباتتاندىرىپ، كوشەلەر مەن الەۋمەتتىك نىسانداردا تازالىقتى قامتاماسىز ەتۋدى تاپسىردى.
«جاڭا وقۋ جىلى باستالعالى تۇر. الماتى وقۋشىلاردى تازا ءارى جاسىل قالا بولىپ قارسى الۋى ماڭىزدى. ءاربىر نىسان – مەكتەپ، بالاباقشا، ەمحانا – ءبىرىزدى تارتىپپەن، جارىعى دۇرىس جۇمىس ىستەپ تۇرۋى جانە جاعدايى تۇراقتى باقىلاۋدا بولۋى قاجەت»، – دەدى قالا اكىمى.