الماتىدا جارامسىز جاعدايعا كەلگەن ساياباقتار مەن سكۆەرلەردى قايتا جاڭارتۋ جۇمىستارى جۇرگىزىلۋدە.
نەگىزگى ماقسات – قالا تۇرعىندارىنىڭ ۋاقىت وتكىزۋىنە قولايلى جاعداي جاساۋ. ايتا كەتسەك، الەۋمەتتىك جەلىلەردە بۇكىل گرانيت پليتالارىن جاڭارتۋ تۋرالى اقپارات شىندىققا جاناسپايدى، دەپ حابارلايدى Almaty-akshamy.kz.
ماسەلەن، ءۋاليحانوۆ اتىنداعى ساياباق پەن قونايەۆ كوشەسى جاعىنان ۆيدەوكادرلارعا تۇسكەن گۇلزارلار مەن گرانيتتى پليتالاردىڭ شامامەن 80-85%-ى ساقتالادى، تەك سىنعان جانە قايتا قالپىنا كەلمەيتىن گرانيت پليتكالار عانا اۋىستىرىلادى.
مەدەۋ اۋدانى اكىمدىگىنىڭ اقپاراتىنا سايكەس، اعىمداعى جىلى ق ر پرەزيدەنتى جانىنداعى ۇلتتىق عىلىم ورداسىنىڭ عيماراتى - ساۋلەت ەسكەرتكىشىن كۇردەلى جوندەۋ جانە قالپىنا كەلتىرۋ جۇمىستارى باستالدى. وسى جوبا اياسىندا ىرگەلەس اۋماقتاردى اباتتاندىرۋ جۇمىستارى دا جوسپارلانعان. شوقان ءۋاليحانوۆ اتىنداعى ساياباقتا گرانيتتى پليتكانى قالپىنا كەلتىرۋ مەن جوندەۋ جۇمىستارى باستالدى. ولار تازالاۋ ءۇشىن الىنىپ، كەيىن قايتا ءوز ورىندارىنا قويىلادى. تىرەك قابىرعالارىنىڭ گرانيت پليتالارى، سونداي-اق گۇلزارلار مەن تروتۋارلاردى جيەكتەيتىن شەكارالار بولشەكتەلمەيتىنىن ەسكەرۋ ماڭىزدى. سونىمەن قاتار، جوندەۋ جۇمىستارى بارىسىندا سۋبۇرقاقتار جۇيەسى تازالانادى. جۇمىستاردى اعىمداعى جىلدىڭ قىركۇيەك ايىندا اياقتاۋ جوسپارلانۋدا.
وسىنداي جۇمىستاردى قونايەۆ كوشەسى جاعىنان عىلىم ورداسىنىڭ عيماراتىنا ىرگەلەس جاتقان سكۆەردە جۇرگىزۋ كوزدەلگەن. مۇنداعى گرانيتتى پليتالار دا قالپىنا كەلتىرىلىپ، تازالاپ، تەگىستەگەننەن كەيىن ورنىنا قايتارىلادى. سونىمەن قاتار، الاڭدا جارىقتاندىرۋ تىرەكتەرى ورناتىلىپ، بۇتالار مەن گۇلزارلار وتىرعىزىلادى. اياقتالۋ مەرزىمى-وسى جىلدىڭ قازان ايىندا.
ايتا كەتەرلىگى، ەكى نىسان بويىنشا جۇمىستار جەكە قاراجات ەسەبىنەن جۇزەگە اسىرىلادى.
سونىمەن قاتار، «حالىق قاتىساتىن بيۋدجەت» باعدارلاماسى اياسىندا پۋشكين كوشەسىنىڭ بويىنداعى سكۆەردە جوندەۋ جۇمىستارى باستالدى. مۇندا جارىقتاندىرۋ تىرەكتەرى قالپىنا كەلتىرىلىپ، ا.س. پۋشكين ەسكەرتكىشىنىڭ الدىنداعى توسەنىشتەر اۋىستىرىلادى، جاسىل ەكپەلەردىڭ اۆتوماتتى سۋارۋ جۇيەسى ورناتىلادى، بۇتالار مەن گۇلزارلار وتىرعىزىلادى.
«زودياك بەلگىلەرى» سۋبۇرقاعىنىڭ اينالاسىنداعى گرانيت پليتكالار جاقسى، سوندىقتان الىنبايدى. جۇمىستار اعىمداعى جىلدىڭ قازان ايىندا اياقتالادى.
بۇعان دەيىن د.قونايەۆ اتىنداعى سكۆەردە سىرتقى جارىقتاندىرۋدى قالپىنا كەلتىرۋ جۇمىستارى تۋرالى حابارلانعان بولاتىن. بۇگىنگى تاڭدا 26 تىرەك پەن 56 شامدى قالپىنا كەلتىرۋ جۇمىستارى اياقتالدى.