تاراپتار الماتىنىڭ دامۋ ورتالىعىمەن بىرلەسىپ ءتيىستى مەموراندۋمعا قول قويدى.
الماتى قالاسىنىڭ سەيسميكالىق قاۋىپسىزدىك جانە جۇمىلدىرۋ دايىندىعى باسقارماسى مەن توتەنشە جاعدايلار جانە تابيعي اپاتتار ءقاۋپىن ازايتۋ ورتالىعى ءبىرقاتار باعىت بويىنشا ىنتىماقتاستىقتى كۇشەيتەدى، دەپ حابارلايدى Almaty-akshamy.kz
باسقارما باسشىسى باتىرحان سۇلەيمەنوۆ قالادا عيماراتتارعا سەيسميكالىق اۋديت جۇرگىزۋ مەن تج كەزىندە حالىقتىڭ ءقاۋىپسىز مىنەز-قۇلىق مادەنيەتىن ارتتىرۋ بويىنشا جۇمىستىڭ بەلسەندى جۇرگىزىلىپ جاتقانىن اتادى. ونىڭ ايتۋىنشا، سەيسمواۋديت اياقتالعاننان كەيىن 6 بالدان جانە ودان جوعارى جەر سىلكىنىستەرىنىڭ ىقتيمال ناتيجەسىن مودەلدەۋدىڭ ارنايى اقپاراتتىق جۇيەسى ازىرلەنەدى.
«مەموراندۋم ورتالىق ازيا ەلدەرىنىڭ قولدانىستاعى ۇلتتىق جۇيەسىن بىرىكتىرۋ جولىمەن جەر سىلكىنىسىنىڭ تۋىنداۋ ءقاۋپى تۋرالى ەرتە حابارلاۋدىڭ جانە ءوزارا حابارلاۋدىڭ وڭىرلىك جۇيەسىن كۇشەيتۋ جونىندەگى قىزمەتتى شوعىرلاندىرۋعا باعىتتالعان. سونداي-اق، ءبىز ءتۇرلى اپاتتىڭ ءقاۋىپ فاكتورىن باعالاۋ بويىنشا حالىقارالىق ادىستەمەلەردى بىرلەسىپ ەنگىزەمىز»، - دەدى باتىرحان سۇلەيمەنوۆ.
ءوز كەزەگىندە توتەنشە جاعدايلار جانە تابيعي اپاتتار ءقاۋپىن ازايتۋ ورتالىعىنىڭ ديرەكتورى سەرىك اۋباكىروۆ بۇل كەلىسىم بارلىق مۇددەلى تاراپتىڭ كۇش-جىگەرىن شوعىرلاندىرۋعا جانە تج الدىن الۋ سالاسىنا ينۆەستيسيا تارتۋعا ىقپال ەتەتىنىن اتاپ ءوتتى.
ايتا كەتۋ كەرەك، ورتالىق ق ر سىرتقى ىستەر مينيسترلىگىندە مەملەكەتارالىق ورگان – حالىقارالىق ۇيىم رەتىندە تاعايىندالعان. نەگىزگى قىزمەت – اپاتتار ءقاۋپىن ازايتۋ، تج الدىن الۋ جانە جويۋ، سونداي-اق كليماتتىڭ وزگەرۋىنە بەيىمدەلۋ سالاسىنداعى وڭىرلىك جانە حالىقارالىق ىنتىماقتاستىقتى نىعايتۋ.