الماتى قالاسى اكىمدىگىنىڭ قولداۋىمەن مەگاپوليستەگى ەڭ اسەم ءارى مۇگەدەك جانداردىڭ كىرىپ-شىعۋىنا بارلىق جاعداي جاسالعان «ريتس پالاس» ساۋدا-ويىن-ساۋىق ءۇيىنىڭ ىشىندەگى «Ritz Hall» بانكەت زالىندا مۇمكىندىگى شەكتەۋلى جەتكىنشەكتەر مەن ولاردى باعىپ-قاعىپ وتىرعان اتا-انالارىنا جارقىن مەرەكە ۇيىمداستىرىلدى.
– مۇنداي مەيرامدى ەكىنشى رەت وتكىزىپ وتىرمىز. ءتۇرلى دياگنوزى بار مۇمكىندىگى شەكتەۋلى 100 بالانى اتا-انالارىمەن بىرگە مەرەكەلىك داستارحان باسىنا شاقىرىپ، سالتاناتتى دۋمان سىيلاپ جاتىرمىز. وزدەرىڭىز دە كورىپ وتىرسىزدار، وسىناۋ ەڭسەلى جارىق عيماراتتا كىشكەنتاي دوستارىمىز كوڭىلدى مۋزىكاعا بيلەپ، اتا-انالارى دا قوسىلا ءان شىرقاپ، سۋرەتكە ءتۇسىپ، ماز-مەيرام. مۇنداي مەرەكە-دۋمان ءالى دە جالعاسادى. بارلىق بالانىڭ ءار كۇنى جارقىن بولسىن دەپ تىلەيمىز، – دەيدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ.
ءيا، قىزىلدى-جاسىلدى شارلارمەن كومكەرىلگەن، ءان-جىرعا بولەنگەن جاپ-جارىق زالدا ۇلكەن-كىشى بىردەي مەرەكەنى سەزىنە ءبىلدى. بالالار الىپ انيماتور قوس ايۋمەن كەزەك-كەزەك سۋرەتكە ءتۇسىپ، بي بيلەپ، ەرەكشە ءماز. «ايۋلاردىڭ» دا وزدەرىن قىزىقتاپ، ءتۇرتىپ كورىپ جاتقان بالدىرعانداردى باۋىرىنا باسىپ قۇشاقتاپ جاتقان ساتتەرى ءتىپتى اسەرلى!
«Ritz Hall» زالىنىڭ بالالاردىڭ كوڭىل كوتەرۋىنە قولايلى تەرراساسىندا كىشكەنتاي دوستارىمىز ويىن-ساۋىق باعدارلاماسىنا قاتىستى. كونكۋرستىق ويىندارعا اتسالىستى. كوڭىلدى انيماتورلار، كلوۋندار دا بالالار مەرەكەسىنىڭ كورىگىن قىزدىردى. اسپاندا اۋەلەگەن سابىندى ءمولدىر كوبىكتەردى ۇستاۋعا تالپىنعان بالدىرعاندار دا ءوز الدىنا ماز-مەيرام. دەكوراتيۆتى تىشقان، قويان، ماكاكا، تاسباقا، قولتىراۋىندار دا بالالاردىڭ تاڭدانىسىن تۋدىرىپ، ءبارى جامىراي ۇستاپ كورىپ، قۋانىشتارى ەسەلەنە ءتۇستى.
مەرەكە سوڭىندا بارلىق بالاعا سىيلىق تارتۋ ەتىلدى.