زاڭعا تۇزەتۋلەر ەنگىزىلدى.
الماتى اكىمدىگى بەينەباقىلاۋ كامەرالارىن ورناتىپ، ادامدار كوپ جينالاتىن جەرلەردە بەينەباقىلاۋ مونيتورينگىن جۇرگىزۋ قۇقىعىنا يە بولادى. الماتى قالاسىنىڭ ەرەكشە مارتەبەسى تۋرالى زاڭعا وسىنداي تۇزەتۋلەر ەنگىزۋدى ءماجىلىس دەپۋتاتتارى ماقۇلدادى، دەپ حابارلايدى Almaty-akshamy.kz Inbusiness.kz سىلتەمە جاساپ.
«ق ر «الماتى قالاسىنىڭ ەرەكشە مارتەبەسى تۋرالى» زاڭىنا الماتى قالاسىنىڭ ءماسليحاتى مەن اكىمدىگىنىڭ وكىلەتتىكتەرىن الماتى قالاسىنداعى سىرتقى جارىقتاندىرۋ جۇيەلەرىن پايدالانۋ قاعيدالارىن بەكىتۋ، بەينەكامەرالار ورناتۋ قاعيدالارىن بەكىتۋ جانە ازاماتتار كوپ جينالاتىن جەرلەردە بەينەباقىلاۋ مونيتورينگىن جۇرگىزۋ بويىنشا وكىلەتتىكتەرىن قوسۋعا باعىتتالعان تۇزەتۋلەر ەنگىزىلدى»، − دەپ حابارلادى تومەنگى پالاتانىڭ دەپۋتاتى دۇيسەنباي تۇرعانوۆ.
بۇدان باسقا، كوپ پاتەرلى تۇرعىن ۇيلەردى كۇردەلى جوندەۋ بويىنشا ارنايى جالپىقالالىق شوت قۇرۋ، الەۋمەتتىك وبەكتىلەر قۇرىلىسى ءۇشىن مۇلىكتى ماجبۇرلەپ يەلىكتەن شىعارۋ ماسەلەلەرى جانە قالانىڭ بۇرقاقتى شارۋاشىلىعىن ۇستاۋ جانە تەحنيكالىق قىزمەت كورسەتۋ جونىندەگى قاعيدالاردى بەكىتۋ زاڭنامالىق تۇردە بەكىتىلدى.