بۇگىن الماتىدا جاڭا مەديسينالىق كولىكتى سالتاناتتى تۇردە تابىستاۋ ءوتتى. 55 جەدەل جاردەم كولىگىنىڭ كىلتىن قالا اكىمىنىڭ ورىنباسارى اسەم ءنۇسىپوۆا تابىس ەتتى.
تۇرعىندارعا شۇعىل مەديسينالىق كومەك كورسەتۋگە ارنالعان جەرگىلىكتى بيۋدجەتتەن ساتىپ الىنعان «ۆ» كلاسىنا سايكەس كەلەتىن سانيتارلىق اۆتوكولىكتەر الەمدىك برەندتەردىڭ زاماناۋي مەديسينالىق جابدىعىمەن جابدىقتالعان: رەانيماسيالىق جابدىقتار، دەفيبريللياتورلار، ەلەكتروكارديوگرافتار، جاساندى تىنىس الۋ اپپاراتتارى جانە ت.ب.
الماتى قالاسىندا جەدەل مەديسينالىق كومەكتى، ۋاقتىلى قولجەتىمدىلىكتى ەسكەرە وتىرىپ، جەدەل مەديسينالىق جاردەمنىڭ گەوگرافيالىق جاعىنان ىڭعايلى ورنالاسقان 12 قوسالقى ستانسياسى كورسەتەدى. 55 كولىك بارلىق اۋداندىق قوسالقى ستانسياعا تاراتىلادى. بۇل مەديسينالىق كومەكتىڭ ساپاسى مەن تيىمدىلىگىن ارتتىراتىنى ءسوزسىز.
الماتىدا كۇن سايىن جەلىدە 186 جەدەل جاردەم بريگاداسى جۇمىس ىستەپ، 3 مىڭعا جۋىق شاقىرتۋعا قىزمەت كورسەتەدى.
2023 جىلدىڭ سوڭىندا جەدەل جاردەم بريگادالارى 1 ميلليوننان استام شاقىرۋدى قابىلدادى. قوڭىراۋلاردىڭ 93%-ى 1-3 سانات بويىنشا ۋاقتىلى كەلۋمەن قامتاماسىز ەتىلگەن.
- 2023 جىلدىڭ سوڭىندا جەدەل جاردەم كولىگىنىڭ توزۋى 69 پايىزدى قۇرادى.
- ساتىپ الىنعان جاڭا كولىكتى ەسەپكە العاندا، بۇگىندە توزۋ 46%-دى قۇرايدى.
- كولىكتىڭ توزۋ پايىزىن تومەندەتۋ ماقساتىندا بيىل تاعى 48 جەدەل جاردەم كولىگىن ساتىپ الۋ جوسپارلانعان.
- الماتى قالاسى اكىمدىگى جەدەل مەديسينالىق كومەكتى دامىتۋعا ەرەكشە كوڭىل ءبولىپ وتىر.
وسىلايشا، 2023 جىلى اكىمدىك جەرگىلىكتى بيۋدجەتتەن قاراجات ءبولىپ، سيفرلاندىرۋعا ارنالعان جابدىقتار مەن باعدارلامالىق قامتاماسىز ەتۋدى، سيمۋلياسيالىق ورتالىقتىڭ جابدىعى مەن ۇلگىلەرىن ساتىپ الۋعا، قىزمەتكەرلەردى نىساندى كيىممەن قامتاماسىز ەتۋگە، مەديسينالىق قۇرال-جابدىقتى (ديستانسيوندىق ەكگ، وتتەگى ينگالياتورى) ساتىپ الۋعا مۇمكىندىك بەرىپ، قارجىلىق ليزينگ باعدارلاماسى بويىنشا ساتىپ الىنعان سانيتارلىق اۆتوكولىكتەرگە ۋاقتىلى تەحنيكالىق قىزمەت كورسەتۋ جۇزەگە اسىرىلدى.
2024 جىلعا 4 قوسالقى ستانسا قۇرىلىسىنىڭ جوبالىق قۇجاتتاماسىن ازىرلەۋ جانە 3 قوسالقى ستانساعا كۇردەلى جوندەۋ جۇمىسىن جۇرگىزۋ جوسپارلانعان.
جالپى، جەدەل جاردەم قىزمەتىن دامىتۋدىڭ 2028 جىلعا دەيىنگى تۇجىرىمداماسىنا سايكەس، تۇرعىنداردىڭ تىعىزدىعى مەن قالانىڭ دامۋىن ەسكەرە وتىرىپ، 12 جاڭا قوسالقى ستانسا سالۋ جوسپارلانعان.