ءىىم م.ەسبولاتوۆ اتىنداعى الماتى اكادەمياسىندا قازاق دەتەكتيۆىنىڭ اتاسى كەمەل توقايەۆقا ارنالعان بۇرىش اشىلدى.
65 جىلدىق تاريحى بار الماتى اكادەمياسىندا جازۋشى كەمەل توقايەۆقا ارنالعان بۇرىش اشۋدىڭ دا وزىندىك سەبەبى مول. اتالعان وقۋ ورنى قۇرىلعان العاشقى جىلداردىڭ وزىندە-اق كۋرسانتتاردىڭ پاتريوتتىق تاربيەسى مەن رۋحاني دامۋىنا ەرەكشە كوڭىل ءبولىندى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بۇل ورايدا كۋرسانتتار ءۇشىن كەڭەس وداعىنىڭ باتىرى ب.مومىشۇلىمەن، پارتيزان وتريادىنىڭ كومانديرى ق. قايسەنوۆپەن، كەڭەس وداعىنىڭ ەكى مارتە باتىرى ت.بيگەلدينوۆپەن، س.لۋگانسكييمەن جانە اتاقتى ءانشى روزا باعلانوۆامەن، جازۋشى مۇحتار اۋەزوۆپەن كەزدەسۋلەردىڭ ماڭىزى ەرەكشە بولدى. سولاردىڭ ىشىندە قازاقستاندا دەتەكتيۆ جانرىن دامىتقان جازۋشى كەمەل توقايەۆتىڭ كۋرسانتتارمەن كەزدەسۋى ولاردىڭ ەسىندە ماڭگى ساقتالاتىن جيىن بولعان ەدى. ويتكەنى جازۋشىنىڭ “جۇلدىزدى جورىق”، “اعىن”، “ارناۋلى تاپسىرما”، “تۇندە اتىلعان وق”، “سارعاباندا بولعان وقيعا”، “تاۋداعى جاڭعىرىق”، “سوڭعى سوققى”، “سولدات سوعىسقا كەتتى”، “قاستاڭدىق”، “ۇياسىنان بەزگەن قۇس”، “كومەسكى ءىز” كىتاپتارى مەن قازاقستاندىق چەكيستەرگە ارنالعان “تاڭبالى التىن” پوۆەسى كۋرسانتتاردىڭ قولىنان تۇسپەيتىن شىعارمالار ەدى.
ميليسيا مەن مەملەكەتتىك قاۋىپسىزدىك ورگاندارى قىزمەتكەرلەرىنىڭ ومىرىنەن الىنعان وقيعالاردىڭ جەلىسى قىلمىسكەر قالاي جاسىرىنسا دا، قايدا قاشسا دا، ءادىل جازادان قۇتىلىپ كەتە المايتىندىعىمەن قۇندى بولدى.
قازاقستاننىڭ حالىق جازۋشىسى ءازىلحان نۇرشايىقوۆ كەزىندە: – قازاق ادەبيەتىندەگى دەتەكتيۆ جانرىنىڭ كوشباسشىسى كەمەل توقايەۆ قازاق جازۋشىلارىنىڭ ىشىندەگى وقىرمانى ەڭ كوپ قالامگەرلەردىڭ ءبىرى بولدى. وقىرماندارىنىڭ ءوتىنىشى بويىنشا كەمەلدىڭ كىتاپتارى ءۇش-تورت رەتتەن قايتا باسىلىپ وتىردى، – دەگەن بولاتىن.
ال مەملەكەتتىك سىيلىقتىڭ لاۋرەاتى اكىم تارازي: – كەمەل اعا توقايەۆپەن ءبىز ءۇنسىز تابىستىق. “سارعاباندا بولعان وقيعا” حيكاياسىن وقىدىم. ۇناتتىم. ۇناتىپ قانا قويعان جوقپىن، تاڭعالدىم. كەمەل اعا كيەلى قازاق ادەبيەتىنىڭ جاڭا ارناسىن اشتى. شىتىرمان وقيعالى شىمىر شىعارمالار جازدى. كەمەل اعانىڭ تۋىندىلارى وقىرمان جۇرەگى دەپ اتالاتىن التىن مەجەدەن ءبىر-اق تابىلاتىن. كىتاپتارى دۇكەن سورەسىندە ءبىر كۇن دە جاتپايتىن، – دەگەن ەكەن.
الماتى اكادەمياسىندا اشىلعان بۇرىشقا جازۋشىنىڭ اتالعان وقۋ ورنىنا كەلگەندەگى سۋرەتتەرى مەن كىتاپتارى، بەلگىلى تۇلعالاردىڭ كەمەل توقايەۆ تۋرالى ەستەلىكتەرى قويىلدى. ك.توقايەۆتىڭ شىعارمالارىن ناسيحاتتاۋ مۇنىمەن شەكتەلىپ قالماق ەمەس. الداعى ۋاقىتتا الماتى اكادەمياسىندا قازاق دەتەكتيۆ جانرى اتاسىنىڭ شىعارماشىلىعىن زەرتتەۋ ماقساتىندا عىلىمي كونفەرەنسيا جانە كونكۋرستار ۇيىمداستىرىلادى.