قازاقستان رەسپۋبليكاسى ءىىم ماقان ەسبولاتوۆ اتىنداعى الماتى اكادەمياسىنا باكالاۆر باعدارلاماسى بويىنشا كۋرسانتتاردى ىرىكتەۋ اياقتالدى.
وقۋعا تۇسكەن كۋرسانتتاردىڭ اتى-جوندەرى سالتاناتتى راسىمدە رەسمي تۇردە ايتىلدى. پوليسەيلىك اكادەمياعا ەڭ ۇزدىكتەر ىرىكتەلدى. 300 تالاپكەر عانا قاتاڭ ىرىكتەۋدەن كەيىن الما-ماترگە وقۋعا ءتۇستى. ىشكى ىستەر ءمينيسترىنىڭ باستاماسىمەن بيىل اكادەمياعا وقۋعا ءتۇسۋ پروسەدۋراسى جاڭا فورماتتا ءوتتى، دەپ حابارلايدى Almaty-akshamy.kz.
“التىن بەلگى” يەگەرلەرى، ۇبت-دان جوعارى بالل العان تۇلەكتەر، سپورت شەبەرلەرى، قىزمەتتە ەرلىكپەن قازا تاپقان پوليسەيلەردىڭ بالالالارى اكادەمياعا اۆتوماتتى تۇردە وقۋعا ءتۇستى. سونىمەن قاتار ناۋقاننىڭ باستالعان ساتىنەن باستاپ، اياعىنا دەيىن تالاپكەرلەردىڭ اتا-انالارى، قوعام وكىلدەرى، بلوگەرلەر قاتىستى. كونكۋرستار بارىنشا اشىق وتكىزىلدى. تالاپكەرلەر مەن ولاردىڭ اتا-انالارى، جاقىندارى مەن قوناقتاردىڭ الدىندا ءسوز سويلەگەن الماتى اكادەمياسىنىڭ باستىعى ايدار سايتبەكوۆ جاڭا كۋرسانتتاردى قۇتتىقتاپ، بۇگىن قازاقستان پوليسياسىنىڭ قاتارىنا ەڭ لايىقتىلاردىڭ قابىلدانعانىن ايتتى. سونداي-اق جاڭا ەكسپەريمەنتالدى فورمات اياسىندا پروسەسكە قوعام وكىلدەرى مەن اتا-انالاردىڭ قاتىسۋى – ءوز ماڭىزدىلىعى مەن تيىمدىلىگىن، اشىقتىعىن كورسەتكەنىن اتاپ ءوتتى.
«اكادەميا قىزمەتكەرلەرى ءاربىرىڭىزدىڭ ناعىز كاسىبي مامان، مىندەتىنە ادال، انتىنا بەرىك لايىقتى ازامات اتانۋلارىڭىزعا بار كۇش-جىگەرلەرىن سالادى. بارشاڭىزعا اق جول تىلەيمىن»، – دەدى ايدار سايتبەكوۆ.