الماتىداعى بەلسەندى ۇزاق ءومىر ءسۇرۋ ورتالىعىندا قۇرىلعان «الماتى اجەلەرى» جاسى ۇلكەن سانگەرلەر مودەلدەر بىرىككەن اراب امىرلىكتەرىنە ساپار شەكتى، دەپ حابارلايدى aqshamnews.kz.
دۋبايداعى تودا يننوۆاسيالىق تەاترىندا رەجيسسەر ءارى پروديۋسەر ولگا ساپوجنيكوۆا تۇسىرگەن «ۇزاق عۇمىر» اتتى دەرەكتى ءفيلمنىڭ تۇساۋى كەسىلدى. بۇل ءفيلمنىڭ باستى كەيىپكەرلەرىنىڭ ءبىرى – «الماتى اجەلەرى» توبىنىڭ مۇشەلەرى.
ءفيلمنىڭ تۇساۋكەسەرى اياسىندا الماتىلىق زەينەتكەر اجەلەر «اق كەربەز» ءسان توپتاماسىن ۇسىنىپ، ۇزاق ءومىر ءسۇرۋ، دەنساۋلىقتى ساقتاۋ جانە كەز كەلگەن جاستا وپتيميستىك كوزقاراستى ۇستانۋ قۇپياسىن ءبولىستى. ءسان كورسەتىلىمى كەشتىڭ جارقىن ساتىنە اينالىپ، سۇلۋلىق، ءداستۇر مەن زاماناۋيلىقتىڭ ۇيلەسىمىن كورسەتتى.
ءىس-شاراعا قازاقستاننىڭ باا-دەگى ەلشىلىگىنىڭ وكىلدەرى، قالالىق اكىمدىك، مادەنيەت جانە دەنساۋلىق ساقتاۋ سالاسىنىڭ قايراتكەرلەرى، سونداي-اق بەلسەندى ۇزاق ءومىر ءسۇرۋ تاقىرىبىنا قىزىعۋشىلىق تانىتقان كوپتەگەن كورەرمەن قاتىستى. سونىمەن قاتار، «الماتى اجەلەرى» ابۋ-دابيدەگى لۋۆر مۋزەيىندە دە ونەر كورسەتتى.
الماتىنىڭ بەلسەندى ۇزاق ءومىر ءسۇرۋ ورتالىعىنىڭ قاتىسۋشىلارى كورەرمەندەردى ءوزىنىڭ نازىكتىگىمەن، ستيلىمەن جانە ومىرلىك قۋاتىمەن ءتانتى ەتتى.
ءفيلمنىڭ تۇساۋكەسەرى مەن مەرەكەلىك ءىس-شارا قازاقستان مەن ءباا اراسىنداعى مادەني بايلانىستاردى نىعايتىپ قانا قويماي، حالىقارالىق اۋديتورياعا بەلسەندى جانە دەنساۋلىققا پايدالى ءومىر سالتىن ۇستانۋدىڭ قانشالىقتى ماڭىزدى ەكەنىن كورسەتتى.
ايتا كەتەيىك، بەلسەندى ۇزاق ءومىر ءسۇرۋ ورتالىقتارى الماتىنىڭ بارلىق اۋدانىندا جۇمىس ىستەيدى. قالادا 15 ورتالىق بار: اتاپ ايتقاندا، ءۇش بولىمشەسى بار قالالىق بەلسەندى ۇزاق ءومىر ءسۇرۋ ورتالىق جانە ۇكىمەتتىك ەمەس ۇيىمداردىڭ 11 فيليالى.
سوڭعى ەكى جىلدا بۇل ورتالىقتارعا كەلۋشىلەر سانى 7 ەسە ارتتى: 2022 جىلى 833 ادام بولسا، 2024 جىلى 6 073 ادامعا جەتتى. كورسەتىلەتىن قىزمەتتەر سانى دا 26 ەسەگە ءوسىپ، 12 مىڭنان 313 مىڭنان استامعا ۇلعايدى.
بەلسەندى ۇزاق ءومىر ءسۇرۋ ورتالىقتارى 40-تان استام تەگىن قىزمەت ءتۇرىن ۇسىنادى، ونىڭ ىشىندە ءبىلىم بەرۋ باعدارلامالارى، ترەنينگتەر، دەنە شىنىقتىرۋ، يوگا، بي، سونداي-اق شىعارماشىلىق شەبەرحانالار بار.