«الاتاۋ» ءداستۇرلى ونەر تەاترىنىڭ ارتيستەرى كابريولەت-اۆتوبۋسپەن شاھاردى ارالاپ، تۇرعىندارعا پەرفومانس فورماتىندا كونسەرت تارتۋ ەتتى. ولار ايالدامالارعا، كوپقاباتتى ۇيلەردىڭ اۋلالارىنا جانە اشىق الاڭدارعا توقتاپ، كورەرەمەندى كەلە جاتقان قالا كۇنىمەن قۇتتىقتادى.
كۇمىس كومەي انشىلەر مەن بيشىلەر، قوبىزشىلار مەن كۇيشىلەر، بايانشىلار مەن داۋىلپازدار قالا جۇرتشىلىعىنا ۇلتتىق ونەردەن شاشۋ شاشىپ، مەرەكەلىك كوڭىل-كۇي سىيلادى. كورىنىستى تاماشالاعان الماتىلىقتار شاتتانىپ، قول بۇلعاپ، انگە قوسىلىپ، بي بيلەدى. كۇتپەگەن جەردەن كونسەرتكە تاپ بولعان تۋريستەر دە قازاقى اۋەنگە ءتانتى بولىپ، ىستىق ىقىلاستارىن ءبىلدىردى.
«بۇل – ەرەكشە باستاما ەكەن. كوڭىلىمىز كوتەرىلىپ قالدى. اياق استىنان وسىنداي كونسەرتكە تاپ بولدىق. فورماتى دا ەرەكشە. كەلە جاتقان قالا كۇنى قۇتتى بولسىن! بارشاڭىزعا اماندىق تىلەيمىز. قالامىز، ەلىمىز كوركەيە بەرسىن!»، – دەدى تەمىر جول ۆوكزالى ماڭىزندا پەرفومانستى تاماشالاعان قالا تۇرعىندارنىڭ ءبىرى.
ەرەكشە فورماتتاعى «الماتى – ايالداماسى» جوباسى قالا كۇنى اياسىندا وسىمەن ەكىنشى جىل وتكىزىلىپ وتىر. ارتيستەردىڭ مەرەكەلىك كەرۋەنى 19 قىركۇيەككە دەيىن جالعاسادى. ايتا كەتەيىك، بۇگىننەن باستاپ 21 قىركۇيەك ارالىعىندا الماتى مۋزەيلەر بىرلەستىگى مەترو بەكەتتەرىندە جىلجىمالى فوتوكورمە وتكىزۋدە. كورمەگە ارحەولوگيالىق ارتەفاكتىلەر، زەرگەرلىك بۇيىمدار، سپورت تاريحى، الماتىنىڭ حح عاسىرداعى بەينەسى جانە ۇلى تۇلعالاردىڭ اسپاپتارى تۋرالى فوتوسۋرەتتەر قويىلدى. ودان بولەك، 18 قىركۇيەكتە مەتروپوليتەن جولاۋشىلارى «الماتى اۋەندەرى» ۇجىمى ۇيىمداستىرعان كونسەرتتەر مەن پەرفورمانستى تاماشالاي الادى.
المتىدا قالا كۇنىن مەرەكەلەۋ اياسىندا جالپى 200-دەن استام ءىس-شارا وتەدى. مەرەكەلىك باعدارلامالار مەگاپوليستىڭ بارلىق سەگىز اۋدانىندا ۇيىمداستىرىلادى. ورتالىق الاڭداردا ۇلكەن ساحنا ورناتىلىپ، تانىمال ارتيستەر ونەر كورسەتەدى. اشىق اسپان استىنداعى بارلىق كونسەرت پەن مادەني باعدارلاماعا كىرۋ تەگىن. نەگىزگى مەرەكەلىك ءىس-شارالار 18-21 قىركۇيەك ارالىعىندا وتەدى. ءىس-شارالار جوسپارىمەن الماتى قالاسى اكىمدىگىنىڭ رەسمي سايتىندا تانىسا الاسىزدار.