قازاقستان 2023 جىلدىڭ شىلدەسىنەن 2024 جىلدىڭ شىلدەسىنە دەيىن شانحاي ىنتىماقتاستىعى ۇيىمىنا ءتوراعالىق ەتەدى
شانحاي ىنتىماقتاستىعى ۇيىمىنا قاتىسۋشى ەلدەر مينيسترلەرى 2023-2024 جىلدارعا ۇيىمنىڭ مادەني جانە تۋريستىك استاناسى رەتىندە الماتى قالاسىن بەكىتۋ ۇسىنىسىن قولدادى، دەپ حابارلايدى Almaty-akshamy.kz.
ق ر مادەنيەت جانە سپورت مينيسترلىگىنىڭ باسپا ءسوز قىزمەتىنەن ءمالىم ەتكەندەي، ۆەدومستۆو باسشىسىنىڭ مىندەتىن اتقارۋشى اسحات ورالوۆ شانحاي ىنتىماقتاستىق ۇيىمىنا قاتىسۋشى ەلدەردىڭ مادەنيەت مينيسترلەرىنىڭ كەڭەسىنە قاتىستى. ونلاين-كەزدەسۋگە ءۇندىستان، جۇڭگو، قىرعىزستان، وزبەكستان، تاجىكستان، رەسەي جانە پاكىستان وكىلدەرى دە قاتىستى.
اسحات ورالوۆ الماتى قالاسىنا شىۇ-نىڭ 2023-2024 جىلدارعا مادەني جانە تۋريستىك استاناسى مارتەبەسىن بەرۋ تۋرالى ماسەلەنى كوتەردى.
«مەن كەين مىرزاعا جانە بارلىق قاتىسۋشىلارعا ءبىزدىڭ باستامامىزدى قولداعانى ءۇشىن العىس ايتامىن. بۇگىنگى تاڭدا الماتى قالاسىندا 14 ءىس-شارانى كوزدەيتىن جوسپار ازىرلەدىك. بۇل حالىقارالىق تۋريستىك جانە مادەني فەستيۆالدەر، سونداي-اق مارافوندار. قازاقستاننىڭ شىۇ-عا ءتوراعالىعى دا اۋقىمدى مادەني باعدارلامامەن سۇيەمەلدەنەتىن بولادى.
شىۇ ەلدەرىمەن بارلىق سالادا، ونىڭ ىشىندە تۋريزم باعىتى بويىنشا دا ىنتىماقتاستىقتى دامىتۋ مەن نىعايتۋدىڭ وڭ سەرپىنى بايقالادى. الماتىنىڭ مادەني جانە تۋريستىك استانا رەتىندە بەكىتىلۋى تۋريزم سالاسىنداعى كورسەتكىشتەردى جاقسارتا تۇسەدى.
بارشاڭىزدى قازاقستانعا كەلىپ، ەلىمىزدىڭ كورىكتى جەرلەرىمەن جانە مادەنيەت سالاسىنداعى جۇمىسىمىزدىڭ ناتيجەلەرىمەن تانىسۋعا شاقىرامىن»، - دەدى مادەنيەت جانە سپورت ءمينيسترىنىڭ مىندەتىن اتقارۋشى.
ەسكە سالايىق، قازاقستان 2023 جىلدىڭ شىلدەسىنەن 2024 جىلدىڭ شىلدەسىنە دەيىن شانحاي ىنتىماقتاستىعى ۇيىمىنا ءتوراعالىق ەتەدى.