وتانداسىمىز الەمدىك دودادا قولا مەدالدى جەڭىپ الدى.
قازاقستاندىق بالۋان المات كەبىسپايەۆ وسلودو ءوتىپ جاتقان الەم چەمپيوناتىنىڭ قولا جۇلدەسىنە يە بولدى، دەپ حابارلايدى Almaty-akshamy.kz Olympic.kz-كە سىلتەمە جاساپ.
نورۆەگيادا كۇرەس تۇرلەرىنەن الەم چەمپيوناتىنىڭ سوڭعى جارىس كۇنىندە قازاقستان قورجىنىنا قولا مەدال ءتۇستى.
المات كەبىسپايەۆ گرەك-ريم كۇرەسىنەن 67 كەلىگە دەيىنگى سالماق دارەجەسىندە سىنعا ءتۇسىپ، جۇبانىش بەلدەسۋىندە مۋرات فيراتتى (تۇركيا) 7:4 ەسەبىمەن جەڭىپ، قولا جۇلدەگە يە بولدى. ناتيجەسىندە قۇرامانىڭ كوشباسشىسى المات كەبىسپايەۆ الەم چەمپيوناتىنىڭ بەس دۇركىن جۇلدەگەرى اتاندى.
ايتا كەتەرلىگى، المات كەبىسپايەۆ بۇعان دەيىن گرەك-ريم كۇرەسىنەن الەم چەمپيوناتىنىڭ ءبىر كۇمىس جانە ءۇش قولا مەدالىن جەڭىپ العان.