المالى اۋدانىندا «حالىق قاتىساتىن بيۋدجەت» باعدارلاماسى بويىنشا اۋلالاردى اباتتاندىرۋ جۇمىستارى جالعاسۋدا.
جۋىردا شيەۆچەنكو كوشەسى، 157 مەكەنجايىنداعى اۋلادا جوندەۋ جۇمىستارى اياقتالدى. جوبانى وسى اۋلادا تۇراتىن بەلسەندى تۇرعىن سابير ۇسىنعان. ونىڭ باستاماسى كورشىلەردى بىرىكتىرىپ، ءبىر ادامنىڭ يدەياسى بۇكىل كەڭىستىكتىڭ كەلبەتىن وزگەرتە الاتىنىن كورسەتتى.
بۇگىندە اۋلا تۇرعىنداردى جاڭا اسفالت توسەمىمەن، بالالارعا ارنالعان ويىن الاڭدارىمەن، زاماناۋي ۆوركاۋت قۇرالدارىمەن جانە بۇلدىرشىندەرگە ارنالعان كەدەرگىلەر جولاعىمەن قۋانتۋدا. ەرەكشە نازار اۋدارارلىق نىسان – ۇزىندىعى ون مەترلىك ساندىك پەرگولا. سونداي-اق، اۋلا جاڭا جارىق شامدارىمەن، ورىندىقتارىمەن جانە گۇلدەرگە ارنالعان قورشاۋلارىمەن كوركەيىپ، تۇرعىندار ءۇشىن ءارى اسەم، ءارى ءقاۋىپسىز ورتاعا اينالدى.
ەندى بۇل اۋلا – ۇيلەردىڭ اراسىنداعى بوس كەڭىستىك قانا ەمەس، بالالار وينايتىن، ەرەسەكتەر تىنىعاتىن، كورشىلەر باس قوساتىن جايلى ورتا.
جالپى «حالىق قاتىساتىن بيۋدجەت» باعدارلاماسى اياسىندا 45 جوبانىڭ 36-سى جۇزەگە اسىرىلدى، قالعان 9 جوبا ورىندالۋ ۇستىندە. ونىڭ ىشىندە 23 جوبا اۋلالاردى اباتتاندىرۋعا باعىتتالعان. بۇعان قوسا، اعىمداعى جوندەۋ جۇمىستارى اياسىندا تاعى 33 اۋلا جاڭارتىلادى.