2025 جىل – جۇمىسشى ماماندىقتار جىلى اياسىندا الماتى قۇرىلىس-تەحنيكالىق كوللەدجىندە باسپا ءسوز تۋرى ۇيىمداستىرىلدى. ءىس-شارا بارىسىندا قوناقتار وقۋ ورنىنىڭ ماتەريالدىق-تەحنيكالىق بازاسىمەن تانىسىپ، ستۋدەنتتەردىڭ تاجىريبەدەن قالاي وتەتىنىن ءوز كوزدەرىمەن كوردى. كوللەدجدە بۇگىندە 41 وقۋ كابينەتى، سپورت جانە اكت زالى، جاتاقحانا مەن ۇلكەن كىتاپحانا جۇمىس ىستەيدى. ەڭ باستىسى – وقۋ پروسەسىنە قاجەت توعىز شەبەرحانا مەن زەرتحانا ستۋدەنتتەردىڭ ەركىن ءبىلىم الۋىنا جاعداي جاساپ وتىر. زاماناۋي قۇرىلعىلار ورناتىلعان زەرتحانالاردا جاستار تەك تەوريانى عانا ەمەس، ناقتى تاجىريبەنى مەڭگەرەدى.
وسىعان بايلانىستى كوللەدج ديرەكتورى بەكتۇرعان احمەتوۆ وقۋ ورنىنىڭ ارتىقشىلىقتارىنا توقتالدى:
«ءبىزدىڭ كوللەدج 1969 جىلى قۇرىلعان. قازىرگى تاڭدا 8 ماماندىق بويىنشا 1200-دەن استام ستۋدەنت ءبىلىم الۋدا. جىل سايىن جۇمىسشى ماماندىقتارىنا قىزىعۋشىلىق ارتىپ كەلەدى. بيىل ستۋدەنتتەر سانى بىلتىرعىدان 50-گە كوپ. ءبىز الماتىدا سانتەحنيكا جانە جىلۋ جۇيەسى بويىنشا بىرەگەي ماماندار دايىندايمىز. جاقىندا “حاۋس-ماستەر” ماماندىعىن اشتىق. بۇل ماماندىق سانتەحنيك، ەلەكتريك، دانەكەرلەۋشى قىزمەتتەرىن بىرىكتىرەدى. ستۋدەنتتەرىمىز حالىقارالىق جارىستاردا ەل نامىسىن قورعاپ ءجۇر»، – دەدى ول.
كوللەدج ءداستۇرلى ءبىلىم بەرۋمەن شەكتەلمەيدى. مۇندا ستۋدەنتتەردىڭ كاسىپكەرلىك داعدىسىن قالىپتاستىرۋ ءۇشىن «Business Startup» ورتالىعى جۇمىس ىستەيدى. سونداي-اق، «دانەكەرلەۋ ءىسى» باعىتى ەۋروپالىق ستاندارتتارعا سايكەس باعالانىپ، جوعارى دەڭگەيدە مويىندالعان. مۇنىڭ ءبارى جاستاردىڭ باسەكەگە قابىلەتتى بولۋىنا ىقپال ەتەدى.
وسى مۇمكىندىكتەردى پايدالانىپ جۇرگەن ستۋدەنتتەردىڭ ءبىرى – سانتەحنيكا ماماندىعىن مەڭگەرىپ جۇرگەن دميتريي كليموۆ. ول ءوزىنىڭ تاڭداۋى مەن جەتىستىكتەرى تۋرالى ايتتى:
«بۇل سالا ءارقاشان قاجەت. چەمپيوناتتاردا ب ا ق سىناپ، ءبىرىنشى ورىن العانىم بار. ءقازىر حالىقارالىق دەڭگەيدە ونەر كورسەتۋگە دايىندالىپ ءجۇرمىن. كوللەدج ماعان ۇلكەن مۇمكىندىك بەردى، مۇعالىمدەرىمىز كوپ نارسەگە ۇيرەتتى. بولاشاقتا ءوز كومپانيامدى اشىپ، ەلگە پايدالى كاسىپكەر بولعىم كەلەدى»، – دەدى جاس مامان.
جاستاردىڭ جەتىستىگى تاجىريبەلى ۇستازداردىڭ ەڭبەگىمەن تىعىز بايلانىستى. وقىتۋشىلار ستۋدەنتتەردى ءبىرىنشى كۋرستان باستاپ، سىزبا سىزۋعا، قۇرىلىس ماتەريالدارىن تانۋعا، كەيىننەن شىنايى شەبەرحانالاردا ەڭبەك ەتۋگە باۋليدى. ساباق بارىسىندا جاستاردىڭ قاتەلىكتەرىن تۇزەتىپ، باعىت-باعدار بەرىپ وتىرادى. ۋاقىت وتە ولار دەربەس جۇمىس ىستەي باستايدى، بۇل بولاشاق مامانداردىڭ كاسىبي بىلىگىن ارتتىرادى.
وسى جايىندا وقىتۋشى جانار قاراتايەۆا پىكىر ءبىلدىردى:
«ءبىز ستۋدەنتتەردى قاراپايىم سىزبادان باستاپ، كۇردەلى قۇرىلىس جۇمىستارىنا دەيىن ۇيرەتەمىز. العاشقى كۇندەرى باقىلاپ قانا جۇرسە، ۋاقىت وتە وزدەرى ەركىن جۇمىس ىستەي باستايدى. قازىرگى جاستار ماماندىقتى جۇرەك قالاۋىمەن تاڭداپ جاتىر. پرەزيدەنتىمىز ايتقانداي، جۇمىسشى كادرلار قوعامنىڭ تىرەگى بولۋى ءتيىس»، – دەدى ول.
كوللەدجدىڭ ەڭ ۇلكەن ارتىقشىلىقتارىنىڭ ءبىرى – ءدۋالدى وقىتۋ جۇيەسى. ياعني ستۋدەنتتەر تەك تەوريالىق بىلىممەن شەكتەلمەي، سەرىكتەس كاسىپورىنداردا وندىرىستىك تاجىريبەدەن وتەدى. بۇل تاجىريبە جيھاز فابريكالارىنان باستاپ IT-كومپانيالارعا دەيىن قامتيدى. مۇنداي ءادىس جاس مامانداردىڭ كاسىبي تۇرعىدا جەتىلۋىنە، بولاشاقتا جۇمىسقا تەز بەيىمدەلۋىنە مۇمكىندىك بەرەدى.
ماستەر الماس قۇرنيازوۆ تا شەبەرحانالاردىڭ جۇمىسىن تانىستىرىپ ءوتتى:
«ءبىزدىڭ شەبەرحانالار زاماناۋي قۇرىلعىلارمەن جابدىقتالعان. مەتالل وڭدەۋ، دانەكەرلەۋ جانە قۇرىلىس جۇمىستارىندا ستۋدەنتتەر حالىقارالىق دەڭگەيدە دايىندالادى. بىلتىر شاكىرتىمىز فرانسيادا وتكەن WorldSkills چەمپيوناتىندا جۇلدە الدى. بيىل تاعى بىرنەشە ستۋدەنتىمىز شەتەلگە جولداما الىپ وتىر»، – دەدى ول.
الماتى قۇرىلىس-تەحنيكالىق كوللەدجى بۇگىندە ءبىلىم، تاجىريبە جانە حالىقارالىق بايلانىستاردى ۇيلەستىرە وتىرىپ، ەڭبەك نارىعىنا سۇرانىسقا يە بىلىكتى كادرلار دايارلاپ كەلەدى.