الماتى قالاسىنىڭ المالى اۋدانى كوگالداندىرۋ مەن اباتتاندىرۋ جاعىنان كوپ جۇمىس ءبىتىردى. جىل باسىنان بەرى مۇندا 230 اعاش ەگىلىپ، 17 مىڭنان استام اعاش كەسىلگەن. جاقىندا 55 مىڭنان استام بۇتانى تاعى ەكپەكپىز.
«حالىق قاتىساتىن بيۋدجەت» باعدارلاماسىنىڭ ءبىر بولىگى وسىنداي. الماتى قالاسىنىڭ وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا المالى اۋدانىنىڭ اكىمى وسىلاي دەپ مالىمدەدى.
المالى اۋدانى كوركەيىپ، دامىپ جاتىر: 2025 جىلى مۇندا قالالىق ورتانىڭ ساپاسىن جاقسارتۋعا باعىتتالعان ونداعان جوبا جۇزەگە اسىرىلعان. اسىرەسە كوگالداندىرۋ مەن اباتتاندىرۋ جۇمىستارىنىڭ قارقىنى كوڭىل كونشىتەرلىكتەي. اۋدان بىرتە-بىرتە جايلى دا، اسەم اۋدانعا اينالىپ بارادى.
جىل باسىنان بەرى اۋداندا جەتى ايماق كوگالدانىپ، اباتتاندىرىلدى. بۇتا ەگىپ، گازون توسەلىپ، اۆتوماتتى سۋارۋ جۇيەسى ورناتىلعان. مۇنداي جۇمىستى تاعى ون ءبىر مەكەنجايدا قولعا الىپتى. جالپى، 2025 جىلى «حالىق قاتىساتىن بيۋدجەت» باعدارلاماسى اياسىندا المالى اۋدانىندا 45 جوبا جۇزەگە اسىرىلماق: 23 جوبا اۋلا جوندەۋگە، 18 جوبا جاسىل ايماقتاردى كوگالداندىرۋعا جانە 4 جوبا اۋلا اۋماقتارىن كوگالداندىرۋعا ارنالعان.
بيىل ناۋرىزباي باتىر، شيەۆچەنكو، قۇرمانعازى، ابىلاي حان، نازاربايەۆ، اباي، جەلتوكسان مەن سەيفۋللين كوشەسىنىڭ بويىندا دا كوگال پايدا بولادى. بۇدان بولەك 55 مىڭنان استام بۇتا دا ەگىلمەك. ءقازىردىڭ وزىندە ءۇش جەردە جۇمىستى باستاپ كەتكەن. شيەۆچەنكو كوشەسى (نازاربايەۆتان سەيفۋللينگە دەيىن)، قۇرمانعازى كوشەسى (نازاربايەۆتان سەيفۋللينگە دەيىن)، ناۋرىزباي باتىر كوشەسى (ابايدان تولە بيگە دەيىن). قالعان بەس ايماقتاعى جۇمىس مەملەكەتتىك ساتىپ الۋ راسىمدەرى اياقتالعاننان كەيىن، تامىز ايىندا باستالماق.
بۇدان بولەك، 2025 جىلدىڭ باسىنان بەرى المالى اۋدانىندا 230 اعاش ەگىلدى. استانا الاڭىندا، اباي داڭعىلىندا، ا. يمانوۆ اتىنداعى سكۆەر مەن دۇيسەنوۆ كوشەسىنە كوشەت ەگىلدى. شىرىگەن اعاشتاردى دا بىرتىندەپ كەسىپ جاتىر. بيىلعى جىلدىڭ العاشقى بەس ايىندا 17 مىڭنان استام اعاش وڭدەلگەن. جىل سوڭىنا دەيىن بۇل كورسەتكىشتى 30 مىڭعا جەتكىزۋ جوسپارلانىپ وتىر.
الماتىداعى قارقىندى دامىپ كەلە جاتقان ورتالىق اۋداننىڭ ءبىرى سانالاتىن المالى اۋدانىنداعى وسىنداي كەشەندى جۇمىستىڭ ارقاسىندا ءبىراز جەردە جاڭارتىلعان جاسىل ايماقتار پايدا بولىپ، اۋلالار اباتتانىپ، كوشەلەر دە جاقسارىپ، اۋدان وزگەشە سيپاتقا يە بولىپ قالدى.