الماتىدا ەسكى تۇرعىن ءۇيدى رەنوۆاسيالاۋدىڭ جاڭارعان باعدارلاماسىن ازىرلەۋ اياقتالىپ قالدى.
الماتى اكىمى ەربولات دوسايەۆ المالى اۋدانى تۇرعىندارىمەن كەزدەستى، دەپ حابارلايدى Almaty-akshamy.kz.
كەزدەسۋگە كەلگەن قالا تۇرعىندارى قالا باسشىسىنا سۇراقتارىن قويدى.
المالى اۋدانى تۇرعىنىنىڭ سۇراعى:
- ماسانچي كوشەسى، 23ا مەكەنجايداعى ءۇي 1938 جىلى سالىنعان، قازىرگى جاعدايى ناشار. وسىعان قاتىستى قاشان جانە قانداي شارالار قابىلدانادى؟
الماتى قالاسىنىڭ اكىمى ەربولات دوسايەۆتىڭ جاۋابى:
- ءقازىر ءبىز جاڭارعان رەنوۆاسيالاۋ باعدارلاماسىن دايىنداۋدىڭ سوڭعى ساتىسىندامىز. باعدارلاما ىشىندە ءبىز قالانىڭ قانداي مۇمكىندىكتەرى بولاتىنىن قاراستىرامىز. وكىنىشكە وراي، قالادا بۇزۋدى نەمەسە جوندەۋدى قاجەت ەتەتىن توزىعى جەتكەن تۇرعىن ءۇي قورى وتە ۇلكەن. قالا بالانسىندا مۇنداي اقشا جوق. ينۆەستوردى تابۋ مۇمكىن بولماي جاتىر. كوپ قاباتتى اۆتوتۇراق سالۋ تۋرالى ۇسىنىسى بار نۇسقاعا مەن رۇقسات بەرمەيمىن.
المالى اۋدانىندا 131 ءۇي ەسكىرگەن بولىپ سانالادى. سىزدىكى دە تىزىمگە ەنگىزىلگەن. ءبىز بىلايشا كەلىسەيىك، قالانىڭ مۇمكىندىگىنە قاراي نە ىستەۋ كەرەكتىگىن كورەمىز. ەگەر ءبىز بيۋدجەت قاراجاتى ەسەبىنەن ساتىپ الىپ، ءسىزدى كوشىرە الساق، مەن مۇنى ىستەيمىن.