اگروبانك قۇرۋ جونىندەگى ۇسىنىس ورىنسىز. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى Almaty-akshamy.kz.
«ەكونوميكانىڭ اگرارلىق سەكتورىنىڭ پروبلەمالارىن شەشۋ ءۇشىن مەملەكەت اۋىل شارۋاشىلىعىن دامىتۋدىڭ ورنىقتىلىعىن ارتتىرۋعا باعىتتالعان جۇيەلى ءىس-شارالار قابىلداۋدا. ماسەلەن، جىل سايىن فەرمەرلەر ءۇشىن كوكتەمگى ەگىس جانە ەگىن جيناۋ جۇمىستارىن جۇرگىزۋگە قارجى بولىنەدى. «كەڭ دالا» باعدارلاماسى ارقىلى 140 ملرد تەڭگە كولەمىندە جەڭىلدەتىلگەن كرەديت بەرىلەدى. اۋىل شارۋاشىلىعى سالاسىنىڭ نەگىزگى كرەديت بەرۋشى ۇيىمدارى «بايتەرەك» حولدينگىنىڭ ەنشىلەس ۇيىمدارى «اگرارلىق نەسيە كورپوراسياسى» اق جانە «قازاگروقارجى» اق (ليزينگ) بولىپ تابىلادى. 2023 جىلى «اگرارلىق نەسيە كورپوراسياسى» اق جەلىسى بويىنشا 330،0 ملرد تەڭگە كولەمىندە قاراجات، ونىڭ ىشىندە كوكتەمگى ەگىس جۇمىستارىنا 140 ملرد تەڭگە ءبولىندى. بۇدان باسقا، «قازاگروقارجى» اق 2023 جىلعا ارنالعان اۋىل شارۋاشىلىعى تەحنيكاسىن ساتىپ الۋ جوسپارى 170،0 ملرد تەڭگەگە دەيىن ۇلعايتىلدى. سونداي-اق جەم-شوپ دايىنداۋ تەحنيكاسى مەن سۋارۋدىڭ ءموبيلدى جۇيەلەرىن قارجىلاندىرۋ ءۇشىن 20،0 ملرد تەڭگە مولشەرىندە بيۋدجەتتىك ينۆەستيسيالار تارتىلدى»، - دەپ اتاپ وتەدى ۇكىمەت باسشىسى جاۋابىندا.
پرەمەر-مينيستر اگروونەركاسىپ كەشەنى اوك سۋبەكتىلەرىنە كرەديت بەرۋدە جاڭا تاسىلدەمەلەردى ەنگىزۋ بويىنشا ءىس-شارالار قابىلدانىپ جاتقانىن ايتادى.
«مەملەكەت باسشىسىنىڭ تاپسىرماسى بويىنشا «اۋىل اماناتى» اۋىل تۇرعىندارىنىڭ تابىسىن ارتتىرۋ جوباسىنىڭ اياسىن كەڭەيتۋ بويىنشا جۇمىس باستالدى. جوبادا سىياقى مولشەرلەمەسى 2،5 پايىزدان اسپايتىن، ەڭ جوعارى مەرزىمى 7 جىلعا دەيىنگى سەنىم بىلدىرىلگەن وكىل (اگەنت) ارقىلى ميكروكرەديتتەر بەرۋ كوزدەلگەن. پيلوتتىق جوبانىڭ اياسىن كەڭەيتۋ ءۇشىن وسى جىلعا 17 مىڭنان استام ميكروكرەديت بەرۋ جوسپارىمەن 100 ملرد تەڭگە ءبولىندى»، - دەدى ول.
ونىڭ اتاپ وتۋىنشە، ميكروكرەديت بەرۋمەن قاتار الەۋمەتتىك-كاسىپكەرلىك كورپوراسيالار ارقىلى اوك سالاسىنداعى ءىرى ونەركاسىپتىك ينۆەستيسيالىق جوبالاردى ىسكە اسىرۋ بويىنشا سولتۇستىك قازاقستان وبلىسىنىڭ تابىستى تاجىريبەسىن تيراجداۋ بويىنشا جۇمىس جۇرگىزىلىپ جاتىر.
«قارىز بەرۋ شارتتارى بارىنشا جەڭىلدەتىلگەن. بيىلدىڭ وزىندە وسى ماقساتقا 100 ملرد تەڭگە ءبولىندى. ونىڭ ەسەبىنەن شامامەن 65 تاۋارلىق ءسۇت فەرماسىنىڭ قۇرىلىسى قارجىلاندىرىلاتىن بولادى. باياندالعاندى، سونداي-اق اوك سۋبەكتىلەرى ءۇشىن كرەديتتىك قۇرالدار مەن ءوندىرىس فاكتورلارىنىڭ قولجەتىمدىلىگىن ارتتىرۋ بويىنشا جۇرگىزىلىپ جاتقان جۇمىستاردى ەسكەرە وتىرىپ، اگروبانك قۇرۋ جونىندەگى ۇسىنىستى ورىندى ەمەس دەپ سانايمىز»، - دەدى ءاليحان سمايىلوۆ.