بۇگىن – دۇنيەجۇزىلىك اللەرگيا جانە دەمىكپەمەن كۇرەس كۇنى.
ەلدە ءار بەسىنشى ادام اللەرگيادان زارداپ شەگەدى ەكەن، دەپ حابارلايدى Almaty-akshamy.kz 24.kz-كە سىلتەمە جاساپ.
كوپشىلىك كۇن جىلىنىپ، جاز شىققانعا قۋانىپ جاتسا، اللەرگياسى بار ادامدار ءۇشىن بۇل جايسىز ۋاقىت. بۇل كوكتەمدە ءشوپ شىعىپ، توزاڭدانعاننان كۇزگە دەيىن جالعاسادى. سوندىقتان وسى ۋاقىت ارالىعىندا ءتۇرلى وسىمدىك اسەر ەتۋى مۇمكىن. مىسالى ءساۋىر مەن مامىردا اعاشتىڭ گۇلدەۋى، ماۋسىم، شىلدەدە شابىندىق، ءداندى-داقىلداردان شىققان توزاڭ، ال تامىز بەن قىركۇيەكتە ارامشوپتەر اسەر ەتۋى مۇمكىن. اعاشتار – ءساۋىر، مامىر، شابىندىق ءداندى-داقىلدار – ماۋسىم، شىلدە، ارامشوپتەر – تامىز، قىركۇيەك. 2023 جىلعى ەسەپتىك كورسەتكىش بويىنشا ەلدە ءبىر عانا كلينيكالىق-دياگنوستيكالىق زەرتحاناعا ماۋسىمدىق اللەرگيا سەبەپتەرىن انىقتاۋ ءۇشىن 25 مىڭنان استام ادام جۇگىنىپتى.
قايرات قيىقبايەۆ، اللەرگولوگ-يممۋنولوگ:
ەڭ ءبىرىنشى اللەرگيانىڭ سەبەبىن انىقتاپ الۋ قاجەت. كوبىنەسە اللەرگيانى ءقازىر سيمپتوماتيكالىق تۇردە ەمدەيدى. ياعني، سيمپتومىن باساتىن عانا دارىلەر بەرەدى. ولار ۋاقىتشا اسەر ەتەدى. اللەرگيانى جازۋ ءۇشىن نەگىزى سەبەبىنە قارسى ەم جاساۋ كەرەك. مىسالى بىرنارسەگە اللەرگيا بولسا، يممۋنوجەتىسپەۋشىلىك قوي، سوندىقتان ورگانيزمنىڭ قارسى تۇرۋ قابىلەتىن كوتەرۋ كەرەك. سول ءۇشىن اللەرگەندەردەن ءبىز ءدارى جاسايمىز، اللەرگوۆاكسيناسيا وتكىزەمىز.
قازاقستان دەنساۋلىق ساقتاۋ مينيسترلىگىنىڭ مالىمدەمەسى بويىنشا حالىقتىڭ شامامەن 30-35%ء-ى ماۋسىمدىق اللەرگياعا شالدىعادى. جىل سايىن قايتالاناتىن بۇل اۋرۋدى قىستا ەمدەگەن ءتيىمدى.
«سول كەزدە تەرىگە سىناما جاسالىپ، اۋرۋ سەبەبى انىقتالادى دا، جازدا قوزۋىنىڭ الدىن الۋعا بولادى»، - دەيدى دارىگەر.