اللانىڭ بىزگە بەرگەن نىعمەتى

نەمەسە ءپىتىر-ساداقا بەرىپ ۇلگەردىڭىز بە؟

قازاقستان مۇسىلماندارى ءدىني باسقارماسى بيىلعى ءپىتىر-ساداقانىڭ مولشەرىن 2 كەلى ۇننىڭ نارىقتاعى ورتاشا باعاسىمەن ەسەپتەپ، 535 تەڭگە بولىپ بەكىتىلگەنىن بۇعان دەيىن حابارلاعان بولاتىن. ءيا، ءقازىر بيدايدىڭ ءوزى ەمەس، ونىڭ ۇن، تالقان سەكىلدى ونىمدەرى كەڭىرەك قولدانىلادى. سول سەبەپتى ءدىني باسقارما ءپىتىر-ساداقانىڭ قۇنىن ۇنمەن ەسەپتەۋدى نەگىزگە العان بولاتىن. ويتكەنى، شاريعاتتا بيدايمەن قاتار ونىڭ ونىمدەرىمەن دە ءپىتىر-ساداقا بەرۋگە رۇقسات ەتىلگەن. مىنە، رامازان ايى دا اياقتالدى. ءپىتىر-ساداقاڭىزدى بەرىپ ۇلگەردىڭىز بە؟

ايدا ارالباي قىزى، تاربيەشى: ءوز تۋىسىڭنان باستا

وتاعاسىمنىڭ جەزدەسىنىڭ جاقىن تۋىسىنىڭ كىشكەنتاي بالاسى اۋرۋشاڭ ەدى، سول بالانىڭ ەمىنە قاراجات جيناپ جاتىر ەكەن. تۋىسقانداردىڭ ورتاق چاتىنا «رامازان ايىنداعى ءپىتىر-ساداقامىزدى سول كىسىگە جيناپ بەرسەك» دەگەن ءوتىنىش تۇسكەن-دى. ءبىراۋىزدان سول وتباسىنا اۋداردىق. شاريعاتتا دا ايتىلعان عوي، ساداقانى جاعدايى تومەن ءوز تۋعان-تۋىستارىڭىزدان باستا دەپ. پايعامبارىمىزدىڭ ءبىر حاديسىندە «ساداقانى تۋىسىنا بەرگەن ادامعا ەكى ساۋاپ بار: ءبىرى – تۋىستىق ساۋابى، ەكىنشىسى – ساداقا ساۋابى» دەلىنگەن ەكەن. «تامشىدان – تەڭىز» دەگەندەي، دىمكاس بالا اياقتان تۇرىپ كەتىپ جاتسا، ودان اسقان ساۋاپ بولماس ءبىز ءۇشىن!

اينۇر نۇرجان، كاسىپكەر: ساداقا بەرۋ – شۇكىرلىك ەتۋ

ءيا، ءار مۇسىلماننىڭ پارىزى بولىپ سانالاتىن ءپىتىر-ساداقانى بيىل دا بەردىك. وتباسىلىق شاعىن بيزنەسىمىز بار. جۇمىسكەرلەرىمىزدىڭ دەنى اتا-اناسىنان، وتباسىنان جىراقتا جۇرگەن ديپلومسىز جاستار، وقۋدا جۇرگەن ستۋدەنتتەر. كۇيەۋىم بيىلعى ءپىتىر-ساداقانى سول جاستارعا ارتىعىمەن تاراتىپ بەردى. جالپى، ساداقا بەرۋ – شۇكىرلىك ەتۋ. اللانىڭ بىزگە بەرگەن نىعمەتىن سەزىنۋ دەپ بىلەمىن ءوز باسىم.

ارسەن ساتىباي، تاكسي جۇرگىزۋشىسى: ۇلىممەن بىرگە باردىم

مەن جۇما نامازىنان قالماي، مەشىتكە باراتىن مۇسىلمانداردىڭ ءبىرىمىن. شىنى كەرەك، كەيدە مەشىت الدىنا كولىگىڭدى قوياتىن ورىن تاپپاي قينالساڭ دا، «اللا ءۇيىنىڭ الدىندا تۇرمىن عوي» دەپ ءوزىڭدى اشۋعا بوي الدىرماۋعا،  سابىرعا شاقىراسىڭ. يسلامنىڭ ءوزى ادامدى تاربيەلەيتىن ۇلكەن قۇرال عوي تۇسىنە بىلگەن ادامعا. ءپىتىر-ساداقامدى مەشىت جاشىگىنە اپارىپ سالدىم. جانە سول كۇنى جانىما كىشكەنتاي ۇلىمدى ەرتىپ الدىم. ساداقانىڭ نە ەكەنىن، ءمان-ماڭىزىن ۇقسىن، سەزىنسىن دەپ. بالالار مەيىرىمدى، قايىرىمدى بولىپ وسسە، قارتتىعىمىزعا الاڭداۋعا ەش نەگىز جوق دەپ بىلەمىن.

تالشىن الان قىزى، كوكونىس ساتۋشى:  باستىسى – سەنىم

شىنى كەرەك، «انە بەرەم، مىنە بەرەم» دەپ ءجۇرىپ، ءپىتىر-ساداقامدى كەشە عانا سالدىم. ءقازىر بانك قوسىمشاسىنان دا اشىپ قويعان عوي، قولىڭىزداعى ۇيالى تەلەفونمەن قاي تۇكپىردە جۇرسەڭىز دە، قالاعان مەشىتىڭىزگە اۋدارا قوياسىز. ەڭ باستىسى – ءپىتىر-ساداقامدى ادال ەڭبەگىممەن تاپقان قاراجاتىمنان اۋداردىم. وتكەندە الەۋمەتتىك جەلىدە ءبىر يمامنىڭ مەشىت الدىندا تۇرىپ، وتكەن-كەتكەن اعايىنعا ءپىتىر-ساداقا تۋرالى قۇلاعدار ەتىپ تۇرعان ۆيدەوسى تارادى. ونى كەيبىرىمىز مۇنىسى نەسى دەپ سىناپ جاتتىق. مەنىڭشە، ورازا ايىنىڭ اياقتالىپ قالعانىن، ءپىتىر-ساداقاسىن بەرىپ ۇلگەرمەگەندەرگە قۇلاققاعىس ەتىپ تۇرعان بولار، وندا تۇرعان ەش سوكەتتىك جوق دەپ ويلايمىن. ساداقا ءبىزدى توسىن اپاتتاردان، اۋرۋ-سىرقاۋدان، جاماندىق اتاۋلىدان ساقتايدى دەپ سەنەمىن. باستىسى – سەنىم.

سارسەنباي اسحاتتەگى، ۇستاز:  كورشىگە قارايلاستىق

كورشىم نەشە جىلدان بەرى دىمكاس بالا باعىپ وتىر. ءوزى جالعىزىلىكتى ايەل. بالا كۇننەن-كۇنگە ءوسىپ اۋىرلاپ بارادى، سوندا دا قايران شەشە بالاسىن قولارباعا كوتەرىپ الىپ وتىرعىزىپ، كوتەرىپ-تۇسىرىپ جاتادى. «اللا سىناعىن كوتەرە الاتىن ادامعا بەرەدى» دەگەن ءسوز راس-اۋ دەپ قالامىن كەيدە. مەكتەپ-ينتەرناتقا وتكىزۋگە قيمايدى ەكەن، ايەلىمە ايتىپ جىلاپ الاتىن كورىنەدى كەيدە. اللادان دا قورقاتىن شىعار، كىم بىلگەن. ءپىتىر-ساداقامىزدى كورشىلەر بولىپ سول ايەلگە جيناپ بەردىك. جۇمىستاعى ءبىراز ارىپتەسىمە دە ايتىپ، ولار دا ەسەپشوتىنا اۋداردى. قۋانىپ قالىپتى. جاي كۇندەرى دە كەلىنشەگىم ءتاتتى، ءدامدىسىن، جاڭا كيىمدەر اپارىپ بەرىپ جۇرەدى. وعان قۋانباسام، رەنجىمەيمىن.

جامال جۇماعالي قىزى، جۋرناليست: بالالاردى قۋانتتىق

ءبىز ۇجىمداعى ەدەن جۋاتىن، ءۇش بالاسى بار جەسىر اناعا جيناپ بەردىك ءپىتىر-ساداقامىزدى. ارينە، باسىندا باسپاناسى، جۇمىسى بار ايەل عوي. دەگەنمەن، بالالارىنىڭ الدى 18-دە ەكەن. قاتارىنان قالماي جاقسى كيىنگىسى كەلەدى دەگەندەي قازىرگى بالا. ءبىز ءسويتىپ كۇندەلىكتى جانىمىزدا جۇرگەن ايەل-انانى، جەلكىلدەپ ءوسىپ كەلە جاتقان بالالارىن قۋانتقىمىز كەلدى. بار نيەتىمىز سول. كەشە سۇراcام، «ۇشەۋىنە دە وزدەرى قالاعان كيىمدەرىن الىپ بەردىم» دەپ قۋانىپ تۇر. بالا – پەرىشتە، ال پەرىشتە قۋانسا، الەم دە قۋانىپ تۇر دەگەن ءسوز.

ارينە، ساداقا بەرگەندى جاسىرىپ ۇستاۋ، مىندەتسىنبەۋ  كەرەك دەگەن بار. دەگەنمەن، ءسىزدىڭ ساۋالىڭىزعا وراي، ءارى ءپىتىر-ساداقانى شىن ىقىلاسپەن ۇسىنعانىمىزدى جەتكىزگىم كەلىپ تۇرعانى. ونىڭ ۇستىنە، قايىرىمدىلىق قادامدارى جاس ۇرپاققا ۇلگى بولۋى كەرەك.

تاقىرىپقا وراي

ساداقا بەرۋ:

– ريزىق-نەسىبەڭىزدى ارتتىرىپ، تابىسقا جەتەلەيدى،

– كۇنالاردى جويادى؛

– اۋرۋ مەن كەلەر اپاتتان قورعايدى؛

– مۇقتاجداردى قۋانىشقا بولەيدى؛

– ءقابىر ازابىنان ساقتايدى.