كۇشتىلىگى ون ەكى پايىزدان تومەن ءالسىز گرادۋستى ليكەر-اراق ونىمدەرىنىڭ قاڭىلتىر ىدىسىنا ەسەپكە الۋ-باقىلاۋ ماركالارىن جاپسىرۋ بويىنشا وزگەرىستەر ەنگىزىلدى، دەپ حابارلايدى Almaty-akshamy.kz
بۇل تۋرالى قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىندە حابارلادى.
قازاقستان رەسپۋبليكاسىنىڭ «ەتيل ءسپيرتى مەن الكوگول ءونىمىنىڭ ءوندىرىلۋىن جانە اينالىمىن مەملەكەتتىك رەتتەۋ تۋرالى» زاڭىنىڭ 9-بابىنىڭ 2-تارماعىنا سايكەس قاڭىلتىر ىدىستا كۇشتىلىگى ون ەكى پايىزدان تومەن ءالسىز گرادۋستى ليكەر-اراق ونىمدەرىنىڭ اينالىمى رۇقسات ەتىلەدى. سونىمەن بىرگە، سالىق كودەكسىنىڭ 172-بابى 2-تارماعىنا سايكەس، تولىسىلعان شاراپتى جانە سىرا قايناتۋ ءونىمىن قوسپاعاندا، الكوگول ءونىمى ەسەپكە الۋ-باقىلاۋ ماركالارىمەن تاڭبالانۋى ءتيىس.
قاڭىلتىر ىدىسى (مەتال بانكاسى) ءۇشىن ىدىستىڭ قاقپاعىنا ەسەپكە الۋ-باقىلاۋ ماركالارىن جاپسىرۋ بويىنشا تالاپتىڭ ورىندالۋى مۇمكىن ەمەس، ويتكەنى تۇتىنۋ ىدىسىن اشۋ كەزىندە ەسەپكە الۋ-باقىلاۋ تاڭباسىنىڭ تۇتاستىعىن بۇزۋ تالابىن ساقتاۋ مۇمكىن ەمەس. مۇنداي تالاپتار ەسەپكە الۋ-باقىلاۋ ماركاسىن قايتا پايدالانۋدى بولدىرماۋ ماقساتىندا بەلگىلەنگەن بولاتىن.
وسىعان بايلانىستى ەرەجەگە قاڭىلتىر ىدىستىڭ قاقپاعىنا ەسەپكە الۋ-باقىلاۋ ماركاسىن جاپسىرۋ تالابىن الىپ تاستايتىن تۇزەتۋ ەنگىزىلدى. قاڭىلتىر ىدىستا ماركا بۇيىرلىك بەتكە جاپسىرىلادى جانە ونىڭ سايكەستەندىرۋ شتريح-كودىنىڭ اقپاراتىن وقىلۋدى قامتاماسىز ەتۋى كەرەك.
2023 جىلعى 14 قاراشادا «تولىسىلعان شاراپ (شاراپ ماتەريالىن) جانە سىرا قايناتۋ ونىمدەرىن قوسپاعاندا، الكوگول ءونىمىن ەسەپكە
الۋ-باقىلاۋ ماركالارىمەن تاڭبالاۋ (قايتا تاڭبالاۋ) قاعيدالارىن، سونداي-اق ەسەپكە الۋ-باقىلاۋ ماركالارىنىڭ نىسانىن، مازمۇنىن جانە قورعاۋ ەلەمەنتتەرىن بەكىتۋ تۋرالى» قازاقستان رەسپۋبليكاسى قارجى ءمينيسترىنىڭ 2018 جىلعى 8 اقپانداعى № 143 بۇيرىعىنا وزگەرىستەر ەنگىزىلدى. وزگەرىستەر العاشقى رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ كۇشىنە ەنەدى.