اليمەنت تولەمەيتىندەردىڭ قۇمار ويىنعا تىگەتىن ستاۆكالارى دا تەكسەرىلەدى

بىلتىر قازاقستاندا تولەنبەگەن اليمەنت كولەمى 20،7 ملرد تەڭگەگە جەتكەن

ەندى اليمەنت بويىنشا قارىزى بار ادامداردىڭ كىرىستەرى جان-جاقتان تەكسەرىلەدى. بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي ءمالىم ەتتى، دەپ حابارلايدى اlmaty-akshamy.kz. 

«اليمەنت تولەمەي جۇرگەندەردىڭ جاڭا كىرىس كوزدەرىن انىقتاۋدا جاڭا تاسىلدەر قولدانا باستادىق جانە ولار ءتيىمدى ەكەنىن كورسەتتى. ەندى اليمەنت بويىنشا قارىزى بار ادامداردىڭ ەلەكتروندىق ءامياندارى، بۋكمەكەرلىك كومپانيالارداعى شوتتارى، بيرجالىق ساۋداداعى باعالى قاعازدارى، كريپتوۆاليۋتالىق وپەراسيالارى، دروپشيپينگ، جەلىلىك ماركەتينگ، تاكسي قىزمەتتەرىنەن تۇسەتىن پايداسى سياقتى كىرىستەرى تەكسەرىلەدى»، - دەدى تالعات ءۋالي.

بىلتىر قازاقستاندا تولەنبەگەن اليمەنت كولەمى 20،7 ملرد تەڭگەگە جەتكەن. 

تالعات ءۋاليدىڭ ايتۋىنشا، بىلتىر استانا قالاسى بويىنشا تولەنبەگەن اليمەنت سوماسى 1 ملرد. 877 ملن. تەڭگە، الماتى قالاسىندا – 528 ملن. تەڭگە، تۇركىستان وبلىسىندا –2  ملرد. 185 ملن. تەڭگە، شىمكەنت قالاسىندا –1 ملرد.290 ملن تەڭگە، قاراعاندى وبلىسىندا – 904 ملن. تەڭگە بولعان.

«سونىمەن قاتار، ەڭ از كۇردەلى اليمەنت وندىرىستەرى ۇلىتاۋ (126)، اقمولا (197)، اتىراۋ (266) وبلىستارىنا تيەسىلى»، - دەدى ءۋالي.