«تەڭىزشيەۆرويل» بىرلەسكەن كاسىپورنىنىڭ قۇرىلعانىنا 30 جىل تولادى
ق ر پرەمەر-مينيسترى ءاليحان سمايىلوۆ «شيەۆرون» مۇناي-گاز كورپوراسياسىنىڭ اتقارۋشى ۆيسە-پرەزيدەنتى نايدجەل حيرن جانە «شيەۆرون. حالىقارالىق بارلاۋ جانە ءوندىرۋ» كومپانياسىنىڭ پرەزيدەنتى كلەي نەففپەن كەزدەستى، دەپ حابارلايدى Almaty-akshamy.kz.
قاتىسۋشىلار تەڭىزدى بولاشاقتا كەڭەيتۋ جانە ونداعى ساعالىق قىسىمدى باسقارۋ جوبالارىن ىسكە اسىرۋ بارىسىن، كقك قۇبىر جۇيەسىنىڭ وتكىزۋ قابىلەتىن ارتتىرۋ جانە جۇمىسپەن قامتۋ شارالارىن، سونداي-اق قاراشىعاناق كەن ورنىن يگەرۋدىڭ وزەكتى ماسەلەلەرىن تالقىلادى.
كەزدەسۋ بارىسىندا پرەمەر-مينيستر بيىل «تەڭىزشيەۆرويل» بىرلەسكەن كاسىپورنىنىڭ قۇرىلعانىنا 30 جىل تولاتىنىن ەسكە سالدى.
«تەڭىز جوباسى – قازاقستاندا 1993 جىلدان بەرى ىسكە اسىرىلىپ كەلە جاتقان ەڭ تابىستى جوبالاردىڭ ءبىرى. وسى جىلدارى “تەڭىزشيەۆرويل” ەلىمىزدىڭ ەكونوميكاسىنىڭ دامۋىنا زور ۇلەس قوستى. ۇكىمەت اراداعى ءتيىمدى ىنتىماقتاستىقتى ودان ءارى جالعاستىرۋعا نيەتتى»، — دەدى ءاليحان سمايىلوۆ.
ءوز كەزەگىندە «شيەۆرون» كومپانياسىنىڭ وكىلدەرى قازاقستانمەن قولدانىستاعى جانە پەرسپەكتيۆالى باعىتتار بويىنشا ستراتەگيالىق ارىپتەستىكتى نىعايتۋ بويىنشا جۇمىس ىستەۋگە دايىن ەكەندىكتەرىن راستادى.
«رەسپۋبليكاداعى العاشقى ءىرى ينۆەستورلاردىڭ ءبىرى بولۋ – ءبىز ءۇشىن زور مارتەبە. سوڭعى 30 جىل ىشىندە سەرىكتەستەرىمىزبەن ىسكەرلىك ىنتىماقتاستىق ورناتتىق. ءبىز ونىمدىلىكتى ۇلعايتۋ باعىتىندا ۇزدىكسىز جۇمىس ىستەي وتىرىپ، تەحنيكالىق تاجىريبەمىزدى، تەحنولوگيالىق شەشىمدەرىمىزدى جانە ينۆەستيسيالارىمىزدى ەلگە تارتتىق. وسى ۋاقىت ىشىندە "تەڭىزشيەۆرويل" جۇمىسكەرلەرگە جالاقى تولەۋ، جەرگىلىكتى تاۋارلار مەن قىزمەتتەردى ساتىپ الۋ، سالىقتاردى جانە ت. ب. قوسا العاندا، قازاقستاندىق كاسىپورىندارعا $176 ملرد تىكەلەي قارجىلىق تولەمدەردى جۇزەگە اسىردى. ءبىز جەرگىلىكتى كادرلاردى وقىتۋعا جانە ولاردىڭ كاسىبي وسۋىنە ىقپال ەتتىك، ولاردىڭ الەۋەتى مەن مۇمكىندىكتەرىن ارتتىردىق. بۇگىندە قازاقستاندىقتار تشو-داعى 90%-دان استام لاۋازىمعا يە بولىپ وتىر»، — دەدى نايدجەل حيرن.
كەزدەسۋگە ەنەرگەتيكا ءمينيسترى الماسادام ساتقالييەۆ پەن «قازمۇنايگاز» ۇك» اق باسقارما ءتوراعاسى ماعزۇم مىرزاعالييەۆ قاتىستى.