ق ر پرەمەر-مينيسترى ءاليحان سمايىلوۆ مەملەكەت باسشىسىنىڭ تاپسىرماسى بويىنشا ەكونوميكالىق ىنتىماقتاستىق ۇيىمىنىڭ 16-شى سامميتىنە قاتىسۋ ءۇشىن وزبەكستانعا كەلدى. ءاليحان سمايىلوۆ تاشكەنتتەگى ءىس-شارا قارساڭىندا سول ەلدىڭ پرەزيدەنتى شاۆكات ميرزيويەۆپەن كەزدەستى، دەپ حابارلايدى almaty-akshamy.kz
پرەمەر-مينيستر ەڭ الدىمەن مەملەكەت باسشىسى قاسىم-جومارت توقايەۆتىڭ جىلى لەبىزىن جەتكىزىپ، بۇگىندە ەكى ەل اراسىنداعى قارىم-قاتىناستار سەنىم مەن ءوزارا تۇسىنىستىككە نەگىزدەلگەن ستراتەگيالىق سەرىكتەستىكتىڭ جارقىن ۇلگىسى ەكەنىن باسا ايتتى.
ءاليحان سمايىلوۆ اتاپ وتكەندەي، جوعارى دەڭگەيدە قول جەتكىزىلگەن بارلىق ۋاعدالاستىقتاردى ىسكە اسىرۋ قازاقستان مەن وزبەكستان ۇكىمەتتەرىنىڭ باقىلاۋىندا بولادى. مۇنداعى باسىم باعىتتاردىڭ ءبىرى – ەكىجاقتى ءوزارا ىس-ارەكەتتەردىڭ بەرىك ءارى تۇراقتى ەكونوميكالىق تۇعىرناماسىن قۇرۋ.
«وزبەكستان – قازاقستاننىڭ ەڭ ءىرى ساۋدا سەرىكتەستەرىنىڭ ءبىرى. ورتالىق ازياداعى بارلىق وڭىرلىك ساۋدانىڭ شامامەن 70%-ى ءبىزدىڭ ەلدەرگە تيەسىلى. وتكەن جىلدىڭ قورىتىندىسى بويىنشا تاۋار اينالىمى 30%-عا ارتىپ، العاش رەت $5 ملرد-قا جەتتى. ءبىز ءوزارا ساۋدانى $10 ملرد-قا جەتكىزۋ بويىنشا بەلسەندى جۇمىس جۇرگىزىپ جاتىرمىز»، — دەدى پرەمەر-مينيستر.
ول قازاقستان ۇكىمەتى ەكىجاقتى ءوزارا ءىس-قيمىلدىڭ بارلىق سپەكترى بويىنشا وزبەكستانمەن ىنتىماقتاستىقتى سەرپىندى دامىتۋعا بار كۇش-جىگەرىن سالاتىنىن ايتتى.
ءوز كەزەگىندە شاۆكات ميرزيويەۆ ەكى ەل اراسىنداعى ستراتەگيالىق ىنتىماقتاستىق، اتاپ ايتقاندا ساۋدا، كولىك جانە سۋ شارۋاشىلىعى سالاسىنداعى ۋاعدالاستىقتار جۇيەلى تۇردە جۇزەگە اسىرىلىپ جاتقانىن اتاپ ءوتتى.
«ءبىز بارلىق ماسەلەدە العا جىلجىپ كەلەمىز. مەنىڭشە، شەشىلمەگەن ماسەلە جوق. ساۋدا سالاسىندا قازاقستان پرەزيدەنتىمەن كەلىسكەن جوبالار بىزگە جاڭا بەلەستەرگە جەتۋگە كومەكتەسەدى»، — دەدى وزبەكستان پرەزيدەنتى.