ءاليحان سمايىلوۆ قىتايمەن شەكاراداعى كەدەرگىلەردى ءۇش كۇن ىشىندە جويۋدى تاپسىردى

مينيسترلەر كابينەتىنىڭ دەرەگىنشە، بۇگىنگى تاڭدا «نۇر جولى» باقىلاۋ-وتكىزۋ بەكەتىندە كوممەرسيالىق جۇكتەردى وتكىزەتىن تاسىمالداۋشىلاردان ۇزىن-سونار كەزەك تۇزىلگەن. اتاپ ايتقاندا، بۇعان قىتايدىڭ كوروناۆيرۋسقا بايلانىستى قويعان كولىك شەكتەۋلەرىن الىپ تاستاۋى تىكەلەي اسەر ەتىپ، ناتيجەسىندە اراداعى جۇك تاسىمالى ۇلعايعان، دەپ حابارلايدى Almaty-akshamy.kz Ulysmedia.kz-كە سىلتەمە جاساپ. 

بۇل كەزەك ەلەكتروندى تۇردە ق ر قم «اقپاراتتىق-ەسەپتەۋ ورتالىعى» اق پلاتفورماسىندا Qoldau.kz سايتى ارقىلى جۇرگىزىلەدى. سونىمەن قاتار اكىمشىلىك كەدەرگىلەردى قوسا العاندا، ءبىرقاتار فاكتورعا بايلانىستى وتكىزۋ بەكەتى تولىق كۇشىن پايدالانىپ جاتقان جوق، تاۋلىگىنە 100-دەن اسپايتىن جۇك كولىگىنە قىزمەت كورسەتىلەدى. ءوز كەزەگىندە بۇل جابدىقتار مەن قۇرامداس بولشەكتەرگە مۇقتاج ينۆەستيسيالىق جوبالاردى ىسكە اسىرۋعا كەرى اسەر ەتەدى جانە جالپى ەل ەكونوميكاسىنىڭ دامۋىن تەجەيدى.

پرەمەر-مينيستر ءۇش كۇن مەرزىمدە جاساندى كەدەرگىلەردى جويۋ بويىنشا نورماتيۆتىك وزگەرىستەر دايىنداۋدى تاپسىردى، بۇل شەكاراداعى ورىنسىز كەدەرگىلەردى جەدەل جويۋعا جانە وسىلايشا تاۋلىگىنە مىڭعا جۋىق اۆتوكولىكتى وتكىزۋگە مۇمكىندىك بەرەدى.

«بۇگىن-ەرتەڭ وسى كەدەرگىلەردىڭ بارلىعىن الىپ تاستاۋ كەرەك. ەگەر وسى بەكەت ارقىلى مىڭ ماشينانى وتكىزۋ قاجەت بولسا، ونى قامتاماسىز ەتۋ كەرەك. بيزنەس بىزدەن كومەك سۇراپ جاتىر. ادامداردىڭ جۇكتەرى بەكەتتە تۇر، ولار شاراسىز كۇيدە»، — دەدى ءاليحان سمايىلوۆ.

بۇدان باسقا ۋاكىلەتتى ورگاندارعا وسىنداي كەزەكتىڭ جيناقتالىپ قالۋىنا جاۋاپتىلار تۋرالى اقپارات ۇسىنۋ جانە شەكارا بەكەتتەرىنىڭ وتكىزۋ قابىلەتىن ودان ءارى ارتتىرۋ جونىندەگى شارالاردى پىسىقتاۋ تاپسىرىلدى.