ق ر پرەمەر-مينيسترى ءاليحان سمايىلوۆ قىرعىز رەسپۋبليكاسىنىڭ توتەنشە جانە وكىلەتتى ەلشىسى داستان ديۋشەكەيەۆپەن كەزدەسۋ وتكىزدى. كەلىسسوز بارىسىندا تاراپتار ساۋدا جانە ينۆەستيسيالار، ترانزيت جانە كولىك، سونداي-اق سۋ-ەنەرگەتيكالىق تەڭگەرىم سالالارىنداعى ىنتىماقتاستىق ماسەلەلەرىن تالقىلادى، دەپ حابارلايدى اlmaty-akshamy.kz.
ءاليحان سمايىلوۆ باۋىرلاس ەكى ەل اراسىنداعى 30 جىلدىق ديپلوماتيالىق قارىم-قاتىناس كەزىندە ساياسي، ساۋدا-ەكونوميكالىق جانە مادەني-گۋمانيتارلىق سالالاردا ءوزارا تۇسىنىستىك قالىپتاسقانىن اتاپ ءوتتى. ءوزارا ساۋدا ماسەلەسىن تالقىلاي وتىرىپ، ق ر پرەمەر-مينيسترى تاۋار نومەنكلاتۋراسىن كەڭەيتۋ قاجەتتىگى تۋرالى پىكىر ءبىلدىردى.
ساۋدا-ەكونوميكا سالاسىنداعى نەگىزگى جەتىستىك ءوزارا ساۋدا كولەمىنىڭ ۇلعايۋى جانە بەلگىلەنگەن $1 ملرد-قا قول جەتكىزۋ بولدى. جاڭا مىندەت — تاۋار اينالىمىنىڭ كولەمىن $2 ملرد-قا جەتكىزۋ.
«بىزدە ساۋدانى ۇلعايتۋ الەۋەتى بار 190 تاۋار پوزيسياسى بويىنشا ۇسىنىس بار. بىزگە قاراسۋ-اقتىلەك وتكىزۋ بەكەتى ماڭىندا يندۋستريالىق ساۋدا-لوگيستيكالىق كەشەندەر قۇرۋ جوباسىن ىسكە اسىرۋدى جەدەلدەتۋ قاجەت»، — دەدى ءا. سمايىلوۆ.
سۋ-ەنەرگەتيكا سالاسىنداعى ءوزارا ءىس-قيمىلعا قاتىستى ق ر مينيسترلەر كابينەتىنىڭ باسشىسى بۇل سالاداعى ماسەلەلەر جۇيەلى تۇردە شەشىلىپ جاتقانىن اتاپ ءوتتى. د. ديۋشەكەيەۆ ءوز كەزەگىندە قىرعىزستان تاراپىنىڭ قازاقستاننان تىكەلەي ينۆەستيسيالار تارتۋعا مۇددەلى ەكەنىن جەتكىزدى.
«ءبىز ينۆەستيسيالىق جانە ساۋدا ساياساتىن جەتىلدىرۋ جولىندا بەلسەندى جۇمىس جۇرگىزىپ جاتىرمىز. بيزنەس جۇرگىزۋ جانە كاسىپكەرلەر مەن ينۆەستورلاردىڭ قۇقىقتارىن قورعاۋ ءۇشىن قولايلى جاعدايلار جاسالىپ جاتىر»، — دەدى قىرعىزستاننىڭ قازاقستانداعى توتەنشە جانە وكىلەتتى ەلشىسى.
سونداي-اق د.ديۋشەكەيەۆ ورتاق مۇددەلەردى قاناعاتتاندىرۋ اياسىندا ازىق-تۇلىك قاۋىپسىزدىگىن قامتاماسىز ەتۋگە قاتىستى ۇسىنىس ايتتى.
مۇنداي شەشىمنىڭ ماقساتى – سىرتقى نارىقتارداعى تۇراقسىزدىق جاعدايىندا ازىق-تۇلىك قاۋىپسىزدىگىنىڭ بۇزىلۋىنىڭ سىن-تەگەۋرىندەرىن تومەندەتۋ ءۇشىن بىرىككەن ساياساتتى ازىرلەۋ. كەزدەسۋ قورىتىندىسى بويىنشا تاراپتار بارلىق قوزعالعان ماسەلە بويىنشا ىمىراعا كەلۋگە دايىن ەكەندىكتەرىن ءبىلدىردى.