پرەمەر-مينيستر ءاليحان سمايىلوۆ ماشينا جاساۋدى دامىتۋ ماسەلەلەرى جونىندە كەڭەس وتكىزدى.
يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ءوز بايانداماسىندا 2022 جىلدىڭ 6 ايىنىڭ قورىتىندىسى بويىنشا ماشينا جاساۋ ءوندىرىسى وتكەن جىلدىڭ سايكەس كەزەڭىمەن سالىستىرعاندا 37%-عا (اقشالاي بالامادا) وسكەنىن حابارلادى. سالاعا تارتىلعان ينۆەستيسيالار كولەمى 23%-عا ۇلعايدى، دەپ حابارلايدى Almaty-akshamy.kz.
كەڭەس بارىسىندا «قازاقستان ماشينا جاساۋشىلار وداعى» زتب باسقارما ءتوراعاسى مەيرام پىشەمبايەۆ وتاندىق ءوندىرىستى قولداۋدىڭ ءبىرقاتار باعىتى بويىنشا سالا وكىلدەرىنىڭ ۇسىنىستارىن ايتتى.
وڭدەۋ سەكتورىنىڭ كاسىپورىندارىن قولداۋ بويىنشا جۇمىس شەڭبەرىندە شيكىزات، ماتەريالدار مەن قۇرامداس بولشەكتەردى يمپورتتاۋ كەزىندە ەسەپكە جاتقىزۋ ادىسىمەن قوسىلعان قۇن سالىعىن تولەۋ تەتىگىن قولدانۋ 2024 جىلعا دەيىن ۇزارتىلعانى اتاپ ءوتىلدى. بۇل رەتتە ينۆەستيسيالىق جوبالاردى ىسكە اسىرۋ ءۇشىن قاجەتتى مەتالل ونىمدەرىن ققس وسى ادىسپەن تولەنەتىن يمپورتتالاتىن تاۋارلار تىزبەسىنە قوسۋ ۇسىنىلدى. سونداي-اق ءونىمدى ەكسپورتتاۋ كەزىندە ققس-نى جەدەل قايتاراتىن وڭدەۋشى سەكتور كاسىپورىندارىن قامتۋدى كەڭەيتۋ ۇسىنىلادى.
پرەمەر-مينيستر اتالعان ۇسىنىستاردى قولداپ، ءتيىستى مەملەكەتتىك ورگاندارعا قاجەتتى شەشىمدەردىڭ جوبالارىن ەنگىزۋدى تاپسىردى.
«ءبىز وتاندىق ءوندىرىستىڭ ءوسىپ، وركەندەۋىنە مۇددەلىمىز. ول ءۇشىن قولداۋ شارالارىمەن قامتۋ كەڭەيتىلەدى. سونداي-اق ساتىپ الۋلار كەزىندە جەرگىلىكتى قامتۋدى ۇلعايتۋ ماسەلەلەرىنە ەرەكشە نازار اۋدارۋ قاجەت»، - دەدى ءاليحان سمايىلوۆ.
پرەمەر-مينيستر وسى باعىتتار بويىنشا ءتيىستى مەملەكەتتىك ورگاندارعا ءبىرقاتار تاپسىرما بەردى.