پرەمەر-مينيستر ءاليحان سمايىلوۆ نۇر-سۇلتان جانە الماتى قالالارىن بايلانىستىراتىن «ورتالىق-وڭتۇستىك» حالىقارالىق ترانزيتتىك ءدالىزىنىڭ ءبىر بولىگى «قاراعاندى-بالقاش-سارىشاعان» اۆتوجولىن (1492،4-2005 كم ۋچاسكەسى) رەكونسترۋكسيالاۋ بارىسىمەن تانىستى، دەپ حابارلايدى Almaty-akshamy.kz.
«قازاۆتوجول» ۇك» اق باسقارما ءتوراعاسى مەيىرحات قاسىمبايەۆتىڭ ايتۋىنشا، جوبانى 2023 جىلدىڭ جەلتوقسانىندا تولىق اياقتاۋ جوسپارلانعان.
ونىڭ ايتۋىنشا، بيىل جول جامىلعىسىنىڭ قۇرىلىمدىق قاباتتارىن توسەۋ، جاساندى قۇرىلىستاردى مونتاجداۋ جانە جول-قۇرىلىس ماتەريالدارىن دايىنداۋ جۇمىستارى جالعاسادى. ماسەلەن، رەسپۋبليكالىق ماڭىزى بار «قاراعاندى-بالقاش» جانە «بالقاش-بۋرىلبايتال» جانە ت.ب. اۆتوجولداردا كەڭ اۋقىمدى جول-قۇرىلىس جۇمىستارى جۇرگىزىلىپ جاتىر. جۇمىستار بارلىق 8 ۋچاسكەدە قايتا باستالدى.
سونىمەن قاتار كولىك قوزعالىسى اينالما جانە توپىراق توسەلگەن جولدارمەن جۇزەگە اسىرىلاتىن ۋچاسكەلەردىڭ سانىن قىسقارتۋعا باسا نازار اۋدارىلادى. رەكونسترۋكسيالاۋ جۇمىستارى اياقتالعاننان كەيىن بۇل تراسسالار ءتورت جولاقتى ءى تەحنيكالىق ساناتقا سايكەس كەلەتىن بولادى.
«جوبا جول ءجۇرۋ ۋاقىتىن ايتارلىقتاي قىسقارتىپ، ءقاۋىپسىز جانە جايلى قوزعالىستى قامتاماسىز ەتەدى. جاڭارتىلعان اۆتوجول بالقاش كولىنىڭ تۋريستىك كلاستەرىن دامىتۋدىڭ درايۆەرىنە اينالادى جانە جاڭا جۇمىس ورىندارىن قۇرۋعا ىنتالاندىرادى»، — دەدى ءاليحان سمايىلوۆ.
سونداي-اق قاراعاندى وبلىسىنىڭ اكىمى جەڭىس قاسىمبەك ۇكىمەتتىك دەلەگاسيا مۇشەلەرىن ءوڭىردىڭ جول-كولىك ينفراقۇرىلىمىن دامىتۋ بارىسى تۋرالى حاباردار ەتتى، ونىڭ ناتيجەسىندە كولىك الەۋەتى ارتىپ، ءبىرقاتار جولدار جوعارى تەحنيكالىق ساناتقا اۋىستىرىلۋى ءتيىس.
ۇكىمەت باسشىسى باياندامامەن تانىسىپ، وبلىس باسشىلىعىنا ءبىرقاتار ءتيىستى تاپسىرما بەردى.