ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ينۆەستيسيالىق شتاب وتىرىسىندا ينۆەستيسيالار تارتۋ بويىنشا 2021 جىلى نىسانالى ينديكاتورلاردىڭ ورىندالۋ قورىتىندىسى جانە 2022 جىلعا ارنالعان جوسپارلار قارالدى.
2021 جىلى نەگىزگى كاپيتالعا سالىنعان ينۆەستيسيالار كولەمى 13،2 ترلن تەڭگەنى قۇرادى، بۇل 2020 جىلعى كورسەتكىشتەن 7،3%-عا ارتىق. ينۆەستيسيالار ءوسىمىنىڭ نەگىزگى لوكوموتيۆتەرى ەكونوميكانىڭ شيكىزاتتىق ەمەس سەكتورلارى بولدى. ماسەلەن، ينۆەستيسيالاردىڭ ناقتى كولەم يندەكستەرى وڭدەۋ ونەركاسىبىندە 1،4 ەسە، قۇرىلىستا 1،2 ەسە، اۋىل شارۋاشىلىعىندا 1،3 ەسە ءوستى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
وڭدەۋ ونەركاسىبىندە ءوسىمىنىڭ نەعۇرلىم جوعارى كورسەتكىشتەرىنە مەتاللۋرگيادا (+27%)، توقىما وندىرىسىندە (+28%)، فارماسيەۆتيكادا (+39%)، حيميا ونەركاسىبىندە (+55%)، مينەرالدىق ونىمدەردە (+100%) قول جەتكىزىلدى. رەسپۋبليكا بويىنشا نەگىزگى كاپيتالعا ينۆەستيسيالار تارتۋ بويىنشا جىلدىق جوسپار 94%-عا ورىندالدى. نىسانالى كورسەتكىشتەر شىمكەنت قالاسىندا (115،5%)، اقتوبە (101،8%) جانە قوستاناي (101،3%) وبلىستارىندا اسىرا ورىندالدى. قاراعاندى وبلىسىندا (99،9%)، الماتى قالاسىندا (99،8%)، اتىراۋ (99،1%)، جامبىل (97،4%)، پاۆلودار (96،2%) وبلىستارىندا، نۇر-سۇلتان قالاسىندا (96،1%) ءسال ارتتا قالۋشىلىق بار. شىعىس قازاقستان (92،1%) جانە ماڭعىستاۋ (90،8%)، الماتى (89،7%)، اقمولا (89،4%)، تۇركىستان (82،5%)، سولتۇستىك قازاقستان (80،4%) وبلىستارىندا جوسپار ورىندالماعان. ەڭ تومەنگى كورسەتكىشتەر باتىس قازاقستان (69،6%) جانە قىزىلوردا (66،4%) وبلىستارىندا تىركەلدى.
پرەمەر-مينيستردىڭ تاپسىرماسى بويىنشا اتالعان ەكى ءوڭىر اكىمدەرىنىڭ ورىنباسارلارى تارتىپتىك جاۋاپكەرشىلىككە تارتىلاتىن بولادى. 2021 جىلدىڭ 9 ايىنىڭ قورىتىندىسى بويىنشا ق ر ەكونوميكاسىنا تىكەلەي شەتەلدىك ينۆەستيسيالار كولەمى 49%-عا ارتىپ، $18،7 ملرد قۇرادى. قازاقستان ەكونوميكاسىنا ءىس جۇزىندە بارلىق نەگىزگى ينۆەستور ەلدەر بويىنشا كاپيتال اعىنىنىڭ ءوسۋى بايقالادى. توپ-10 ينۆەستور مەملەكەتتىڭ قاتارىنا نيدەرلاندى، اقش، شۆەيساريا، قحر، رەسەي، ۇلىبريتانيا، بەلگيا، تۇركيا، وڭتۇستىك كورەيا جانە فرانسيا كىردى.
«كوش سوڭىندا قالعان وڭىرلەر بەلگىلەنگەن KPI قاتاڭ ساقتاۋ قاجەتتىگىنە نازار اۋدارۋى ءتيىس. نىسانالى ينديكاتورلارعا قول جەتكىزبەگەنى ءۇشىن اكىمدەرگە دەربەس جاۋاپكەرشىلىك جۇكتەلەدى. مەملەكەتتىك ورگاندار مەن اكىمدىكتەر ىشكى جانە سىرتقى ينۆەستيسيالاردى تارتۋ بويىنشا جۇمىستى جۇيەلى تۇردە جالعاستىرسىن»، — دەدى ءا. سمايىلوۆ.