Microsoft كورپوراسياسى قازاقستاندا ورنالاساتىن مۋلتيايماقتىق حاب اشۋعا دايىن
قازاقستان 2025 جىلعا قاراي كەم دەگەندە 100 مىڭ جوعارى بىلىكتى IT-مامان دايارلاۋدى جوسپارلاپ وتىر. بۇل تۋرالى پرەمەر-مينيستر ءاليحان سمايىلوۆ الماتىدا وتكەن «ەۋروپالىق وداق – ورتالىق ازيا» ەكىنشى ەكونوميكالىق فورۋمىندا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پرەمەردىڭ ايتۋىنشا، سيفرلاندىرۋ – ەكونوميكانى دامىتۋدىڭ نەگىزگى درايۆەرلەرىنىڭ ءبىرى. قازاقستان وزىنە ەۋرازيا كەڭىستىگىندەگى ەڭ ءىرى سيفرلىق حابتاردىڭ بىرىنە اينالۋ ستراتەگيالىق مىندەتىن قويدى.
«بىلتىر ەلىمىز ۇكىمەتتەر دامۋىنىڭ بۇۇ يندەكسىندە 28ء-شى ورىنعا يە بولدى. بۇل – وڭىردەگى جانە تمد ەلدەرى اراسىنداعى ەڭ جوعارى كورسەتكىش. قازاقستاندا سيفرلىق ترانسفورماسيانى دامىتۋ ءۇشىن قولايلى جاعدايلار جاسالىپ جاتىر. ءبىز بانك جۇيەسىن قۇردىق. سيفرلىق كوممەرسيا دا قارقىندى دامىپ كەلەدى»، - دەدى ۇكىمەت باسشىسى.
ءاليحان سمايىلوۆ Microsoft كورپوراسياسى قازاقستاندا ورنالاساتىن مۋلتيايماقتىق حاب اشۋعا دايىن ەكەنىن جەتكىزدى. ول ورتالىق ازيا ەلدەرىنەن بولەك، ءازىربايجان، ارمەنيا، گرۋزيا جانە پاكىستان ەلدەرىن دە قامتيتىن بولادى.
«وسى تۇرعىدا قازاقستان «Global Gateway»، «Team Europe» جوبالارىنا جانە ەۋروپالىق وداقتىڭ ورتالىق ازيامەن سيفرلىق بايلانىس جونىندەگى باستاماسىنا بەلسەندى قاتىسۋعا دايىن. قازاقستان ءقازىردىڭ وزىندە ەۋروپالىق سپۋتنيكتىك كومپانيالارعا ايماقتىق حاب قۇرۋ ءۇشىن الاڭ ۇسىندى. 2025 جىلعا قاراي ءبىز كەم دەگەندە 100 مىڭ بىلىكتى IT-مامانىن دايىنداۋدى جوسپارلاپ وتىرمىز. وسى مۇمكىندىكتى پايدالانا وتىرىپ، ەۋروپالىق IT ۋنيۆەرسيتەتتەرىن قازاقستاندا ءوز فيليالدارىن اشۋعا شاقىرامىن. وسىلايشا، Astana Hub تەحنوپاركى بەلسەندى ايماق رەتىندە ىڭعايلى الاڭعا اينالا الادى»، - دەدى ءاليحان سمايىلوۆ.