بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى
ق ر پرەمەر-مينيسترى ءاليحان سمايىلوۆ «Eni» كومپانياسىنىڭ باس وندىرىستىك ديرەكتورى گۆيدو برۋسكومەن، بارلاۋ جانە ءوندىرۋ جونىندەگى ديرەكتورى لۋكا ۆينياتيمەن كەزدەستى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
ءاليحان سمايىلوۆ قازاقستان ۇكىمەتى كومپانيانىڭ ەلىمىزدىڭ مۇناي-گاز سالاسىن دامىتۋعا قوسقان ۇلەسىن جوعارى باعالايتىنىن جانە ۇزاق مەرزىمدى ىنتىماقتاستىقتى ودان ءارى دامىتۋعا نيەتتى ەكەنىن اتاپ ءوتتى.
«ءبىز قاشاعان كەن ورنىن تولىق كولەمدە يگەرۋگە، قاراشىعاناق كەن ورنىندا مۇناي مەن كوندەنسات ءوندىرۋدى قولداۋعا جانە گاز سالاسىن دامىتۋعا ەرەكشە نازار اۋدارامىز»، — دەدى پرەمەر-مينيستر.
سونداي-اق ول ۇكىمەت «QazaqGaz» ۇك» اق-مەن بىرلەسىپ، قاشاعاندا قۋاتى 1 ملرد تەكشە مەتر گاز وڭدەۋ زاۋىتىن سالۋ جونىندەگى كونسورسيۋمنىڭ جوسپارلارىن قولدايتىنىن جەتكىزدى.
ءوز كەزەگىندە گۆيدو برۋسكو كومپانيانىڭ قازاقستانداعى جۇمىسى بويىنشا ۇزاق مەرزىمدى جوسپارى بارىن ايتتى.
«ءبىز قولدانىستاعى جوبالار بويىنشا قاجەتتى شەشىمدەردى ۋاقىتىلى قابىلداپ، جاڭالارىن، سونىڭ ىشىندە جاڭارتىلاتىن ەنەرگەتيكا سالاسىندا ىسكە اسىرۋ مۇمكىندىكتەرىن ىزدەيمىز. ۇكىمەتتىڭ قولداۋىنىڭ ارقاسىندا جوبالار بويىنشا تۋىندايتىن بارلىق ماسەلەلەر جۇمىس تارتىبىمەن شەشىلەدى»، — دەدى گۆيدو برۋسكو.