ەلەنا رىباكينا جوعارى ماراپات ءۇشىن العىسىن ءبىلدىردى.
قازاقستان پرەمەر-مينيسترى ءاليحان سمايىلوۆ ۋيمبلدون تۋرنيرىندە تاريحي جەڭىسكە جەتكەن قازاقستاندىق تەننيسشى ەلەنا رىباكيناعا II دارەجەلى «دوستىق» وردەنىن تابىستادى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
«بارلىق قازاقستاندىقتار ءسىزدىڭ الەمنىڭ ەڭ اتاقتى تەننيسشىلەرىمەن سايىستارىڭىزدى باقىلاپ وتىردى. «ۇلكەن دۋلىعا» تۋرنيرىندە جەڭىسكە جەتىپ، ءسىز وتانداستارىمىزدىڭ ءۇمىتىن اقتادىڭىز، سونداي-اق قازاقستاندا تەننيستى دارىپتەۋگە باعا جەتپەس ۇلەس قوستىڭىز. ءسىزدىڭ جەڭىسىڭىز جاس سپورتشىلاردى ىنتالاندىرا تۇسەدى دەپ سەنەمىن»، - دەدى ءاليحان سمايىلوۆ.
ءوز كەزەگىندە ەلەنا رىباكينا جوعارى ماراپات ءۇشىن العىسىن ءبىلدىرىپ، قازاقستاندىقتاردىڭ قولداۋىن سەزىنىپ جۇرەتىنىن ايتتى.
«ارينە، مەن وتانداستارىمىزدىڭ قولداۋىن ۇدايى سەزىنەمىن. بۇل مەن ءۇشىن ۇلكەن قۋانىش پەن جاۋاپكەرشىلىك. كەشە قازاقستانعا ۇشىپ كەلگەندە مەنى قارسى العان ادامداردىڭ كوپ بولعانىن كوردىم. بۇل جاعدايدىڭ مەنىڭ باسىمنان ءوتىپ جاتقانىنا ءالى دە سەنە الار ەمەسپىن»، - دەدى ول.
قازاقستاندىق تەننيسشى جۇلدە قاراجاتىنىڭ ءبىر بولىگىن ەلىمىزدە قايىرىمدىلىققا جانە يۋنيورلاردى قولداۋعا جۇمسايتىنىن ايتتى.
«مەنىڭ ويىمشا، تۋرنير ۇيىمداستىرعان نەمەسە جاس ويىنشىلارعا گرانت تاعايىنداعان دۇرىس بولادى. سەبەبى، مەن مۇندا زور قولداۋعا يە بولدىم. ەندى جاس بۋىننىڭ دامۋىنا مەنىڭ كومەكتەسەتىن كەزەگىم»، - دەدى ەلەنا رىباكينا.
سونداي-اق، سپورتشى قاراجاتتىڭ ءبىر بولىگىن جانۋارلارعا كومەكتەسۋگە جۇمساۋدى جوسپارلاپ وتىر.
«بىرنەشە كۇننەن كەيىن اقش-تا وتەتىن تۋرنيرلەرگە دايىندالا باستايمىن. بيىلعى ماقسات – الەمدىك رەيتينگتىڭ توپ-10 قاتارىنا كىرۋ. باستى ماقسات – ءبىرىنشى بولۋ. مەن بۇعان ۇمتىلامىن جانە بار كۇش-جىگەرىمدى سالامىن»، - دەدى ۋيمبلدون-2022 جەڭىمپازى.
بۇعان دەيىن حابارلاعانىمىزداي، مەملەكەت باسشىسىنىڭ جارلىعىمەن سپورتتاعى اسا ۇزدىك جەتىستىكتەرى جانە حالىقارالىق ىنتىماقتاستىقتى دامىتۋعا قوسقان ۇلەسى ءۇشىن قازاقستان رەسپۋبليكاسى مادەنيەت جانە سپورت مينيسترلىگىنىڭ «سپورتتى دامىتۋ ديرەكسياسى» رمقك سپورتشى-نۇسقاۋشىسى ەلەنا اندرەيەۆنا رىباكينا ءىى دارەجەلى «دوستىق» وردەنىمەن ماراپاتتالدى.
قازاقستاننىڭ ءبىرىنشى، الەمنىڭ 23-راكەتكاسى ەلەنا رىباكينا العاش رەت ۋيمبلدون ءتۋرنيرىنىڭ چەمپيونى اتانعان بولاتىن.
پرەزيدەنت قاسىم-جومارت توقايەۆ ەلەنا رىباكينانى تاريحي جەڭىسىمەن قۇتتىقتاپ ، حالىقارالىق ارەنادا ەلىمىزدىڭ ابىرويىن اسقاقتاتقانى ءۇشىن العىس ايتتى.
ۋيمبلدون چەمپيونى ەلەنا رىباكينا بارشا جانكۇيەرلەرىنە العىسىن جەتكىزىپ، قازاقستانعا قايتاتىنىن ايتتى.