ءاليحان سمايىلوۆ استانانىڭ جىلۋ ستانسالارى قۇرىلىسىن تەكسەردى

12 تامىز كۇنى ق ر پرەمەر-مينيسترى ءاليحان سمايىلوۆ استاناداعى «تۇران» جانە «وڭتۇستىك-شىعىس» گاز جىلۋ ستانسالارى (گجس) مەن 3-جەو قۇرىلىسىنىڭ بارىسىمەن تانىستى.

قازىرگى تاڭدا 3-جەو-دا جۇمىس 90% ورىندالعان. بيىل بارلىق 4 قازاندىقتى (گاز) كەزەڭ-كەزەڭىمەن ىسكە قوسۋ جوسپارلانىپ وتىر، بۇل ەلورداداعى جىلۋ قۋاتىن قوسىمشا 440 گكال/ساع ارتتىرۋعا مۇمكىندىك بەرەدى.

نىساندا پرەمەر-مينيسترگە «واەك» اق اكسيونەرى سەرگەي كان قۇرىلىس، ىسكە قوسۋ-رەتتەۋ جۇمىستارىنىڭ جۇرگىزىلۋ جانە اعىمداعى تەحنيكالىق ماسەلەلەردى شەشۋ بارىسى تۋرالى باياندادى.

ءاليحان سمايىلوۆ بۇل جوبانىڭ قالا حالقى ءۇشىن ماڭىزدى الەۋمەتتىك ماڭىزدىلىعىن جانە ونى ىسكە قوسۋ ماسەلەسى مەملەكەت باسشىسىنىڭ ەرەكشە باقىلاۋىندا ەكەنىن اتاپ ءوتتى.

«الداعى جىلىتۋ ماۋسىمىندا قازاندىقتاردىڭ ءبارىن پايدالانۋعا بەرىپ، قالانى قوسىمشا جىلۋمەن قامتاماسىز ەتۋ وتە ماڭىزدى. قالا اكىمدىگى نىساندى ۋاقتىلى ىسكە قوسۋ بويىنشا بارلىق قاجەتتى شارالاردى قابىلداۋى ءتيىس»، — دەدى ول.

سودان كەيىن پرەمەر-مينيستر ەلوردانى شامامەن 350 گكال/ساع كولەمىندە قوسىمشا جىلۋمەن قامتاماسىز ەتەتىن «تۇران» گاز جىلۋ ستانساسىنا باردى. وندا جوبانىڭ قاجەتتى قارجىمەن قامتاماسىز ەتىلگەنى، جۇمىس كەستەگە ساي جۇرگىزىلىپ جاتقانى ايتىلدى.

ودان ءارى ۇكىمەتتىك دەلەگاسيا جالپى قۋاتى 350 گكال/ساع بولاتىن جانە سول جاعالاۋ ايماعىن قامتۋى ءتيىس «وڭتۇستىك-شىعىس» گاز جىلۋ ستانساسىنىڭ قۇرىلىسىن تەكسەردى.

«قۇرىلىس جوسپار بويىنشا ءجۇرىپ جاتىر. ءبىز قۇرىلىستىڭ بارىسى مەن مەرزىمىندە ورىندالۋىن قاداعالايتىن بولامىز، ويتكەنى بۇل ماسەلە استانالىقتار ءۇشىن قىس مەزگىلىندە وتە ماڭىزدى»، — دەدى ءاليحان سمايىلوۆ.

جالپى، جاڭا گجس-نىڭ ارتىقشىلىعى – تابيعي گازدى ۇنەمدى تۇتىنۋعا مۇمكىندىك بەرەتىن شاعىن قازاندىقتار. تابيعي گازدان باسقا، ولار ديزەلمەن جۇمىس ىستەۋگە ارنالعان.

«ءقازىر بىزدە ەكى گاز قازاندىعى بار، جاڭا جىلۋ ەلەكتر ورتالىعى ىسكە قوسىلىپ جاتىر. بۇل الداعى جىلىتۋ ماۋسىمىندا قالانى شامامەن 1100 گكال/ساع جىلۋمەن قامتاماسىز ەتەدى، دەمەك، ءبىز جىلۋدى ارتىعىمەن بەرۋگە جۇمىس ىستەپ جاتىرمىز. سونداي-اق ەلوردانى بولاشاقتا جىلۋمەن تۇراقتى تۇردە قامتاماسىز ەتۋ ءۇشىن كەلەسى جىلى قوسىمشا گاز قازاندىقتارىن ەنگىزۋ جوسپارلانىپ وتىر»، — دەدى ءاليحان سمايىلوۆ.