ءاليحان سمايىلوۆ مۇنداي الەۋمەتتىك جوبالارعا جەكە ينۆەستيسيالاردى تارتۋ اسا ماڭىزدى ەكەنىن اتاپ ءوتتى
ق ر پرەمەر-مينيسترى ءاليحان سمايىلوۆ الماتىعا جۇمىس ساپارى اياسىندا جۇقپالى اۋرۋلار ۇلتتىق عىلىمي ورتالىعىنا باردى، دەپ حابارلايدى Almaty-akshamy.kz ۇكىمەتتىڭ سايتىنا سىلتەمە جاساپ.
350 توسەك-ورىنعا ارنالعان جۇقپالى اۋرۋلار ۇلتتىق عىلىمي ورتالىعىنىڭ قۇرىلىسىن 2023 جىلدىڭ سوڭىندا اياقتاۋ جوسپارلانىپ وتىر.
ستاسيوناردان باسقا، وندا عىلىمي-زەرتتەۋ جانە وقۋ ورتالىقتارى، زەرتحانالار، مەديسينالىق ۋنيۆەرسيتەتتەردىڭ كافەدرالارى جانە ت. ب. ورنالاساتىن بولادى.
جاڭا ورتالىقتا جۇقپالى اۋرۋلار، پۋلمونولوگيا جانە فتيزياتريا سالاسىندا ساپالى مەديسينالىق كومەك كورسەتىلەدى، زەرتتەۋلەر جۇرگىزىلىپ، ماماندار وقىتىلادى، وزىق مەديسينالىق تەحنولوگيالار پايدالانىلىپ، دارىلىك پرەپاراتتار سىنالادى.
بۇدان باسقا جاڭا نىسان بازاسىندا رەسپۋبليكاداعى ەپيدەميولوگيالىق احۋالدى باقىلاۋ ءۇشىن احۋالدىق ورتالىق اشۋ جوسپارلانۋدا.
پرەمەر-مينيستر ددۇ مالىمەتتەرى بويىنشا جىل سايىن 2 ملرد ادام جۇقپالى اۋرۋلارمەن اۋىرىپ، 50 ملن-نان استام ادام قايتىس بولاتىنىن ايتتى.
«ورتالىقتىڭ اشىلۋى تۋبەركۋلەزدەن عانا ەمەس، جالپى باسقا دا جۇقپالى اۋرۋلاردان، ونىڭ ىشىندە اسا ءقاۋىپتى اۋرۋلاردان بولاتىن سىرقاتتانۋشىلىق پەن ءولىم-جىتىمدى ازايتۋعا مۇمكىندىك بەرەدى. الماتى اكىمدىگى ورتالىقتى اشۋ ماسەلەسىن ەرەكشە باقىلاۋدا ۇستاۋى قاجەت»، — دەدى ءاليحان سمايىلوۆ.
الماتى اكىمىنىڭ ورىنباسارى اسەم ءنۇسىپوۆا دەنساۋلىق ساقتاۋ سالاسىن دامىتۋ اياسىندا 2025 جىلعا دەيىن پوليورتالىقتى قاعيداتى بويىنشا 16 ەمحانا سالۋ جوسپارلانىپ وتىرعانىن، وندا رەسپۋبليكادا العاش رەت مساك ءبىرىڭعاي ستاندارتى ەنگىزىلەتىنىن باياندادى.
بۇل 300 مىڭنان استام ادام ءۇشىن العاشقى مەديسينالىق قىزمەتتەردى قولجەتىمدى ەتەدى.
بۇدان باسقا، 2030 جىلعا دەيىن قولدانىستاعى 25 كوپ سالالى جانە مامانداندىرىلعان ستاسيوناردىڭ ينفراقۇرىلىمى كەزەڭ-كەزەڭمەن جاڭعىرتىلادى.
سونداي-اق 5 كوپسالالى ستاسيونار (نەيروحيرۋرگيا، ينسۋلت ورتالىعى، ەندوپروتەزدەۋ، تراۆماتولوگيا جانە ورتوپەديا) بازاسىندا ارنايى ورتالىقتار قۇرۋ جانە باسقا دا ءبىرقاتار قادامدى ىسكە اسىرۋ جوسپارلانۋدا.